Matthew 25:20 - Bible Ni Thothup

²⁰ Ma fare tapigpig nni pi’ lal biyu’ e salpiy ni wasey ngak e yib nge pi’ ngak fa lal biyu’ nem e salpiy ni yagnag ko fa lal biyu’ nem, me ga’ar, ‘Mpi’ faram lal biyu’ e salpiy ni wasey ngog, ere ku ba’aray lal biyu’ e salpiy ni kug yagnag riy.’

Matthew 25:20 Σταυροειδείς Αναφορές

Matthew 18:24

Ka fini tabab ngay ni nge muruwliy mi ni fek bagayad i yib ngak ni bay in e million e dollar ni malfith rok fa’anem ngak.

Luke 19:13

Ma dawori yan me kunuy e tapigpig rok ni yad ragag, me bagayad me pi’ reb e salpiy ni gol ngak, me ga’ar ngorad, Mu guyed rogon ngam maruwelgad ko chi salpiy ney ngam thog niged e salpiy riy ko ngiyal’ nda kug moy romad.

Acts 20:24

Machane kug finey ni pogofan rog e dariy rogon ngog, ni fan e nge yag ni gu mu’nag e maruwel ni kan pag fan ngog mu gu mu’nag e maruwel ni Somol Jesus e ke pi’ ngog ni nggu rin’, ni aram e nggu weliy ngan nang fare Thin Ni Bfel’ ni murung’agen feni t’uf e girdi’ rok Got.

1 Korinth 15:10

Machane Got e runguyeg nge ayuwegneg me pingegeg nggu par ni bod rogog e chiney, ma ayuw ni tay ngog e de aw nib m’ayfan. Ya ke thil, nike gel e maruwel ni kug tay ngak urngin e pi apostel, machane gathi gag e gu be rin’ u gelngig, ya Got e be ayuwegneg.

Kolose 1:29

Ere gu be maruwel nib gel ma gu be athamgil ni nge yag e ren’ey, ni gu be maruwel ko fare gelngin nib th’abi gel ni Kristus e be pi’ ngog, ma ku ir e be maruwel u fithik’ag.

James 2:18

Machane bayi ga’ar be’, “I gur e bmich Got u wun’um me gag e gu be rin’ e ngongol riy.” Machane fulweg rog ngom e, “Mu dag ngog rogon nrayog ni nge mich Got u wun’um nde cheag e ngongol rom ngay, mu gu dag ngom e michan’ rog ngak Got ko ngongol rog.”