Matthew 15:31 - Bible Ni Thothup

³¹ Ma fa’ani guy fapi girdi’ nike welthin e pi’in nda i yag ni ngar uned ko numon, nge pi’in yad bmarwoth ni kar sulod nga rogorad, nge pi’in yad bmugutgut ni kar uned ko yan, nge pi’in yad bmalmit nike yag ni kar guyed ban’en miyad ngat ngay; ma aram miyad yog e sorok ngak fare Got nu Israel.

Matthew 15:31 Σταυροειδείς Αναφορές

Genesis 32:28

Me ga’ar fare mo’on, “Dabki par fithingam ni Jakob. Kam fathael ngak Got nge ngak e girdi’, ma kam gel; ere nge par fithingam ni Israel.

Genesis 33:20

Me ubung ba altar u rom, me tunguy El ngay, ni aram e ke ga’ar, altar rok fare Got nu Israel.

Psalms 50:15

Mu piningedgag ko ngiyal’ nra yib e oloboch; mu gu lufmed riy, ma bay mu pininged e sorok ngog.”

Psalms 50:23

Ogmagaer e ire re maligach nri ma tayfag, ma rib mich ni gu ra ayweg e pi’in yad ma fol rog.”

Exodus 24:10

miyad guy fare Got rok piyu Israel. Tan e rifrif u ay e ba’ ban’en riy ni bod ba wo’ nni gad ko malang ni sapphire, ni ra’en e bod feni mak’ef lanelang.

Matthew 15:30

Me yib e girdi’ ni pire’ ni pire’ ngak, ni yad be fek e pi’in yad bmugutgut, nge pi’in yad bmalmit, nge pi’in yad bmarwoth, nge pi’in ndabiyag ni ngar nonod, nge yugu boch e girdi’ ni yad bm’ar nra feked yad ngar ted yad nga but’ u to’oben ay Jesus; me chuweg Jesus e liliy rorad.

Matthew 18:8

“Ere fa’anra waliyem baraba’ i pa’am fa baraba’ i em ngam pi’ keru’um ngak Got, ma ga th’ab ngam n’ag! Ya kabfel’ rogom ni ga ra yan ko yafos ndariy baraba’ i pa’am fa baraba’ i em ko bin ni kabay pa’am nruw raba’ nge em nruw raba’ mi non’em nga fithik’ e nifiy ni dabi math bi’id.

Matthew 21:14

Me yib e pi’in yad bmalmit nge pi’in yad bmarwoth ngak ngalan e Tempel me gol nagrad.

Matthew 8:10

Ri gin Jesus ko re bugithin ney ni rung’ag, me ga’ar ko fapi girdi’ ni yad be un ngak, “Nggog ngomed, ndawor gguy be’ u Israel nrib mich Got u wan’ ni bod gelngin nib mich Got u wan’ e cha’ney.

Matthew 9:32

Nap’an ni yan fa gali mo’on, me fek boch e girdi’ be’ nib mo’on i yib ngak Jesus ndabiyag ni nge non ni bochan e ke ying ba mo’onyan’ ngak.

Matthew 9:33

Ma yugu nap’an ni tuluf Jesus fare mo’onyan’ nge chuw u fithik’ fa’anem, ma aram me un fare mo’on ko numon. Ma gubin e girdi’ nra gin gad ngak, me lungurad, “Dawor da guyed ban’en ni aray rogon u lan yu Israel!”

Matthew 9:8

Ma fa’ani guy e girdi’ ni aram rogon, miyad tamdag, miyad yog e sorok ngak Got ni bochan e ke pi’ gelngin ni aram rogon ngak e girdi’.

Mark 2:12

Ngiyal’ nem ni yad be changar ngak ni yad gubin, me sak’iy fare mo’on me fek e wormel rok nge yan nib gurgur. Mi yigo’o ra gin gad ko n’en nike rin’ Jesus ngak fa’anem, mi yigo’o rogned e sorok ngak Got ni be lungurad, “Dawor da guyed ban’en ni aray rogon bi’id!”

Mark 7:37

Ma urngin e girdi’ nrung’aged e yigo’o ra gin gad ngay me lungurad, “Urngin ban’en ni be rin’ ma bfel’! Mus ko pi’in biling ma ke gol nagrad kar rung’aged ban’en, nge pi’in nib tagan e thin u l’ugunrad nike yal’uweg e thin u l’ugunrad!”

Mark 9:43

Ere fa’anra waliyem baraba’ i pa’am ngam pi’ keruum ngak Got, ma ga th’ab ngam n’ag! Ya kabfel’ rogom ni ga ra yan ko yafos ndariy baraba’ i pa’am ko bin ni kabay pa’am nruw raba’ ma ga yan nga fithik’ e nifiy ni dabi math bi’id.

Luke 14:13

Machane fa’an mu ngongliy e mur, ma ga non ngak e pi’in gafgow, nge pi’in marwoth, nge pi’in mugutgut, nge pi’in malmit,

Luke 14:21

Me sul fare tapigpig nge yan i weliy e pin’ey ni gubin ngak e masta rok. Me ri damumuw fa’anem ni ir e masta ko fare naun me ga’ar ngak fare tapigpig rok, ‘Mu gurnigem ko yu pa’ i kanawo’ ni ba ga’ nge yu pa’ ni ba’achig u lan binaw, ngam non ngak e pi’in gafgow, nge pi’in marwoth, nge pi’in malmit, nge pi’in mugutgut.’

Luke 18:43

Ma ka chingiyal’ nem me yag ni nge guy ban’en, me un ngak Jesus ni be pining e magaer ngak Got. Ma fapi girdi’ ni aram urngirad e ra guyed e ren’em ma yad urngin nrogned e sorok ngak Got.

Luke 7:16

Ma gubin e girdi’ nra mudugdaggad, miyad yog e sorok ngak Got ni be lungurad, “Ke yib i m’ug reb e profet ni ba ga’ u fithik’dad!” Miki lungurad, “Ke yib Got ni nge thapeg e girdi’ rok ngak!”

John 9:24

Mu kur pininged fare mo’on nni gargeleg ma bmalmit nge yib ngorad me lungurad ngak, “Mog u mit Got ntin riyul’ e ngam weliy! Gamad manang nre mo’on nem i Jesus e reb e tadenen.”