Jeremiah 8:2 - Bible Ni Thothup

² Susun e ngan kunuy nga ta’bang ngan key’ag, ma yilrad e kan wereg u but’ ni bod t’ay e gamanman. Bay ni wereg u tarma’en e yal’, nge pul, nge t’uf, ni er e pin’en ni ba’adag e pi girdi’ ney ni ur pigpiggad ngay, mu ur ninged e ayuw ngay ma yad be tay fan.

Jeremiah 8:2 Σταυροειδείς Αναφορές

2 Kings 17:16

Ra th’abed urngin e motochiyel rok SOMOL ni Got rorad ngar ngongliyed l’agruw i wasay ni ya’an fak e garbaw ni pumo’on ni ngu’ur tedfan; mu kur ngongliyed ya’an fare got ni bpin ni Asherah, mu’ur tedfan e pi t’uf, mu’ur pigpiggad ngak fare got ni Baal.

2 Kings 21:3

Miki toy bayay fa yungi tagil e tayfan ni fa’an ni gathay i Hezekiah ni chitamngin; i ubung e pi altar ni fen e tayfan ngak Baal me ngongliy ba liyos ni ya’an fare got ni bpin ni Asherah, ni bod ni rin’ Ahab ni Pilung nu Israel. Manasseh e ki un i tayfan e pi t’uf.

2 Kings 21:5

Mu lan fa gali yoror ko fare Tempel e ubung bogi altar riy ni fen e pi t’uf ni ngu’un tayfan.

2 Kings 23:5

Me chuweg ko maruwel e pi prist, ni gapgepnag yug boch e pilung nu Judah ni ngu’ur pi’ed e maligach u daken e pi altar ngak yugu boch e got u lan e pi binaw u Judah nge yungi n’en nib chugur nga Jerusalem, pi prist nem e yad ma pi’ e maligach ngak Baal, nge yal’, nge pul, nge pi t’uf.

Psalms 53:5

Machane aram e bayib e marus ngorad nib gel, ndawor rrusgad bayay ni aram gelngin, ya bayi wereg Got yilen e pi to’ogor ko girdi’ rok. I Got e ke n’agrad, ma aram e yu Israel e ri bay ra gelgad ngorad.

Psalms 83:10

Gur e mu gel ngorad u Endor, ni mel e ldow rorad u daken e but’.

Psalms 83:11

Mu rin’ ngak e pi tayugang’ rorad e n’en nim rin’ ngak Oreb nge Zeeb; mu gel ngak gubin e pi tagagiyeg rorad ni bod ni mu gel ngak Zabah nge Zalmunna,

Eklesiastes 6:3

Rayag ni nge fakay be’ ra’ay e bitir, me par nib n’uw nap’an, ma demturug feni n’uw nap’an ni par nib fos, ma fa’anra de yag ngak e birok e f’oth ko felfelan’ ma de fel’ rogon e gum’eyag nni tay ngak, me’ere gag e nggog ni kabfel’ be’ nib bitir nni gargaleg ma bayam’.

Jeremiah 14:16

Pi’in ka ra weliyed e pi thin ney ngorad e bay ki li’rad e mael nge uyongol. Dowef rorad e bay nin’ ngalan e yu pa’ i kanawo’ u Jerusalem, ma dariy be’ nra k’eyagrad. Irera’ e n’en ni bayib ngorad ni yad gubin, nge pi le’engirad, nge pifakrad ni pumo’on nge ppin. Bay gu gagiyegnag ngar pi’ed puluwon e kireb rorad.”

Jeremiah 16:11

Ma aram e ngamog ngorad ni SOMOL e ke ga’ar, ‘Pi chitamangimed e ra pi’ed keru’rad ngog ng’ur ted fan ma yad be pigpig nga yug boch e got. Ra n’iged gag ni da ku ra folgad ko tin gu machib nag.

Jeremiah 16:4

Yad ra yim’ ko m’ar ni ubchiya’, ma dariy be’ nra yor nagrad fa k’eyegrad. Dagur rorad e ra aw u but’ ni bod yu ulung i t’ay e gamanman. Ma yira li’rad u tan e mael fa ram’ad ko bilig, ma downgirad e bayi mang ggan ko arche’ nge gamanman ni malboch.

Jeremiah 16:6

Pi’in yo’or ban’en rorad nge pi’in dariy ban’en rorad e yad ra yim’ u daken e re but’ ney, machane dariy be’ nra k’eyagrad fa yor nagrad. Ma dariy be’ nra th’ab downgin fa puy piyan lolgen ni nge dag nike kirban’.

Jeremiah 19:13

Pi naun nu Jerusalem, nge pi naun ntafen e pi pilung nu Judah, nge urngin e naun ni ku un urfiy e incense u daken e chigiy riy ni maligach ngak e pi t’uf ma ku ir e un ngal’weg e wayin riy ni maligach ngak yugu boch e got, e bayi par nike ta’ay ni bod rogon yu Tofeth.”

Jeremiah 22:19

Yira k’eyag ni bod ba dongki, bay ni girengiy e dagur rok ngan garpay nga wuru’ e pi garog nu Jerusalem.”

Jeremiah 25:33

Ra yan i rofen nem ma downgin e pi’in nike li’rad SOMOL e ba wear u daken e fayleng ni tabab u baley nge mus nga baley. Dariy be’ nra tayam’ nagrad, ma dab ni k’eyagrad. Bay ra pired u daken e but’ ni bod bo’lung i t’ay e gamanman.

Jeremiah 31:40

Ma fare loway ni ga’ngin ni yima yin’ e yam’ ngay nge dow, nge urngin yang e ted ni bay nga talang ko lul’ ni Kidron nge yan i mada’ ko fare garog ni Garog ko Os fithingan ko ngek e bayi par nib thothup ni fan ngog. Ma re binaw nem e gathi bay kun buthug e naun riy ara ni kirebnag bayay.”

Jeremiah 36:30

Ere Gag SOMOL e be lungug ngom i gur Jehoyakim ni Pilung, ni dakuriy be’ ni owchem ni bay ki gagiyegnag gil’ilungun David. Dowef rom e bay nin’ nga wean ko gin bay i mat e yal’ riy ngay ni rran, ma be yib e garbeb ngay ni nep’.

Jeremiah 9:20

Mug ga’ar, “Gimed e ppin, mu telmed ngak SOMOL, mu uthumed telmed ko thin ni be yog. Mu filed ngak pifakmed ni ppin rogon ni ngar dololoy’gad, ma ku er i tay e pi tafager romed ni ngam filed ngorad i yin’ ba tangin e gum’eyag.

Jeremiah 9:21

Yam’ e ke yib u langan e pi winda rodad nga naun, ke yib nga naun ko pi pilung rodad; ke thang owchen e bitir ni be fafel u kanawo’ nge pi’in ni pagel ni yad bay ko yungi tagil’ e market.

Jeremiah 9:22

Girdi’ nike yim’ e ke wagey u gubin yang ni bod t’ay e gamanman u daken e pi flang, ni bod e grain ni th’ab e pi’in nma th’ab ngar paged u but’, ni dariy be’ nra yib i kunuy. Irera’ e thin nike yog SOMOL ngog ni nggu weliy.”

Ezekiel 29:5

Bay gon’em nge fapi nig ni yad gubin nga daken e ted. Downgim e bay i aw nga daken e but’ nge par ni dab ni k’eyag. Bay gu pi’ ko arche’ nge gamanman ni ggan rorad.

Ezekiel 39:5

Bay ra thiggad ni yad ba yam’ u lan bang i tafelfel’. I Gag SOMOL ni Th’abi Tolang e gu be non.

Ezekiel 6:5

Bay gu werwereg u but’ e ldow rok piyu Israel; bay gu wereg yilrad nge liyeg e pi altar rorad.

Ezekiel 8:16

Ma aram me fekeg ngalan e yoror ko Tempel. U rom u charen e gin yima yan riy ngalan e garog ko gin nib thothup, u thilin e altar nge baranda’ ma bay rliw’ nge lal i pumo’on riy. Ni kar pi’ed keru’rad ko gin ba thothup ni yad be siro’ ko ngek, ni yad be tayfan e yal’ ni be yib ngalang.

Zefaniah 1:17

Me ga’ar SOMOL, “Bay gu pag e gafgow nrib gel nge yib ngak e girdi’, nga uranod ni bod bmalmit ni be gay e kanawo’, ya kar denen gad nib togopluw ngog. Ere chiney e bay ni pu’og racha’rad nga but’ ni bod e ran, ma pi ldow rorad e bayi mel u but’.”

Zefaniah 1:5

Bay gu thang mit e en ma yan ngalang nga daken e chigiy ko naun ngi i tayfan e y’al, pul, nge pi t’uf. Ma ku bay gu thang mit e pi’in yad ma meybil ngog miyad ma micheg ni yad ba yul’yul’ ngog, machane miyad cheal ngar pagedyad ngan yiblayrad u fithingan fare got ni Molek.

Acts 7:42

Ma aram me pi’ Got keru’ ngorad, nge pagrad ngu’ur meybilgad ko t’uf u lanelang, ni bod rogon ni bay ni kan yoloy u lan fare babyor rok e pi profet ni fa’ani be ga’ar: ‘Piyu Israel! Gathi gag e um li’ed e gamanman ngu’um pi’ed ngog ni maligach ni aningeg i ragag e duw u daken fa gi ted.

Deuteronomy 17:3

ni bochan e be pigpig ma be tay fan yug boch e got, ara yal’, ara pul, ara t’uf, nib togopluw ko tin keyog SOMOL.

Deuteronomy 4:19

Gimed ra sap ngalang ni mu guyed e pin’en nib sug riy, ni aram e yal’ nge pul nge t’uf, ma ngam guyed rogon nge dab mu ted fan ara mu meybilgad ngay. Ya SOMOL ni Got romed e ke pi’ e tiney ngak yugu boch e nam u gubin yang yad be tayfan,