Jeremiah 26:3 - Bible Ni Thothup

³ Ya sana yad ra motoyil ngom miyad pag e pi kireb ni yad be ngongliy. Fa’an yad ra rin’, ma aram e gu ra thiliyeg lanin’ug ko gechig ni kug leamnag ni ngug girengiy nga dakenrad ni bochan e kireb ni yad be rin’.”

Jeremiah 26:3 Σταυροειδείς Αναφορές

1 Kings 21:27

Fa’ani mu’ Elijah ko welthin, me guchthuy Ahab e mad rok nge chuweg u daken, me yin’ e mad ni tutuw nga daken. Me par ndaki abich, mi i mol ni kabay fare tutuw ni mad u daken, mi i yan ni kari kireban’.

1 Kings 21:29

“Kam guy nga rogon nike sobut’nag Ahab ir u p’eowcheg? Bochan e ke yodoro’, ma aram e dab kug girengiy e riya’ nga daken u nap’an e yafos rok; machane ba pagel ni fak e bay gu girengiy e riya’ nga daken e tabnaw rok u nap’an e par rok ko biney e tamilang.”

Jeremiah 26:13

Thingar mu thiliyeged pangimed nge ngongol romed ngam folgad ko thin rok SOMOL ni ir e Got romed. Ma fa’an gimed ra rin’, ma ra thiliyeg laniyan’ ko riya’ nike yog ni bayi girengiy nga dakenmed.

Jeremiah 26:19

Hezekiah ni ir e pilung nu Judah nge girdi’ rok e dar thanged e fan rok Mikah. Ya Hezekiah e yib madgun SOMOL ngak me guy rogon ni nge fel’ u wan’ SOMOL. Ma aram me thiliyeg SOMOL laniyan’ ko fare riya’ ni weliy ni bay girengiy nga dakenrad. Are gadad e chiney e ngad girngiyed e riya’ nib gel nga dakendad.” (

Jeremiah 36:3

Ya dabisiy nra rung’ag piyu Judah murung’agen urngin e riya’ ni ku gu finey ni ngu fek nga dakenrad, ma aram e dabisiy ni yad urngin ni yad ra pi’ keru’rad ko kireb ni yad be ngongliy. Mu gu n’ag fan u wun’ug e kireb rorad nge denen rorad.”

Jeremiah 36:7

Ya dabisiy ni yad ra meybil ngak SOMOL miyad pi’ keru’rad ko kireb ni yad be ngongliy, I SOMOL e bay e tin keyog nra buch ko pi girdi’ ney u fithik’ e damumuw rok nib gel.”

Ezekiel 12:3

“Fak e girdi’, are chiney, ngam m’ag e chugum rom ni bod nma rin’ e kalbus ngam mman ni dawori aw e lumor. Mu guy rogon ni nge guyem gubin e girdi’ ni ngam chuw ngam mman ngabang. Dabisiy nra guyem fapi tatogopluw.

Ezekiel 18:21

“Be’ nib kireb e fa’anra tal ndabki denen ngi i fol ko fapi motochiyel rog, me rin’ e tin nib mat’aw ma bfel’, ma dabki yim’; ya kari muduwgil nike yag e yafos ngak.

Hosea 11:9

Dab gu gechig nigem u fithik’ e damumuw rog; dab kug kirebnag Israel bayay. Ya Gag Got, ma gathi gag e girdi’. I Gag fa En nib Thothup e gu bay rom. Dab gub ngom u fithik’ e damumuw.

Joel 2:14

Ma sana ra thilyeg SOMOL ni Got romed laniyan’ nge fal’eg wa’athmed u wom’ngin e woldug romed. Ma aram e rayag ni ngam pi’ed ngak e grain nge wayin.

Jonah 4:2

Ma aram me meybil ni ga’ar, “SOMOL, gu be fithem, gathi gog faram u m’on ndawor gu pag e tabinaw rog, ni irera’ e n’en ni ga ra rin’? Aram fan ni gu athamgil nggu mil nga Tarshish! Ya gu manang ni gur ba Got ni gab sumunguy ma ri ga ma runguy e girdi’; ma gubin ngiyal’ ni gab gumaen’, ma gubin ngiyal’ ni gab gol, ma gubin ngiyal’ ni kam fal’eg rogom kam par nrayag ni ngam thiliyeg lanin’um nge dab kum pi’ e gechig.