Jeremiah 25:9 - Bible Ni Thothup

⁹ ‘Chiney e bay gu l’oeg urngin e girdi’ ko lel’och nge tapigpig rog i Nebukadnezzar ni Pilung nu Babylon. Bay gu pagrad ngarbad ko cham nga Judah ngak gubin e girdi’ riy nge ngak gubin e binaw u to’oben i yan. Bay gu thirif e re nam ney u but’ nge pi binaw ni bay u to’oben i yan nggu pag ndariy tulwen ni manemus, ni ka ri kireb ni nge gin owchey ngay. I Gag SOMOL e gu be non.

Jeremiah 25:9 Σταυροειδείς Αναφορές

2 Kings 24:2

Me pi’ SOMOL yu raba’ i salthaw nu Babylonia, Syria, Moab, ngu Ammon ngar maelgad ngak Jehoyakim ngar thirifed yu Judah u but’, ni bod nike yog SOMOL u daken e pi tapigpig rok ni pi profet nra rin’.

2 Kronicles 29:8

Bochan e ren’ey ma ka be par SOMOL nib damumuw ngak yu Judah nge yu Jerusalem, ma n’en nike rin’ ngorad e ke gin ma ke tamdag gubin e girdi’ ngay. Gimed manang e ren’ey nrib fel’ rogon.

2 Kronicles 36:21

Ma aram e n’en keyog SOMOL u daken Jeremiah ni profet nra buch e yib i m’ug nib riyul’: “Fare binaw e ngan n’ag ni dakriy be’ riy ni medlip i ragag e duw, ni fan ko toffan ko Sabbath nda ku ni fol riy.”

Proverbs 21:1

I SOMOL e ma gagiyegnag lanyan’ ba pilung nrib mom ni bod nma pow’iy wo’en e lul’.

Isaiah 10:5

I SOMOL e ga’ar, “Gu tay yu Assyria nib dumow rog ni nggu gechegnag e pi’in ku gu damumuw ngak.

Isaiah 13:3

I SOMOL e pining e salthaw rok nib falu’ ma ba m’uthan’rad ni ngar chamgad ko fare mael nib thothup ngar gechig naged e pi’in ba damumuw ngorad.

Isaiah 39:7

Boch pifakam ni pumo’on e bay ni fekrad ngabang ngar manged bogi eunuch ni ngar pigpiggad u lan tafen e pilung nu Babylonia.”

Isaiah 44:28

Ke lungug ngak Cyrus, ‘Gur e bay mu gagiyeg ni pa’ag; bay mu rin’ e n’en ni gu ba’adag ni ngam rin’: bay mog ni ngan fulweg yu Jerusalem nga rogon mi ni ubung e def ko Tempel.’”

Jeremiah 1:14

Me ga’ar ngog, “Riya’ e bayi ligil nga but’ u lan e lel’och ni bayi ligil nga daken urngin e girdi’ ni be par ko re nam ney.

Jeremiah 1:15

Mu telim ko tin nggog: gu be pining urngin e pi nam ni yad bay u lan e lel’och ni ngarbad. Bay yib e pi pilung rorad ngar ngongliyed tagil’rad ko garog u Jerusalem ngu to’oben e rungrung riy i yan, ngu to’oben gubin e binaw nu Judah.

Jeremiah 10:22

Mmotoyil! Ke taw e thin! Ke chub lingan’ ba nam i er ko lel’och; salthaw riy e bayi pingeg e pi binaw nu Judah nge ngal’ ni bang i ted ni desert, ni aram e gin ma par e jackal riy.”

Jeremiah 12:14

I SOMOL e be ga’ar, “Bay ban’en ni nggog u murung’agen e pi’in yad bbuguliyoror yu Israel ni yad e ka ra kireb niged fare but’ ni gu pi’ ngak e girdi’ rog nu Israel. Bay gu chuweg e pi’in kireb ko nam rorad ni bod ba ke pan nni pug, ma bay gu ayweg piyu Judah u pa’rad.

Jeremiah 18:16

Ka ra ted e re nam ney nike tamdag ya’an, ni nge chuwan’iy riy ndariy n’umngin nap’an. Urngin e girdi’ ni bay ranod u to’oben e bay ra gin gad ko n’en ni yad nra guy, bay ur chichingeged lolugenrad nike balyangan’rad.

Jeremiah 2:15

Ka ra tolulgad ngak ni bod bogi layon; ka ra ted fare nam rok nike daken e ted ni desert, pi yochi binaw rok e ka ni kirebnag ma dakuriy be’ ni be par riy.

Jeremiah 20:4

I SOMOL e ke ga’ar, ‘Bay gu gagiyeg nigem ngam mang tapgin e marus ni nge yib ngom nge ngak e pi tafager rom, ma bay mu guyrad ni yad gubin ni karm’ad ko pi saydon rok e pi to’ogor rorad. Bay gu tay urngin e girdi’ nu Judah nga tan gelngin e pilung nu Babylon; bayi fek boch i yad nga Babylon ngar kalbusgad, ma boch i yad e bayi thang e pogofan rorad.

Jeremiah 24:9

Bay gu girengiy ba riya’ nga dakenrad ni urngin e nam nu fayleng e bay rrusgad ngay. Girdi’ e bay i gosgos ngorad, ma yibe moning nagrad, ma fithinganrad e bayi mang ba yaba’ u gubin yang ni ku gu weregrad riy.

Jeremiah 25:8

“Ere, bochan e damur telmed ngak, ma aram e be ga’ar SOMOL ni Gubin ma Rayag Rok,

Jeremiah 29:18

Bay gu pi’ e mael, nge uyngol, nge liliy nge yib ngorad, ma gubin e nam nu fayleng ni bay ra tamdaggad ko tin kar guyed. Urngin yang ni nggu weregrad ngay, e bayi gin me rus e girdi’ riy ko tin ke buch rorad. Girdi’ e bay i moning nagrad ma fithingrad e bayi mang ba yaba’.

Jeremiah 35:11

Ya nap’an ni kol Nebukadnezzar ni Pilung fare binaw, mu gu duwgiliyed ni ngugbad nga Jerusalem nggu paloggad ko salthaw nu Babylon ngu Syria. Aram fan ni gamad be par u Jerusalem.”

Jeremiah 36:2

“Mu fek e babyor ngam yoloy ngay urngin e pin’en ni kug weliy ngom ni murung’agen yu Israel nge yu Judah, nge urngin e pi nam. Mu yoloy urngin e pin’en ni kug weliy ngom ko th’abi som’on ni gu welthin ngom, nap’an ni Josiah e pilung, nge yib nge mada’ ko chiney.

Jeremiah 36:29

Me yog SOMOL ngog ni nggog ngak Jehoyakim ni Pilung ni nge lungug, “Kam urfiy fare gi babyor ma kam fith ngak Jeremiah fan ni yoloy ni pilung nu Babylon e bay yib nge kirebnag e re nam ney me li’ e girdi’ nge pi gamanman ni bay riy.

Jeremiah 4:7

Bod ba gamanman ni layon nike yib ko gin ma mith riy, ba tagathay e pi nam e ke yib nga wean. Ke yib ni nge gathay yu Judah. Pi binaw nu Judah e bayi par ni dakriy woton u but’, ma dakriy be’ nra par u lan fapi binaw.

Jeremiah 40:2

Fare tolang ko salthaw e piningeg nga wuru’ e girdi’ nge ga’ar ngog, “Fare SOMOL ni Got rom e keyog ni re but’ ney e nge yib e riya’ ngay,

Jeremiah 43:10

Ma aram ma gog ngorad ni Gag, fare SOMOL ni Gubin ma Rayag Rok, ni fare Got rok yu Israel, e bay gu fek e tapigpig rog i Nebukadnezzar ni Pilung u Babylon ngaray, ni ir e bayi tay e chiya rok nga daken e pi malang ney ni kam k’eyag, ma bay i garareg e tent ko pilung u daken.

Jeremiah 46:20

Yu Egypt e bod ba garbaw ni bfel’usun, nike m’ud e lal nu lel’och ngak yad be k’ad.

Jeremiah 49:19

Bod ba layon ni yib u fithik’ e gerger u charen e lul’ ni Jordan ngalang ko gin nib galunglung nma abich e gamanman riy, amrogon ni bay gu tuluf e piyu Edom ngar milgad nib tomgin ngar chuwgad ko nam rorad. Re tolang ni gu ra mel’eg e ra gagiyegnag fare nam. Mini’ e rayag ni nge ta’reb rogon ngog? Mini’ e ra math’ magran rok ni nge togopluw ngog? Mini’ e re tagagiyeg nrayag rok ni nge paluwyeg?

Jeremiah 6:1

Gimed girdi’en e Benjamin, mmil naged e pogofan romed! Mmilgad ngam chuwgad u Jerusalem! Mu thoyed e rappa’ u lan yu Tekoa mi gimed k’eg ba nifiy ni pow u lan yu Beth-Haccherem. Riya’ nge gafgow e nge yib ko lel’och.

Jeremiah 8:16

To’ogor rodad e ka ra tawgad ngalan e binaw nu Dan; gadad be rung’ag lingan e nifeng u peth’ngun e os rorad. Ga’ngin e binaw ni be t’on ko ngiyal’ ni be gogo’ e os rorad. Pi to’ogor rodad e karbad ni ngar gathayed tafadad nge gubin ban’en riy, nge binaw rodad nge girdi’ riy.”

Ezekiel 12:20

Pi binaw nike sug ko girdi’ e chiney e bay ni gathay, ma fare nam e bayi par ni dakriy e wulgo’ riy. Ma aram e bay ra nanged ni Gag fare SOMOL.”

Ezekiel 16:40

“Bay ra k’arnged e girdi’ ni yo’or ngar malang nigem gur, mar th’eth’abed gur ni yoch yang ko saydon rorad.

Ezekiel 21:11

Kan mu’ i be’echnag fare saydon, ni kan falfal’eg rogon ni ngan cham ngay. Kan uthum ka ni gichiy, ni ngan tay ngalan pa’ e en ni nge thang e pogofan.

Ezekiel 26:7

I SOMOL ni Th’abi Tolang e be ga’ar, “Bay gu fek i yib ba pilung ni ir e th’abi gel gelngin u fithik’ uringin e pilung ni Nebukadnezzar nu Babylonia — ni nge mael nga Tyre. Bay i yib u lan e lel’och nib mu’un barba i salthaw ngak nib ga’, nge os nge chariot, nge girdi’en e yan u os.

Ezekiel 36:5

“I Gag SOMOL ni Th’abi Tolang, e kug welthin u fithik’ gawelngin e damumuw rog nib togopluw ngak fapi nam ni yad ba liyegmed, ma rib ga’ nib sor fan ngak yu Edom. U fithik’ e minmin nge girigan’ miyad kol e but’ rog nge gel farad ko yungi tagil’ e abich ko gamanman riy.

Daniel 5:18

“Got ni Ir e Th’abi Tolang e gagiyegnag Nebukadnezzar ni chitamam nge mang ba pilung ni ba ga’, me gagiyegnag e girdi’ ngu’ur ted fan me par nib sorok.

Habakkuk 1:12

SOMOL, ka nap’an ko tabolngin ni ga be par ni gur e Got. Gur e Got rog, ni gab thothup ma bay um par ndariy n’umngin nap’am. SOMOL, ni Got rog nma yoror rog, kam mel’eg yu Babylon ma kam pi’ gelngirad ya nge yag nra gechig niged gamad.

Habakkuk 1:17

Mog, ga be finey ni ngu’ur maruwelgad ko saydon rorad ndariy n’umngin nap’an, ngu’ur thirifed e pi nam u but’ ma darir runguyed be’?

Deuteronomy 28:37

U lan e pi nam ni bayi weregmed SOMOL ngay, e girdi’ riy e bay ra dada’gad ko n’en ke buch romed; bay ur minmingad ngomed ma yad be moning nagmed.