Jeremiah 2:31 - Bible Ni Thothup

³¹ Gimed e girdi’ nu Israel, mu telmed ko mang e gu be yog. Gur ka’a gu bod bangi desert ngomed, ara ba nam nib lumor ma ba yo’or e maad’ad riy? Ere mangfan ni gimed be yog ni ngu’um rin’ed e n’en ni gimed ba’adag, ma gimed e dab ku mu sulod ngog?

Jeremiah 2:31 Σταυροειδείς Αναφορές

1 Kings 11:22

Me fith fare pilung, ni ga’ar, “Ni mangfan? Mog, kabay ban’en ndawori yag ni gu pi’ ngom? Ere aram fan ni ga ba’adag ni ngam sul nga tafnam?” Me fulweg Hadad lungun fare pilung, ni ga’ar, “Kemus ni ngam pageg nggu wan.” Ma aram me sul ko nam rok.

2 Kronicles 31:10

ma ba’aray e n’en ni yog Azariah ni Prist ni Th’abi Ga’ ni be’ ni owchen Zadok ngak fare pilung, “Nap’an ni tabab e girdi’ i fek e pi tow’ath rorad i yib ngalan fare Tempel, ma gubin ngiyal’ nib gaman e n’en ni ngad ked ma ku bo’or e tin ni aw. Bay e pin’ey ni gubin rodad ni bochan e ke fal’eg Somol wa’athan e girdi’ rok.”

BABYOR NI JOB 21:14

Pi’in kireb e yad be yog ngak Got ni nge pagrad ngu’ur pired rorad; daburad ni ngar nanged e n’en ni ba’adag Got ni ngar rin’ed u lan e yafos rorad.

Psalms 10:4

Pi’in kireb e dariy fan SOMOL u wan’rad; mu fithik’ e tolngan’ rorad e yad ma leamnag ni dariy rogon Got.

Psalms 12:4

“Thin romad e ma yagnag ngomad e n’en ni gamad ba’adag. Bay gogned e n’en ni gamad be finey, ma dariy be’ nrayag ni talegmad.”

Proverbs 30:9

Ya fa’anra yug ra yo’or ngog, mrayag ni gog ni dariy angim ngog. Ma fa’anra gu ba gafgow, ma rayag ni gu moro’ro’ nggu m’aynag fan e Got rog.

Isaiah 45:19

Dagur mith’ag e thin rog, ara tin gu be rin’. Da gu leamnag ni nge gayeg yu Israel u bang nib wagagey urngin ban’en riy. I Gag e SOMOL, ma tin riyul’ e gu be yog; tin nib mat’aw e gu ma gagiyegnag ngan nang.”

Jeremiah 2:20

I SOMOL ni Th abi Tolang e ga’ar, “Israel, ka ba kakrom ni mu n’ag e thin rog; ma ga siyeg ni ngam folwok rog ara mu liyor ngog. U daken urngin e burey nib tolang ngu tan urngin e yu ke gek’iy e u mu tay fan riy bogi got ko yong’ol.

Jeremiah 2:25

Israel, mu ayuw, ya ri par e rifrif u em ndakuriy e sus riy, fa mlik’ k’angam ni bochan e ga be lol’oeg yug boch e got. Ma ga be ga’ar, ‘Danga’! Dabkiyag ni nggu sul! Kafram i yib nib t’uf e pi got nu bang rog ma nggu lekrad.’”

Jeremiah 5:5

Ere bay gu waen ngak e pi’in yad ma gagiyeg nggu weliy ngorad. Bmich ni yad manang ko mang e be yog Got, fa mang e ba’adag SOMOL ni ngar rin’ed.” Machane yad gubin nra siyegned mat’wun SOMOL miyad siyeg ni ngar folgad rok.

Jeremiah 5:6

Aramfan ni gamanman ni layon u loway e bayi thangrad; ma pilis ni malboch u daken e ted ni desert e bayi popofrad ni yochyang, ma pi leopard e bay ura pachpach gad niyad be fita’ u lan e yochi binaw rorad. Pi girdi’ ney e yad ra yan nga waen, ma yira popofrad ni bochan e denen rorad ni kaygi yo’or ma ke yo’or yay ni yad be pi’ keru’rad ngak Got.

Ezekiel 14:5

Gubin fapi liyos ni kar pingeged yu Israel kar pi’ed keru’rad ngog, machane gu be athapeg ni fulweg rog e ra sulweg lanin’rad ngog.

Hosea 13:6

Machane fa’an mmarod ngalan fare nam ni bfel’, mi gimed abich ngam fosgad, mi gimed ufanthin ngam paged talig.

Amos 1:1

Pi thin ney e thin rok Amos, ni ir reb e tagafaliy e saf ko binaw nu Tekoa. I Got e yib i pi’ e re bugithin ni ba’aray ngak Amos ni l’agruw e duw nga m’on ko fare durru’ fa ngiyal’nem ni Uzziah e pilung nu Judah, mi Jeroboam, nib mo’on ni fak Joash e pilung nu Israel.

Mikah 6:9

En nra i par ni bay madgun SOMOL u wan’ e ba gonop. Be non ngak e girdi’ u lan fare binaw ni be ga’ar, “Mu telmed e pi’in kam mu’ulunggad ngalan binaw!

1 Korinth 4:8

Urngin e tin ni nge yag ngomed e go’ ke yag ngomed! Yigo’o ke yo’or ban’en romed! Kam pilunggad ma gamow e dawor! Ku gum’ ni bochan ni gomanga errogon ma rriyul’ ni kam manged bogi pilung, nge yag ni gu unew ngomed ko pilung.

Deuteronomy 31:20

Bay gu fekrad ngalan e re nam nem nib madnom ma ba yong’ol e but’ riy, ni bod ni gu micheg ngak pi chitamangirad kakrom. U rom e rayag ngorad riy urngin e ggan ni yad ba’adag, ma bay ur pired ni bfel’ rogorad. Machane bay ra pi’ed keru’rad ngog ngu’ur tedfan yugu boch e got. Bay ra dabuyedgag miyad th’ab fare m’ag ni kug ngongliy u thilmad,

Deuteronomy 32:15

“Girdi’ rok SOMOL e i pire’ ban’en rorad, machane ba gel e togopluw ni ur ted; ra sugsuggad ya pire’ e ggan ni yad be kay. Miyad pi’ keru’rad ngak Got ni ir e sunumiyrad, ma en ni ta’ayuw rorad nib gel gelngin e ra pi’ed keru’rad ngak.

Deuteronomy 32:18

Ra paged talin e Got rorad, nib gel gelngin ni i ayuwegrad u pa’ e pi to’ogor rorad, ni en ni pi’ e yafos ngorad.