Genesis 18:25 - Bible Ni Thothup

²⁵ Rib mudugil ndab mu chagiy e pi’in ndawor ra ngongliyed e kireb ko pi’in yad ba kireb ngam thangefan rorad. Dabiyag! Dabiyag ni ngam rin’ ni er rogon. Ya ra yodor, me ere bay ni gechignag e pi’in ndawor ra ngongliyed e kireb nta’reb rogon ngak e pi’in kar ngongliyed e kireb. Dabiyag ni nge yodor. Tapufthin ko fayleng ni polo’ e ma ngongol nib yal’uw.”

Genesis 18:25 Σταυροειδείς Αναφορές

Genesis 18:24

Fa’anra bay wugem e girdi’ u lan e re binaw nem ndarir ngongliyed e kireb, ma ka ga ra kirebnag e re binaw nem ni ga’ngin? Dab mu tay ndab mu kirebnag ni fan e ngam ayuweg e pogofan rok e re wugem i girdi’ nem?

1 Kronicles 16:33

Pi yuke gek’iy nu lan e loway e bay ra garus niged e felfelan’ nnap’an nra yib SOMOL ni nge gagiyegnag e fayleng.

2 Kronicles 19:7

Ere ngi i par madgun SOMOL u lanin’med mi gimed tiyan’med ko tin gimed be rin’, ya SOMOL ni Got rodad e dar ma kadan’ ko n’en nib sasaliyab ma darma lanyan’ ara fanay pulwon e kireb.”

Nehemiah 9:33

Mmat’aw e tin mu rin’ ko gechig ni mpi’ ngomad; um par ni gab yul’yul’ ngomad, ni yug aram rogon ni gamad be denen.

BABYOR NI JOB 34:10

Mmotoyilgad ngog, gimed e pi’in gimed ra nangfan! Gur, Got ni Gubin ma Rayag Rok e ra rin’ e kireb?

BABYOR NI JOB 34:12

I Got, ni Gubin ma Rayag rok e der ma rin’ e kireb; ma dariy bingyal’ nma sasalap ngak be’.

BABYOR NI JOB 8:20

Machane Got e dariy e ngiyal’ nra pag e pi’in yad ba yul’yul’ ara pi’ e ayuw ngak e girdi’ ni kireb.

BABYOR NI JOB 8:3

I Got e dar ma olobochiy e tin nib mat’aw; dariy bangiyal’ nra pag i rin’ e n’en nib mat’aw.

Psalms 50:6

Tharmiy e be weliy feni bmat’aw Got, ya ir e ma pufthin.

Psalms 58:11

Bayi ga’ar e girdi’, “Pi’in nib mat’aw e rriyul’ ni kan pi pulworad; rriyul’ ni bay ba Got nma pufthinag e fayleng.”

Psalms 7:12

Fa’anra dab ra thilyeged pangirad, ma bayi uthum Got e saydon rok. Ke tel e gat’ing rok ke fal’eg rogon ke tay;

Psalms 75:3

Urngin e pin’en ni bay e yafos riy nra durru’ ma fayleng e ra rur, machane bay gu duwgiliy e pi duga’ ko fayleng nib muyluy.

Psalms 94:2

Gur e tapufthin romad ni gamad gubin; mu sak’iy ngam pi ngak e pi’in tolngan’ e n’en ni bay tapgin ni nge aw ngorad!

Psalms 98:9

ni bochan e yib ni nge gagiyegnag e fayleng. Ir e nge gagiyegnag e girdi’ u fayleng nib mat’aw ma ba yal’uw.

Eklesiastes 3:17

Kugog ngog nike lungug, “Got e bayi duwgiliy e n’en ni nge rin’ ngak e tin nib mat’aw e girdi’ nge tin ntagan, ya gubin ban’en nge gubin e ngongol e bay yib i m’ug ma bay nrin’ u ngal’an nike m’ay i duwgiliy rok Got.”

Eklesiastes 7:15

Yafos rog e bm’ayfan, machane gguy riy gubin ban’en. Rayag ni yim’ be’ nib manigil me par be’ nib fos, ni yug aram rogon ni be’ nib kireb.

Jeremiah 11:20

Ma aram mu gu meybil ni lungug, “SOMOL ni Gubin ma Rayag Rok, I gur ba tapufthin nib mat’aw; ga ma sikengnag gumircha’en nge lanyan’ e girdi’. Kug tay e oloboch rog ngalan pa’am; ere mu pageg nggu yaliyem ni ngam felbayen e pi girdi’ ney.”

Jeremiah 12:1

“SOMOL, fa’an gu ra tugthinnag e re pa’ i oloboch rog ney ngom, mra m’ug ni gur e ba sorom. Chiney e thingar gu fith ngom murung’agen e tin nib mat’aw. Mangfan ni pi’in kireb e ba yo’or ban’en rorad? Mangfan ni pi’in nde yul’yul’ e yad ba fla’ab?

Ezekiel 18:25

“Machane bayi lungumed, ‘N’en ni be rin’ SOMOL e de mat’aw.’ Gimed piyu Israel, mu telmed ngog. Mogned, gimed be finey ni rogon ni gu be rin’ e tin ni gu be rin’ e de mat’aw? Rogon ni gimed be rin’ ban’en e de mat’aw.

Malaki 3:18

Girdi’ rog e bay kur guyed bayay e n’en nib thil u thilin e pi’in yad mmat’aw nge pi’in yad be ngongliy e kireb, ngu thilin e en ni be pigpig ngog nge en nder pigpig ngog.”

Numbers 16:22

Machane me ragbug Moses nge Aron nga but’ nge math peri’ row ko but’ me lungurow, “Got, I gur e ga ma pi’ e yafos. Ere mog, nap’an nra denen ta’abe’ ma aram e ngam damumuw ngak urngin e girdi’ u lan fare binaw ni ga’ngin?”

2 Korinth 5:10

Ya gadad gubin ma ri gadad ra yan nga p’eowchen Kristus nge mang ir e duwgiliy e n’en ni nge be’ min rin’ ngak, ni fan e nge be’ min pi’ ngak e n’en ni bay rogon ni ngan pi’ ngak, ni be yan u rogon e tin ni i rin’ ni bfel’ ara kireb u nap’an ni immoy u lan e dowef rok ko biney e tamilang.

Deuteronomy 1:16

“Ngiyal’ nem e gu fonow nagrad ni lungug, ‘Mmotoyilgad ko yu pa’ i oloboch ni be yib u fithik’ e girdi’ romed. Mi gimed pithig gubin e yu pa’ i oloboch nir ni ta’reb rogon, ndemturug ko oloboch u thilin e girdi’ romed, fa milekag ni yad be par u fithik’med.

Deuteronomy 1:17

Dab um laniyan’gad ngak boch e girdi’ ko tin gimed be turguy; mu turguyed e kireb rok e girdi’ ni ta’reb rogon, ni demturug ko ir mini’. Dab mu rusgad ngak be’, ya rogon ni gimed ra turguy ban’en e ke yib rok Got. Ma fa’anra bay reb e yu pa’ i oloboch ney ni kay gi momaw’ ngomed mi gimed fek i yib ngog, mug turguy e n’en ni ngan rin’ ngay.’

Deuteronomy 32:4

“I SOMOL e ba gel ma bay i par ni manaf romed, ir e ba yal’uw ma bmat’aw urngin e tin ma rin’. Got romed e ba yul’yul’ ma der ma ban, ngongolen e bfel’ ma ba yal’uw.

Hebrews 12:23

Kambad ko fare mu’ulung ni yibe felfelan’ riy, ni mu’ulung rok e tin ni nganni’ u pifak Got, ni kan yoloy fithingrad u tharmiy. Kambad ngak Got, ni ir e tapufthin rok e girdi’ ni urngin, nge pi’in yad bmat’aw ni kan ngong liyrad kar fel’gad ni yad bay u tharmiy.

Judges 11:27

Danga’, dawor gu rin’ ban’en nib kireb ngom. I gur e ga be rin’ e kireb ni ga be m’ag e mael ngog. I SOMOL e ir e nge duwgiliy. Daba’ e bayi turguy ko piyu Israel fa piyu Ammon.”