1 Samuel 18:1 - Bible Ni Thothup

¹ Tomuren nike mu’ Saul nge David ko welthin, ma ri adag Jonathan ni fak Saul daken David nge yan i par ni kari t’uf rok ni bod rogon feni t’uf rok ir.

1 Samuel 18:1 Σταυροειδείς Αναφορές

Genesis 44:30

“Ere gu ra sul ngak e chitamag ni de moy e re pagel ney rog, ma nap’an ni yugra guyeg ni de moy rog, me yim’. Ya ke par ni re pagel ney e ke pagan’ ngak. Ere gamad ra k’aring e kireban’ ngak e chitamangimad ko binem e yangar nike taw ngay mra yim’.

2 Samuel 1:26

“Jonathan ni walageg, ke kireban’ug ngom; ya ri gab t’uf rog! Rogon ni ug par ni gub t’uf rom e rib fel’, kab gel nga rogon nib t’uf e pumo’on rok e ppin.”

1 Kronicles 12:17

Me yan David ni nge mada’ nagrad me ga’ar, “Fa’anra gimed be yib ni fager ni ngam ayuwegedgag, me ere mired e ngaray. Mu’uned ngomad! Machane fa’anra kambad ni gimed be leamnag ni ngam yag nigedgag nga pa’ e pi to’ogor rog, ni yug aray rogon ndawor gu rin’ ban’en ni nggu gafgow nagmed, ma fare Got rok e pi chitamngidad e bayi nang nge gechig nagmed.”

Psalms 86:11

SOMOL, mu fil ngog ko mang e ga ba’adag ni nggu rin’, ma bay ug fol rom u fithik’ e yul’yul’; mu fil ngog rogon ni nggu pigpig ngom u polo’ i lanin’ug.

Proverbs 18:24

Boch e pi tafager e der ma par thilrad ni bfel’ nib n’uw nap’an, ma boch e pi tafager e ka ba gel farad yul’yul’ ngak e walag.

Deuteronomy 13:6

“I mus ngak walagmed ni pumo’on, fa fakmed ni pumo’on fa bpin, fa le’engimed nib t’uf romed, fa fager romed nri gimed ba pach e rayag ni nge liyabnag nge pi’ lanin’med ngam ted fan yugu boch e got, ni bogi kan ni gimed nge pi chitamangimed ni kakrom e dariy bigimed ni ka e tay fan.

Kolose 2:2

Gu be rin’ ni aray rogon ni bochan e nge athamgil lanin’rad miyad chichir nga ta’bang u fithik’ e t’ufeg rorad ngorad, me ri pagan’rad ko tin kar nanged fan ni ir e ba riyul’. Ma aram miyad nang e tin rib fel’ ni kem’ay i leamnag rok Got, ni er Kristus.

Judges 20:11

Are urngin fapi pumo’on nu Israel nra mu’ulunggad ni bochan ta’ab n’en — ngar chamgad ko fachi binaw.

1 Samuel 14:45

Machane me ga’ar fapi girdi’ ngak Saul, “Mog, i Jonathan nike ayuweg piyu Israel kar gelgad ko re mael ney e ngan li’ ngem’? Dangay! Kug micheged nga fithingan SOMOL ni be par nib fos ni mus nga ta’ab gaf i piyan lolugen ma dabi mul. Ya n’en ni rin’ e daba’ e Got e ayuweg nge rin’.” Aram rogon ni ayuweg e girdi’ Jonathan nge dakun thang e fan rok.

1 Samuel 18:3

Me m’ag Jonathan e fager ngak David ni ngar pirew ndariy e rofen ni nge kireb thilrow, ni bochan e rib t’uf David rok.

1 Samuel 19:1

Me weliy Saul ngak Jonathan ni fak nge urngin e pi tolang ko salthaw rok nike m’ay i leamnag rok ni nge li’ David. Machane Jonathan e rib t’uf David,

1 Samuel 19:2

ma aram me cheal nge weliy ngak David ni ga’ar, “Chitamag e be guy rogon ni nge thang e pogofan rom. Ere wenig ngom, mu ayuw gabul ni kadbul; mu guy rogon ngam man mmith ngabang ma ga par riy.

1 Samuel 20:17

Ku irera’ bayay ni wenig Jonathan ngak David ni nge micheg ngak ni ngi i par David nib t’uf Jonathan rok, ni bochan e Jonathan e ba t’uf David rok ni bod feni t’uf ir rok.

1 Samuel 20:8

Wenig ngom, mu ayuwegneg ko re bugithin ney, ma ga tay nga tagil’ fare bugithin ni mog ngog ni mmicheg u p’eowchen SOMOL. Ma fa’anra gag e kug bucheg ban’en, me gur e ngam li’eg nggum’! Ya dariy fan ni ngam pi’eg nga pa’ e chitamam nge mang ir e li’eg.”

1 Samuel 22:8

Ireyer fan ni gimed be makath nib togopluw ngog? Dariy ta’ab gimed nike yog ngog nre mo’on ni fakag ney e ke fal’eg ba tha’ u thilrow David. Dariy be’ ni be leam nigeg fa yog ngog ni David ni reb i girdi’en e salthaw rog, e be tay thapag e chiney ni nge li’eg nggum’, ma be’ ni pumo’on ni fakag e be pi’ e athamgil nga laniyan’!”

1 Samuel 23:18

Miyow michmich u mit Got ni ngar pirew ni yow fager. Me par David u Horesh, me yan Jonathan nga tafen.