YUNUS 4:8 - Susula Malalaok Hehelu Palak Ma Hehelu Beuk

⁸ Le'do tii boema, Manetualain fe ani mato'bik-ka neme dulu mai. Isabai-na Yunus sapala'o, nanahu le'do haan-na la'en, de langan-na nono'ka bai nanahotuk-ka. Boema ketu namahehenan-na, de nahiik mate leona. Nafa'da nae, “Malole lenak au mate, neme au aso'da!”

YUNUS 4:8 Σταυροειδείς Αναφορές

KEJADIAN 41:6

Basa boema gandum fe'ek pulek hitu moli boe, nalak mesa-mesan ma lamatuu nanahu anin moo maloa.

1RAJA-RAJA 19:4

boema ana la'o eik faik esa dalen-na leo moo solokaek ka neu, de ana hahae neme ai matuaina esa huun-na. Ana nangatuuk neu ndia de nahiik fo ela ana mate leona. Nafa'da Manetualain nae, “Au ta akatatakak seluk so'on Manetualain. Ho'i ma au hahae nga leona. Au ta malole lena neme au bei-ba'i kaing-ngala mai fa!”

1RAJA-RAJA 21:4

Ahab fali ne'un no dalen-na ta tesapopo-tama ma nasak nanahu namanene hata fo Nabot nafa'da neun, boema nangape'uk neu pepe'un lain ma ta nau na'a fa.

AYUB 2:10

Ayub nataa nae, “O kokolak sama leo hataholi nggoak-ka kokolan-na! Masa bole, ita nau sipo ka'da hata, fo malole neme Manetualain mai, te hata fo ta malole-a, ita ta nau sipo fan?” Da'di, leomae Ayub hapu basa susa-soe sila-la lala'en-na, tehu ana ta kokolak dede'a-kokolak fo la'ban Manetualain fa.

AYUB 7:15

Nalosa, au ahiik anseli, hataholi ki'du au botoliing-nga, fo mate au, neme au aso'da nai aopaak, fo henuk no doidosok ia.

MAZMUR 121:6

Neukose, o ta mamahe'di-mapalau, hu kande le'do mahaak-ka nai fai lele'don-na, do bulak-ka sa'an-na, nai fai le'odaen-na.

MAZMUR 39:9

Po'i au neme basa au sala-singong-ngala mai, boso po'ilotak hataholi nggoak-ka, hakinonoli au.

PENGKHOTBAH 7:9

Boso haelai mamanasa; ka'da hataholi nggoak kande nape'da dalek.

KIDUNG AGUNG 1:6

Boso taoafik neu au lou nggeong-nga, nana au ahoi le'do mahaak. Au ka'ang-ngala lamanasa au, de ladenu au aue-ale'di nai osi angol dale; de au ta hapu loak painote au aoinang-nga fa.

YESAYA 49:10

Neukose ala ta maa ma'da, do lamala'a fa, ma neukose, le'do mahaak-ka, ta la'e fas, nai moo solokaek-ka fa. Nana Au, fo manasue-lai sila, neukose hela-noles, ma hela-noles leo oemata-la leu.

YESKIAL 19:12

Tehu hataholi ba'unasa-la, ala fe'ahenin, basa boema, ala tapan neu dae lain. Ani timu-a ana mai, boema ana tao-na boa momo'don-nala, lamatuu. La'di ndanan-nala, de lamatuu, boema ala hotuhenin.

HOSEA 13:15

Leomae Israel tetu-temak sama leo na'u manaeloakak-ka, tehu neukose Au haitua ani timu mato'bik-ka mai neme moo solokaek-ka mai. Neukose anin ndia, ana tao nama'da basa oemata lala'en-na, ma oedolu-la, nalosa basa hata kabelik lala'en-na mopok-kasa.

IMAMAT 10:3

Boema Musa nafa'da Harun nae, “Manetualain dale dodoon-na nde ndia, nai lelek nafa'da nae, ‘Basa manamalalau-maoono Au-a, muse fe ha'da-holomata neu Au malalao-malalafung. Neukose, Au atu'du Au matua-mademang neu basa Au leoinang-nga lala'en-na.’ ” Tehu, Harun ka'da denge-denge.

YUNUS 1:17

Ndia te, Manetualain nadenu i'a matuaina esa ko'don-na Yunus. Boema Yunus leo nai i'ak ndia tein dale, lele'dok 3 le'odaek 3.

YUNUS 1:4

Yunus kona leo ofak-ka teioen dale neu, de nangape'uk neu ndia, boema ana sungu namanee. Basa boema, Manetualain fe ani-sangu da'di nai tasi lai, boema lii matuaina da'dileona, de ana fepa ofak ndia, nalosa isabai-na ofak-ka nakalulutuk. Basa ofa isi-la bii lanseli, de ala nggasi loke tutulu-fafalik neme sila esa-esak lamatua daebafan-na mai. Fo sue kande ofak-ka boso hala, de ala tu'u heni ofak ndia bua-lo'an leo tasi dale neu.

YUNUS 4:3

Besak ia, ou Manetualain, nemen-na fo au mate leona, nana malole lenak au mate neme au aso'da.”

YUNUS 4:9

Tehu Manetualain nafa'dan nae, “Ta nandaa, o dale he'di leondiak hu ka nde aiana ndia mamaten-na fa!” Boema, Yunus nataa nae, “Tao leo bee de, ta? Ndandaan-na, au amanasa anseli losa mate dei.”

MATEOS 20:12

‘Hataholi mana masok makabui kala laue-lale'di ka'da li'u esa mesa kana. Te ami maue-male'di fai katemak esa, nai le'do mahaak ndia boe na, tuan bae ami, sama leo sila boe!’

NINITAK 3:19

Hataholi fo Au sue-lai kala, sila nde Au ka'is ma Au filu kasa. Hu ndia de ela leo bee na, emi manggate ma tukatei-saledale neme emi sala-singo mala mai.

NINITAK 7:16

Neukose ala ta lame'da lamala'a so'on, do maa ma'da. Le'do, do le'dohaa ka boeo, neukose ta nahoi hataholi sila la so'on.

SEMUEL SUSULAK-KA ESAN-NA 3:18

Boema Semuel nafa'da la'iesak-kana neu Eli. Ta nafuni dede'ak de'ek esa boen. Basa boema Eli nafa'da nae, “Manetualain nde ndia, de nemen-na, fo Ana tao hata fo Ana meten malole.”