NINITAK 11:13 - Susula Malalaok Hehelu Palak Ma Hehelu Beuk

¹³ Boema nai lelek ndia, dae manggengo matuaina ana da'di. Kota ndia baba'ek esa neme baba'ek sanahulu nakalulutuk, de mate hataholi lifun hitu hu ka nde dae manggengok ndia. Hataholi fe'e kala bii lanseli, boema ala koa-kio Manetualain manai nusa so'da ka, matua-mademan.

NINITAK 11:13 Σταυροειδείς Αναφορές

KEJADIAN 6:4

Nai tepo-lelek ndia, ma tepo-lelek maneuk-ka boe, hapu hataholi ao matua ma mademaina, nai daebafak-ka. Hataholi sila-la tititi-nonosik neme hataholi daebafak-kala, anafe'oanan-nala mai, fo ala saoana loo Manetualain anan-nala. Hataholi ao matua ma mademaina sila-la nde been-na palani ta'ti batu-la nanseli, ma hataholi nananita-nalelak nai tepo-lelek makahulun eli.

YESAYA 29:6

Manetualain Fo Manakoasa, neukose soi-po'i kota ndia nenik ani matuaina ma daebafak-ka nanggengo matuainan-nanseli. Neukose Ana fe sangu, ma ha'i-a mai, fo na'a-henin.

YEREMIA 13:16

Emi muse mamatua-mamadema emi Amam Manetualain-na, te ana beita fe makahatuk-ka mai fa, emi eim-ma makatunun nai letelepak-ka, te mangale'dok fo emi mamahehenak-ka beita tao nasafali fan da'dik makiu-makahatuk fa.

MALEAKHI 2:2

Fe ha'da-holomata neu Au nenik emi tatao-nono'im. Metema emi ta nau mamanene Au dede'a-kokolang fa soona, neukose Au soo-supa emi. Emi sipo basa baba'e-papalak-kala, neukose nasafali da'di soo-supak. Tete'ek-ka, Au soo-supa basa hata malole sila-la so, nanahu emi ta tao taoafik neu Au paletang-nga fa.

YOHANIS 9:24

Boema lalo seluk hataholi fo besa ka nita ndia de lafa'dan lae, “Supa-soo leona mae, o mafa'da tunga ndo na. Te ami bubuluk hataholi mana makahahaik o ndia, hataholi masala-masingok ndia.”

HATAHOLI 1:15

Faik esa, fo nai lelek lakabubua – fafa'kama hapu hataholi natun esa duahulu lai ndia – Boema Petrus fo'a napadeik de ana kokolak nae,

YOSUA 7:19

Yosua nafa'da Akhan nae, “Anang-ngonei, makaheik, fo mafa'da no mangale'dok nai ia, nai Manetualain fo Israel Manetualain-na matan, o taon beek so. Mafa'dan neu au, fo boso mafunin.”

NINITAK 11:11

Basa faik telu seselik boema, ani hahae ka neme Manetualain mai de ana masok seluk leo nabi kaduak sila la dalek neu. Boema ala fo'a lapadeik de nalosa basa hataholi manita sala, ala bii lanseli.

NINITAK 11:19

Boema Manetualain Uman manai nusa so'da ka natahuka, de Peti Hehelu Balataa ka nananitak nai dalek. Boema ndela sa tuti-nato, ma ta'ta sa nata'ta nakadedelek, boema dae manggengo ka ma u'da eis matuaina.

NINITAK 14:7

Ata nusa so'dak ndia nalo bou-bou napane'e nae, “Bii neu Manetualain leona, ma koa-kio matua-mademan! Nana fai na losa soaneu Manetualain naketu-nala'di hataholi daebafa ka so. Sene-do'ok neu Ndia fo mana makadada'dik lalai a, daebafa ka, tasi a ma basa oemata lala'ena!”

NINITAK 15:4

See ka nde ta bii neu O fa Lamatuak? See ka nde ta nau tui-benga O matua-mademan fa? Ka'da O mesa ma nde malalaok. Basa leoina lala'ena neukose ala mai sene-do'ok neu O, nanahu O tatao-nono'im tunga matetu na, basa hataholi la litan so.”

NINITAK 19:7

Mai Leona, fo ata tamahoko-setelee, mai fo ata koa-kio matua-mademan! Nana fai na losa so ba'eneu Bi'ilopo Ana ka'bing no penganten ina ka, ma penganten ina ka boeo naheheleaon basa soaneu ana ka'bing non so.

NINITAK 3:4

Tehu hataholi de'ubee nai emi dalek lai Sardis, bei laso'da malalaok lahele da'dileo hataholi Salani ka. Mahani te neukose hataholi sila la pake bua-lo'a fulak fo ala la'ok sama-sama lo Au, nanahu sila landaa soaneu dede'ak ndia.

NINITAK 6:12

Boema au ita Bi'ilopo Ana ndia siiba'e segel kane. Dae maggengo matuaina ana da'di. Le'do da'di nggeok sama leo tema nggeo abasela, ma bula ka da'di pilas sama leo daa ka.

NINITAK 8:5

Basa boema, ata nusa so'dak ndia ho'i na mango tutunu boominik ndia de, ana ho'i ha'i manai mei tutunu-hohotuk ndia lai na de, ana taon leo dalek neu, boema ana tapan leo daebafa ka neu. Tutika ta'ta sa boeo nata'ta lain, ma ndela sa tuti-nato, boema dae manggengo ka da'di.

SEMUEL SUSULAK-KA ESAN-NA 6:5

Da'di, emi muse nana dulak neme peta-paek ma lafo fo nanataok neme lilopilas, manatao nalutu emi nusam-ma. No enok ndia, emi fe ha'da-holomata neu Israel Manetualain-na. Fafa'kama, neukose Ana hahae huku emi, ma emi lamatua daebafam-mala boema emi daem-ma.