Atam-ma teun faluhulu so, de ta hapu hata esa boen, bisa neni fe atam-ma namahokok so'on. Atam-ma, na'a-ninu nana'a-nininuk-kala, ta hapu la'dan-na so'on, ma atam-ma ta hapu namanene hataholi-la lakamee so'on. Neukose, atam-ma ka'da neni lelepa mabela fe Ama Manek.
Ami faim maso'dam-ma losa ka'da teuk hituhulu, metema ami balakaik-ka soona, losa teuk faluhulu. Tehu ami hapuk-ka, nde ka'da toto'a-tataak ma doidosok-ka; basa ami maso'da keke'uanam-ma soona, ami sapu-lalo.
Emi Manetualaim Au nahele, losa emi mamalasi; ma Au anea ahele emi losa emi langam-ma mofa. Au akadada'dik emi, de Au akaboboi ahele emi, neukose Au tulu-fali ma soi-tefa emi.
Hu ndia de, au lu'a-lepa basa doidosok ia la, tehu au amahele ahele, nanahu au bubuluk te'e-te'e, see hataholi fo au amahelek ndia. Au amahele, hata fo Ana fe basan neu au ndia, nanea nabe'in, losa Fai Mate'e ka.
Memak neukose Lamatua ka soi-po'i au eme hataholi mana mape'da dale mangalauk lo au a. Neukose no falik au no so'dak, leo nusa so'da ka neu. Ela leo bee na Lamatua ka nananamatutua-namadedemak losa dodoo na! Amin.