SEMUEL SUSULAK-KA ESAN-NA 4:12 - Susula Malalaok Hehelu Palak Ma Hehelu Beuk

¹² Hataholi esa neme leo Benyamin-na mai, nalai neme natee-natatik dale mai, de neu leo Silo neu, boema ana losa faik ndia boe. Ana sii-sii lulu'i bua papaken-na, ma ana tao dae neu langan lain, fo da'di ta'du-tana manasusak.

SEMUEL SUSULAK-KA ESAN-NA 4:12 Σταυροειδείς Αναφορές

2 SEMUEL 1:2

Balahaa boema, ta'eanak esa, ana mai neme Saul mamana ofun-na mai. Ana siba'e bua papaken-na, ma ana tao dae leo langan lain neu, fo da'di leo ta'du-tana manasusak. Neu leo Dauk neu, de ana senek neu Dauk matan-na.

2 SEMUEL 13:19

Boema, Tamar tao afu neu langan lain, ana siiba'e ba'du manalun-na, de ana la'o no ana ko'o ketu mata-panan nenik liman duas, ma ana kii noi-noi.

2 SEMUEL 15:32

Nai lelek Dauk losa pupukuk lain, nai mamanak fo hataholi-a biasa sene-do'ok neu Manetualain boema, tia-lain manalilinekan fo nde Husai, hataholi Arki ndia, sipok-kana. Husai siba'e bua papaken-na, ma ana nggali afu leo langan lain neu.

NEHEMIA 9:1

Nai bulak ndia fain duahulu haa boe, laun Israel-la lakabubua. Ala okaaon-nala fo latu'du lae sila sale-dale neu sila sala-singon-nala. Ala ta lakabubua loo basa hataholi nusa dea-la fa. Ala pake lafa kalong ma ala nggali dae neu langan-nala lain, fo da'dileo ta'du-tana dale he'dik. Basa boema, ala fo'a lapadeik fo ala manaku basa sila sala-singon lala'en-na, ma sila bei-ba'i kain-nala sala-singon.

AYUB 2:12

Tehu lelek bei lai dook-ka, te lakanae litan so, tehu hihii lae, ta lalelak-kana so'on. Boema, ala kii, de ala dola heni halan-nala, ma ala sii-sii lulu'i bua papaken-nala, boema ala nggali afu leo lain neu, ma leo langan-nala lain neu.

YEREMIA 26:6

Metema emi malanga batu mahele soona, uma mamasok ia neukose Au taon sama leo Silo, de nalosa basa leoina manai daebafak-ka pake kota Yerusalem ia na'den-na da'di leo soo-supak.”

YESKIAL 24:26

Nai faik fo, Au tao dede'ak ndia soona, neukose hataholi esa naso'da neme mamate-momopok ndia mai, de ana mai fo nanduku-nalosak halak ndia neu o.

YESKIAL 27:30

Ala kii-makaleleu o ua-nalem, ala haladoi ma ala makaleleu no dale he'dik nanseli. Ala nggali afu leo langan-nala lain neu, de ala lololi lai afu dale, da'di leo ta'du-tana susa.

YOSUA 7:6

Yosua ma basa hataholi Israel-la, mauli-malangan-nala, dalen-nala he'dis nanseli, nalosa ala sisii-lulu'i bua-lo'an, de lele'dok esa dalen-na, losa le'odae, ala sene-do'ok nai Manetualain Peti Hehelu-balataan matan-na, ma ala tao afu neu langan-nala lain, fo da'di leo ta'du-tana dale he'dik.