Juan 7:37 - Tachi Ak'õre Pedea

³⁷ Mãɨ arapaapataɨ ewari oo p'anɨne chi k'aadeapema ewari chi choma bɨt'a basima. Mãɨ ewaride Jesú bai nɨbeek'ari jĩk'ua pedeasima: —Chi abaɨ opisia bɨpɨra mɨmá chese, maapae pania chok'ae bapiparidepema tose.

Juan 7:37 Σταυροειδείς Αναφορές

Mateo 11:28

»Ãarea sẽ p'anɨpɨra, mɨmá chet'ɨ. Mɨa mãra ɨ̃apaapiipɨ.

Mateo 3:3

Mãɨ Juan k'orea Tachi Ak'õre pari pedeaparí Isaíapa jarasima: «Ẽpẽra ĩjũa pania newẽa bɨde jĩk'ua pedea bɨma: “O jarit'ɨ Tachi Chipari pia chemẽrá. O ichi pae jĩp'a jarit'ɨ”».

Mateo 5:6

Pia p'anɨma chi ãchi sõne jĩp'a oo k'ɨ̃ria p'anɨrã, mãɨ ãchia k'ɨ̃ria be Tachi Ak'õrepa teai pẽra.

Juan 1:23

Mãɨne Juanpa p'anoosima: —Tachi Ak'õre pari pedeaparí Isaíapa nãɨya jarasima: “Ĩjũa pania newẽa bɨde abaɨpa nãɨya jĩk'ua pedea bɨma: Tachi Chipari o jĩp'a jarit'ɨ”. Mɨ mãɨ ẽpẽrapɨ.

Juan 14:6

Mãɨne Jesupa jarasima: —Mãɨ o mɨpɨ. Mɨnepa Tachi Ak'õre piarã k'awa p'anɨma mãɨnepa chok'ae bai uru p'anɨma. Mɨnepa wãnaepɨra aba pida mɨ Ak'õremá p'ue chedaiwẽma.

Juan 4:10

Jesupa p'anoosima: —Tachi Ak'õrepa teai bɨt'a pɨa k'awarupara mãɨnepa k'aipa jãɨ pania idi bɨt'a k'awarupara, pɨa mɨá pania idii pasima. Maapae mɨa chi chok'ae bapiparí pania teai pasima.

Juan 4:11

Wẽrapa jarasima: —Pɨa ¿k'ãrepa pania joeima? Nãɨ yooro k'orodade pania joe ũu bɨt'a eudu bɨma. Mãɨ chok'ae bapiparí pania ¿pɨa sãma joeima?

Juan 4:14

Maamina chi mɨa tea bɨ pania torut'a waa opisia baiwẽma. Chi mɨa tea bɨ pania ichide ewaricha wea baipɨ mãɨnepa Tachi Ak'õre ome ewaricha ichi chok'ae baipɨ.

Juan 5:40

Maamina mãra mɨmá chedai k'ɨ̃rianak'ama, mɨa mãra chok'ae p'anapimẽrá.

Juan 6:35

Jesupa jarasima: —Mãɨ Mɨpɨ. Mɨ mãɨ chok'ae bapiparí p'anapɨ. Mãɨpuru chi mɨmá cheru waa jarrapisia baiwẽma mãɨnepa chi mɨne ĩjãa bɨt'a waa opisia baiwẽma.

Juan 6:37

Chi mɨ Ak'õrepa mɨá tea bɨ ẽpẽerã mɨmá chedaipɨ; mãɨrã ãyá jeret'aiwẽma.

Juan 7:28

Mãɨne Jesupa Tachi Ak'õre te tuda jaratea bɨde jĩk'ua jarasima: —Piarã mãrapa mɨ unupatama mãɨnepa sãmapemat'a k'awa p'anɨma. Maamina mɨ ara mɨchidepa chewẽa bɨma, mãɨpari mɨ chi piarã jaraparipa mɨ peesima. Mãrapa ichi k'awadawẽa p'anɨma.

1 Corintio 10:21

Chi jaore mietaarã́ teada pasudepema mãrapa todaipɨra, chi Jesucristo oa k'ɨ̃risiadai k'orea pasudepema todaiwẽa p'anɨma. Chi jaore mietaarã́ chik'o teadadepema mãrapa k'odaipɨra, chi Tachi Chipari k'ɨ̃risiadai k'orea k'opataɨ k'odaiwẽa p'anɨma.

1 Corintio 10:4

Jõmãɨrãpa abarik'a pania Tachi Ak'õrepa p'ẽyanepa weapida topachidama. Mãɨ p'ẽya Cristo jara k'ɨ̃ria bɨma, ãchi wãutacha Cristo jaoredepa ãchi ome bada pẽra.

1 Corintio 11:25

Ara mãɨ jĩra nek'odak'ari chi pasu juade jitak'ari jarasima: «Nãɨ pasude eda bɨt'a mɨ oapɨ. Mɨ oadepa Tachi Ak'õrepa mãra ome pedea chiwidi bɨruma. Nãɨ toutacha mɨ k'ɨ̃risiadai k'orea to p'anapariet'ɨ».

1 Corintio 12:13

Chi eda tachidiidepemarã tachi judiorãpɨ, chi eda tachidiidepemarã judiorãwẽpɨ, chi eda tachidiidepemarã chi chipari pae pari mimiapataɨrãpɨ, chi eda tachidiidepemarã chi chipari pae pari mimiapataɨrãwẽpɨ. Maamina chi ara Tachi Ak'õre Jaore aba bɨpa tachi jõmãɨrã k'ak'ua aba bɨde bɨsima. Jõma tachia chi Jaore abarik'a bɨ jitasidama.

Ep'esio 5:18

It'uapa piu niparãt'ɨ. Mãɨpa nemietá atepe oopiparima. Piu nipadai k'aepẽra Tachi Ak'õre Jaoredepa p'anat'ɨ.

Apocalipsi 21:6

Ichiaba ichia mɨá nãɨya jarasima: «Mɨa ooi badat'a jõma oosima. Mɨ chi Alp'apɨ mãɨnepa chi Omegapɨ. Mãɨpa jara bɨma mɨ chi Naapemapɨ mãɨnepa chi K'aadeapemapɨ. Paritua opisia bɨpɨra, mɨa pania wea bɨt'a pari topiipɨ. Mãɨ paniapa tachi chok'ae p'anapiparima.

Apocalipsi 22:1

Mãɨya nak'ari Tachi Ak'õrepa ɨt'aripa peedapa to p'ap'ãrá bɨt'a mɨá unupisima. Tot'á basima vidrio jĩra. Mãɨ paniapa tachi chok'ae p'anapiparima. Tachi Ak'õre mãɨnepa chi Oveja Chak'e suak'a beeparí auk'ará bɨdepa mãɨ to p'uurudepema o jet'ea bɨ esa wea bɨma. To ik'idacha pak'uru nejõ tachi chok'ae p'anapiparí basima. Mãɨ pak'uru jedek'ocha chaupari pẽra, ãyone bari k'ak'o doce teaparima. Chi k'irú nẽará jĩra bɨma, tuachadepemarã k'ak'ua pia p'ananamẽrá.

Apocalipsi 22:17

Tachi Ak'õre Jaorepa mãɨnepa chi Oveja Chak'e k'ima atai bɨ pida nãɨya jara p'anɨma: «¡Chese!» Chi mãɨ ũri bɨpa jarai bɨma: «¡Chese!» Chi opisia bɨ chei bɨma, chi pania tachi chok'ae p'anapiparí tomẽrá. Chi mãɨ pania to k'ɨ̃ria bɨpa pari toi bɨma.