1 Juan 2:1 - Tachi Ak'õre Pedea

¹ Ũpẽarã, mãra mɨ warrarã jĩra p'anɨma. Mɨa mãɨ bɨruma mãrá nemietá oopidaemaapa. Maamina ẽpẽra abapa nemietá ooipɨra, aba uru p'anɨma Tachi Pajãnepema Ak'õrea tachi k'orea chichupuria idimẽrá. Mãɨ chichupuria idiparí Jesucristopɨ. Ne ãareaɨne jĩp'a ooparima.

1 Juan 2:1 Σταυροειδείς Αναφορές

Luca 10:22

»Mɨ Ak'õrepa mɨá ara ichidepema ne ãarea k'awapisima. Abaɨ pida atua p'anɨma mɨ, chi Warra sãmaasã́ bɨ; aba mɨ Ak'õrepuru mãɨ k'awa bɨma. Ara mãɨ jĩra abaɨ pida atua p'anɨma mɨ Ak'õre sãmaasã́ bɨ; abapuru mɨ, chi Warrapuru mãɨ k'awa bɨma. Mɨa abaɨa mɨ Ak'õre k'awapisira, mãɨ ẽpẽra pida k'awaipɨ».

Juan 10:15

Ara mãɨ jĩra mɨ Ak'õrepa mɨ k'awa bɨma mãɨnepa mɨa mɨ Ak'õre k'awa bɨma. Mɨ mɨchi oveja k'orea piui bɨma.

Juan 13:33

Mãra mɨ warrarã pẽra mɨa jararuma: mɨ mãra ome tãaraa baiwẽma. Mɨa judiorã chi mãɨrã chaarearã́ jarada jĩra nãɨyana mãrá jararuma: mãrapa mɨ jɨrɨdaipɨ, maamina mɨ wãrumá p'ue wãnaiwẽma.

Juan 14:16

Mãɨpuru mɨ Ak'õrea ɨt'aa chiidiipɨ mãra K'aripaparí peemẽrá. Mãɨ mãra ome ewaricha baipɨ.

Juan 14:6

Mãɨne Jesupa jarasima: —Mãɨ o mɨpɨ. Mɨnepa Tachi Ak'õre piarã k'awa p'anɨma mãɨnepa chok'ae bai uru p'anɨma. Mɨnepa wãnaepɨra aba pida mɨ Ak'õremá p'ue chedaiwẽma.

Juan 21:5

Mãɨya bɨde Jesupa ãchiá idisima: —Ũpẽarã, ¿beta jitasidak'ãra? Ãchia p'anoosidama: —Jitadawẽma.

Juan 5:14

Mãɨya nak'ari Jesupa ichi Tachi Ak'õre te eda unuside jarasima: —Ũrise: pɨ jɨpa beeda pẽra waa nemietá oorãse pɨ piawẽa bada k'aepẽra atepe wariara piawẽa beepiemaapa.

Juan 5:36

»Maamina Juanpa jarada k'aepẽra nãɨ mɨ k'orea pia pedea bɨma: Mɨ Ak'õrepa oopi bɨt'a mɨa ãarea oo bɨ pẽra k'awapi bɨma mɨ Ak'õrepa mɨ piarã peesit'a.

Juan 6:27

Mimiarãt'ɨ chik'o k'odai k'orea, mãɨ chik'o jõpari pẽra. Mãɨpari mimiat'ɨ chi Tachi Ak'õre ome ewaricha chok'ae bapiparí p'ana atadai k'orea. Mãɨ mɨ, chi Ẽpẽra Warrapa teaipɨ. Tachi Ak'õrepa mɨ mãɨ k'orea bɨsima.

Juan 8:11

Wẽrapa p'anoosima: —Aba pida, mɨ Chipari. Jesupa jarasima: —Mɨa pida pɨ nepɨra pará bɨade awẽma. Wãse, maamina waa nemietá oorãse.]

Hecho 7:52

Ãchia Tachi Ak'õre pari pedeapataɨrã ãarea mĩapisidama. Chi Ẽpẽra Jĩp'a Bɨ chei k'orea jaradada sida peapachidama. Ara mãɨ jĩra mãrapa mãɨ Ẽpẽra Jĩp'a Bɨ jitadak'ari peasidama.

Romano 5:10

Tachi wapida Tachi Ak'õre ome chi nek'ĩramá p'anasidaɨde ichi Warra piudadepa tachi ichi ome sõpia bɨsima. Mãɨya tachi piarã k'aripaipɨ Cristo chok'ae bɨ pẽra.

Romano 6:15

¿Mãɨnepema sãmaasã́ k'ɨ̃risia p'anɨma? Tachi Ak'õrepa ichi sõpiadepa tachi k'aripada pẽra mãɨnepa tachi Moisepa bɨdadepa p'anɨwẽ pẽra ¿nemietá oodai p'anɨk'ãra? ¡Mãɨyawẽma!

Romano 8:34

¿K'aipa tachi nepɨra pará p'anɨane aima? Abaɨ pida mãɨya jaraiwẽma Jesucristo tachi k'orea piuda pẽra. Ichi piu bada chok'ae p'irabarisima. Naapae Tachi Ak'õre juaraari bɨma. Mãma tachi k'orea Tachi Ak'õrea chichupuria idi bɨma.

1 Corintio 15:34

Jĩp'a k'ɨ̃risiat'ɨ. Nemietá waa oorãt'ɨ. Chi eda mãranepemarãpa Tachi Ak'õre atua p'anɨma. Mãɨ k'orea mãra p'eradai p'anɨma.

2 Corintio 5:21

Cristopa nemietá ook'a pasima. Maamina tachi k'orea Tachi Ak'õrepa ichi nemietá ooparí jĩra unusima. Mãɨya Cristodepa Tachi Ak'õre jĩp'a bɨt'a waapẽarã́ p'ue unupipatama.

Gálata 4:19

Ũpẽarã, mãra mɨ warrarã jĩra p'anɨpɨ. Mɨ mãicha mãra k'orea minachia mĩa bɨma wẽra warra t'õrune p'ua bɨ jĩra. Mɨ mãɨya minachia mĩa baipɨ aba mãra Cristo jĩra p'aneeutadea.

Ep'esio 2:18

Cristodepa tachi umeepa abarik'a tachi Pajãnepema Ak'õremá naa p'ue chedaipɨ, ichi Jaore aba bɨdepa.

Ep'esio 4:26

K'ĩruunaipɨra nemietá oorãt'ɨ. Mãra k'ĩruu p'anɨmisa chi k'ĩruuna ome sõpia pedeat'ɨ ewari k'iui naena.

1 Timoteo 2:5

Tachi Ak'õre abapuru bɨma. Mãɨnepa chi ẽpẽrarã nepɨra k'aripaparí, Tachi Ak'õre ẽpẽrarã ome, abapuru bɨma. Mãɨ ẽpẽra Jesucristopɨ.

1 Timoteo 3:14

Mɨ isapea pɨ ak'ɨde wã k'ɨ̃ria bɨma. Maamina mɨ tãaraai jĩra bɨma. Mãɨpuru nãɨ k'art'a pɨ pae bɨruma ẽpẽrarã Tachi Ak'õre chok'ae bɨderã sãmaasã́ ará p'ananai p'anɨ k'awadamẽrá. Tachia Tachi Ak'õre piarã pedeapataɨ te tĩitau jĩra bɨma mãɨnepa k'ɨda jĩra bɨma.

Hebreo 9:24

Cristo Tachi Ak'õre te ẽpẽerãpa oodaadade eda wãé pasima, mãɨ abapuru Tachi Ak'õre te chi piarã bɨt'a, ara pajãne bɨ jĩra bɨ pẽra. Cristo pajãne Tachi Ak'õre k'ĩrari wãsima, ichi oa ãrisidepa tachi k'orea ichiá k'ĩra chupuria idi bai k'orea.

Santiago 1:27

Chi piarã ĩjãa bɨpa nãɨya ooi bɨma Tachi Pajãnepema Ak'õrepa ichia oo bɨ pia unumẽrá mãɨnepa jĩp'a unumẽrá: jẽramãra warrarã mãɨnepa p'ẽtãarã minachia mĩa p'anɨrã k'aripai bɨma, mãɨnepa nãɨ ĩjũanepemarãpa nemietá oopataɨ jĩra ooiwẽa bɨma.

Santiago 3:9

Tachi k'ĩramepa Tachi Chiparia pia pedeapatama, mãɨnepa ara mãɨ k'ĩramepa ẽpẽrarã́ k'achia pedeapatama, Tachi Ak'õrepa ara ichi jĩra oodamina.

1 Pedro 2:22

Cristopa nemietá ook'a pasima mãɨnepa sea jarak'a pasima.

1 Pedro 3:18

Cristo jĩp'a bɨmina nemietá k'orea bari k'ak'o aba mĩasima. Mãɨpa tachi chi jĩp'a bewẽ Tachi Ak'õre ome pia bɨsima. Ichi nãɨ k'ak'ua piusima, maamina Tachi Ak'õre Jaoredepa chok'ae p'irabarisima.

1 Juan 3:18

Mɨ warrarã, tachi ũpẽarã k'ɨ̃rianai p'anɨma. Abapuru pedeadepa mãɨya oodaiwẽa p'anɨma, mãɨpari tachia oo p'anɨnepa piarã k'ɨ̃rianai p'anɨma.

1 Juan 3:5

Maamina mãrapa k'awa p'anɨma Jesucristo nãɨ ĩjũanea chesit'a tachi nemietá ãyá bɨi k'orea. Ichi mi ãpia pida nemietá newẽma.

1 Juan 3:7

Mɨ warrarã, abaɨa itu seapirãt'ɨ. Chi jĩp'a oo bɨ Tachi Ak'õre k'ĩrari jĩp'a bɨma Cristo jĩp'a bɨ jĩra.

1 Juan 4:4

Mɨ warrarã, mãra Tachi Ak'õrenepɨ. Mãrapa mãɨrã́ itu seapidaé pasima, chi mãra sõne bɨ chi nãɨ ĩjũane be k'aepẽra jua chaarea bɨ pẽra.

1 Juan 5:17

Jõma Tachi Ak'õre k'ĩrari piawẽa ooda nemietaapɨ. Maamina mãɨ awara nemietá bɨpɨ, chi mãɨpa tachi piupik'apɨ.

1 Juan 5:21

Mɨ warrarã, juapa oodada sãdo bede ĩjãarãt'ɨ.

3 Juan 1:4

Mɨ ũpẽarãpa chi piarãpẽa pedeade nina ũrirune mɨ minachia arapá baparima.