Veydipi 3:10 - Seysyo No Tao

¹⁰ Am ori o ko naknakman so ko kapakateneng ji Kizisto a kano arako a oyowyat na jyaken. Ta iya rana am tey mowyat, ta nimirwa a mavyay. Yako ikakza o ko kapacizanod jya so alalaw, akman sya ji rahet so kawakwak na.

Veydipi 3:10 Σταυροειδείς Αναφορές

Matay 20:23

Maniring jira si Yeso am, “Manoyong kahap nyo so alalaw ko. Am beken a yaken o mamnek do tao a omlisna do wanan ko a kado ozi ko a meypanirsirngen. Ta si Ama ta do to o mamnek do amlisna do dang.”

Yowani 10:18

Abo o tao a makapehes so inawan ko, ta yaken o yatomalamozong no kawakwak ko, kaji ko a wakwakan. Nakenakem ko kangay no inawan ko. To ko ngonongonongi o keypirwa ko a mavyay, ta nakenakem ni Ama o kahap ko so akman sang a vazay.”

Yowani 17:3

O to meyyonong a ikavyay no pahad da am ipakateneng da jimo a ney manoyong na Tao do to, a kapakateneng da ji Yeso Kizisto a nitovoy mo do karawan.

Loma 8:17

No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

Loma 8:29

Ta o nipamnekan na ni Ama ta do to a amraralay nya tao am to na ji ngamoga sira akman so Anak na si Yeso Kizisto apiya so ahahapan sya. So ikanoyong na ni Yeso a akmey rakeh na jyaten akmey meyketeketeh do cinai.

Loma 8:36

O aro a alalaw ta am akman so yadomket do Seysyo. Ta maniring am, “Anoyngan namen imo. Am ori o yanamen ipangday so araraw a yatoda jyangay so inawan. Yada yamen patpehen no tao do kagling a yaomanam a yada wakwaken.”

2 Kedinto 1:10

Na nipahawa yamen do yamakakaday a kanginanawan namen. So namen peyhanhanan ni Ama ta do to a somidong jyamen a mangay no makwa.

2 Kedinto 1:5

Tana arako alalaw a mai jyamen do kahap namen so vazay ni Kizisto am cyaha, ta ikarakorako no sidongan na jyamen ni Kizisto.

2 Kedinto 13:4

Tana yakmey yabo oyowyat na ni Kizisto do yada kanimapadket sya do jyojika am oyowyat na ni Ama ta do to o yanimapeyvangon sya. So namen ikakman sang akmey abo so oyowyat a yamacikaop ji Kizisto. Am no namen ioya inyo am oyowyat na ni Ama ta do to o namen pangozayan an.

Cyalatay 2:20

Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

Cyalatay 6:17

Inaoy si papwen da sicyaikwaya o kaji da rana zyakan nyaken a meylimwang no ciriciring na ni Yeso Kizisto. Ta o aro a kozad ko do kataotao ko am ori o yongkad ko a lamlamsoy ni Kizisto.

Ivoso 4:13

So ikamimin ta akmey yasa meyhanhan nya a makateneng ji Yeso a Anak na ni Ama ta do to a akmey makaveyvow a tao a makataptap rana so nanao ni Kizisto,

Veydipi 3:8

Beken a ori an. Ta yamaharahara rana o nakem ko ji Yeso Kizisto sicyararalay ko na nya. Yako ipanci o makakaday a vazay a yabwata so angangayan, do yako kapyapya pa so ko kapakateneng ji Kizisto a Panirsirngen ko.

Kelosi 1:24

Tana tey rako o alalaw ko sicyaikwaya am cyaha, ta o akman rana sang am ipakasidong ko jinyo a meypahagnat so nakenakem a omraralay ni Yeso. Am ori o ko isaray, ta ipakasidong ko so omraralay ni Yeso Kizisto a tao. Ta nimakman sang si Yeso Kizisto a nimawakwak no omraralay nya tao.

Kelosi 2:13

No kakwa pa am abo pa jinyo o to meyyonong a ikavyay no pahad nyo, do keyyan no raraten nyo a nimacisyay ji Ama ta do to. Am kanimapazanod na jinyo ji Kizisto a avyain ni Ama ta do to, do kanimvonas na rana so raraten ta ni Ama ta do to.

Kelosi 3:1

Inyo rana am kamo rana akmey nimacizanod ji Kizisto a nimirwa a mavyay. Am ori an, naknakman nyo kato nyo ngotokotan so onowned a omahap so apyahen na vazay ni Kizisto. Ta iya rana am yamyan do wanan na ni Ama ta do to.

1 Pite 1:3

Isaray takamo si Ama ta do to a Ama na ni Yeso Kizisto a Panirsirngen ta. Ta yatey rako o pangangasyan na a yanimanta nyaten so vayo a onowned ta, do yana kanimapeyvangon si Yeso Kizisto do heseb na. So anoyngan ta do akman sang a oyowyat ni Ama ta do to a mapeyvangon jyaten no makwa.

2 Pite 1:13

Do ko iyan pa do karawan am jyabo kapacimaza ko jinyo a vavagan a peyparakwen so nakenakem a.

1 Yowani 2:3

No si onotan ta o ciring na ni Ama ta do to am manoyong ta macikaop jya.

1 Yowani 2:5

Am o tao a mapeyvazay so ciring na ni Ama ta do to am manoyong ori a omraralay nya. So ipeyngongyod na rana a macikaop ji Ama ta do to.

Ipaziman 1:18

Yaken rana am to ko meyyonong a mavyay. Nimawakwak ko no kakwa. Am ko na mavyay sicyaikwaya a mangay do kaidan no karawan. Yaken rana am yatomalamozong no kawakwakan a kano yaomanam pa vazay ko do mawakwak a tao.