Kooloosi 2:9 - Gooti Toolluro Yogalokwono

⁹ Kuudo neya jaullulo. Gooti gavnokwe tool Krais su toolluro kulako tovi yiunokuudo kuullo'mowopiyodowodekono.

Kooloosi 2:9 Σταυροειδείς Αναφορές

Aisaiya 7:14

Toro te Gooti Yawel gavnokwe tool aro ikuduuwallodowo'jure tovi wonpinogaikikono. Abolo sujuraiyo puruv a'mwo pweke sumwonyo miyodubulo tov kwolaiyo sumwoluko imo'nonokwono. Toro imo'nowo'ji kwolaiyo somaro'ji toolluno yovo tov Imanyuuwelolo mullowaronokwono.

Matyuu 1:23

“Sujuraiyo puruv a'mwo pweke sumwonyo miyodo'bule kwolaiyo sumwoluko puruv imo'nonokwono. Kwolaiyo su toollu somaro'ji toga Imanyuuwelolo mullowaronekono. Yovo su tovino kavlo tov aro'mokwono. Gooti tool nevuge amwallo'mokwono.” Aguto toolluro proofet tool toro adokaikono.

Luuk 14:22

Toro modapino sumaiyokwe a'mwo womdokwe su tekwo me'no yomollo'no a'mwo aguto toollu aro abuudokaikono. “Mi agutoloo, gumoro womdo anyamodo tov kuvinono me'no sopimonyugono. Toro kuvi kuruv a'mwo abolo ton ago tovi yere mamwollutowopimwakovo.” Kuudokaikono.

Luuk 3:22

Toro kuusoda'mduke tomuuda'ai Gooti toolluro Kuullo tool dokato sobuuro pwolbusuko wolabino sumaiyokwe Jisasollu abwolomwalokaikono. Toro bwolomwalno sumaiyokwe yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumonoo.” Adokakwono.

Joon 1:14

Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.

Joon 1:16

Toro te yasuwa'wino sugumaluko tov su toollu aiyowomno kuullo'mowopiyodowodekono. Toro kuullo'mowopiyoduke tovida'ai nevu yiuwi'nokai tonollu yasuwa'wino sugumaluko ton nekullabino nekullabino yokwekono. Toro te yasuwa'wino sugumaluko su tonyu yiunokuudo nomo'movla'mwalanonogano.

Joon 10:30

Moro Nyunumiyago su tooke'aro nuvnokwe toonyuge'aro toonal yiuno pwolnodonakono.” Kuudokaikono.

Joon 10:38

Toro kuvi kuruv nuvu gamoro womdo su tonyu kuvinono sumi to'gwowi kuudo neya donubweyogaulo. Aki kevu moro yogalo tonyu kuudo muubweyo'mo aikulluno'ji tov moro duuwallo jurogudo ikuduuwallodumdo tonyuno'gwowi kuudo neya duubweyogaulo. Su toro kuubwepi toga mino aro kuudo nyouronumapinogaikikono. Oo su tooke'aro Ganumiyago Gooti tooke'aro tonumdal yiuno aval'no guro'mwonyodubuloraldeyo. Mino su toro kuudo nyouronumapinogaikikono.”

Joon 14:20

Aki nuu aiyo aiko te me'no aduka'mi toga kevu aro tovino kuudo nyouronumapinorekikono. Nuu mi Nyunumiyago toollu uuguro'mwonyodumdonyugono. Aki kevu mi nuguro'mwonyodupudorekikono. Aki nuu kwonyu kuruv kemi ikuguro'mwonyodumdonyugono. Kevu su toro tonyuno kuudo nyouromapinorekikono.

Joon 17:21

Aki su toro agudumwako tov aro tovino'mokwono. Guu Nyunumiyago tooku mi me'no nuguro'mwonyodumdekugono. Aki nuu kwonyu kuruv gumi me'no guguro'mwonyodumdonyugono. Toro te navu puru'mono imo'nodowolo to'busuko kubalno yiuwi'nokai a'mwo abolo judo'no judo'no kuudo kuubwepi su to kubuuro kuruv yiuno puru'mono neya imo'numwalpino'moneyokwe tovino agudumwakono. Aki a'mwo abolo su ton nami nokwo nakuguro'mwonyumwalpinogano. Su tov aro tovinokwono. Yiuwi'nokai a'mwo abolo kwako akavi mwalodupudo ton aro kuudo neya uubwepino'moneyokweyokwono. Oo guu Gooti tooku mi amonuwopiyabodekugono. Su toro tovino kuudo neya uubwepino'moneyokweyokwono.

Joon 2:21

Jisasol Gooti toollu ilomoropiyo'moneyokwe ago tovino adoka su tov ago kuunodo puvino adokalmaiyo. Toro kwol kuruv gavnokweyolluro kulako tovi wimo'nono tovino adokaikono.

Kuurotokwe 17:29

Toro te kuuguudo akav nebal'no kuunodokwono. Gooti tool nemi Nellunumiyagekono. Toro te pwonal aro kuudo nyauroso. Oo kwako akavida'ai a'mwo pworavuro kuudo to'no yau'dupu yokwolludapiyodupudo su tooro Gooti kuunodo imo'nodupudorogano. Navu su toro kuudo nyauroso. Yiuwi'nokai sulo togai gool togai silva togai tonyuda'ai yokwolludapiyodupudo tooro Gooti kuunodo mimo'nodupudorogano.

2 Koorin 5:19

Toro anekubweyoka toonol aro moruudodowadonogano. “Oo Gooti tool yiuwi'nokai a'mwo abolo kwako akavi aiyowomno mwalodupudo togai momgurowosunyo'moneyokwe puuto tov Krais toolluro womdo sopiyoka tovi'aro me'no soulosokaikono. Su toro tovi'aro a'mwo abolo gavuge me'no amomgurowosungiko ton Gooti tool kemoro ma'no ma'nodo tonyuro kirumwallo tonyu nomodukwopiyonekono.” Moruudodowadonogano. Toro te Gooti tool a'mwo abolo tonyu gavuge momgurowosodowodo tovino kuuguudo tokwe moruudomollo'moneyokwe womdo tov nemi me'no anekubweyokakwono.

Kooloosi 1:19

Neya duu'nyulo. Gooti gavnokwe tool gami Kwolaiyo toollu anakuuto tomuu yiunokuudo kuullo'mowopiyo'mo tovino ilaiyo to'no winyokwekono. Toro tool gami Kwolaiyo su toollu kuvinono kuullo'mowopiyodowodekono.

1 Timooti 3:16

Toro te nevu aro tovino kuudo noullo maullo miyau'dowadonogano. Gooti toolluro yiulo yogalo kuu'maiyo toru'no me'no bomollolupto'nosodowodo su tov aguto kuunodokwono. Yogalo su tov aro dodowodokwono. “Krais tool a'mwo kulako kuunodo tokwe imo'no'no a'mwo abolo tonyu kwiyalugunyajukekono. Toro toolluno Gooti toolluro Kuullo tool kuu'maiyo aro kuuduuwallajukekono. A'mwo akal Gooti toolluro sugudo to'nodekono. Kuuduuwallajukekono. Aki ensel pworo kwollu me'no kwonomaropekono. Aki gamoro womdokwe tooro yiuwi'nokai kantri tomuu kwolluno kuuguudo amodomollajuporogano. Su toro amodomollajupo toolluno yiuwi'nokai kwako akavida'ai a'mwo abolo pun kuudo kuubweyopekono. Aki toro toollu Gooti tool muunyu kai'muuno mokailno sumaiyokwe gamoro bako jurogudo tovi anakuuto tomuu aulomorumwallokaikono.” Yogalo aguto su tov toro dodowodokwono.

Taitos 2:13

Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.

1 Joon 5:20

Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.

1 Joon 5:7

Kuudo neya jaullulo. Jisasol Gooti toolluro Kwolaiyekono. Toro toolluno kavlo puruvapuruv ton yogalo to'busuko kuu'maiyo toru dodoluwosodupudogano.