Joon 5:30 - Gooti Toolluro Yogalokwono

³⁰ Nuvu nuvnokwenyuro kuudo tovida'ai womdo miyodumdonyugono. Toro kuvi kuruv mi Nyunumiyago toolluro yogalo nyudodowo'jure tovi kuumjunmi tovi'aro to'no kooti yogalo wuu'no'mi jainyubwo'dumdonyugono. Aki neya duu'nyulo. Nuvnokwe toonyuro kuudo tovi uumjunyo'mo manyunodowodonyugono. Toro kwonyu kuruv yiuno mi amonuwopiyaboka toolluro ilaiyo winodowo'jure tovino'gwowi kuvinono uumjunyokwenyugono. Toro tovino tov nuu kooti yogalo tovi pi'mwono to'no jainyubwo'dumdonyugono.”

Joon 5:30 Σταυροειδείς Αναφορές

Muuduko 18:25

Eburaiyamol toro wuudoganyuno sumaiyokwe aki aro kuudokaikono. “Awiyo, guu yiuwi'nokai tonyu ku'nono maromiyebuuropibinekugono. Kuudo saguu'mono. Guu yiuwi'nokai a'mwo abolo kwako akavi mwalodupudo tonyu kooti yogalo duuwiyodumdo tooku yiuno sugudo to'no yokwekugono. Toro tooku yiuwi'nokai a'mwo ma'no ma'no yodupudo toorai airumwallubi toga a'mwo sugudo yodupudo tooraino'gwowi aval'no mwibinekudeyo. Kuudo saguu'mono.” Kuudokaikono.

Matyuu 26:39

Toro wuujuno sumaiyokwe kuru'gwo uuwo'no gamoro sumdomago tov kwako tovi wolomuulo'na'no sumaiyokwe subusu'nyogalo tov aro adokaikono. “Mi Nyunumiyagoloo, nuu dado su tovi mama'miyokwe puuto puruv nokwo youlanubwebinekudukono? Toro kuvi kuruv moro anyunadopiko su tovi muumjunbinono. Yiuno guvnokwekujuro yo'mo agujunadopiko tovino duumjunono.” Kuudokaikono.

Joon 14:10

Guu mino aro tovino neya donubweyono. Mi Nyunumiyago toollu uuguro'mwonyodumdonyugono. Aki mi Nyunumiyago su tool numi nuguro'mwonyodowodekono. Moro yogalo ikudodumdo ton nuvnokwenyuro tovida'aiyonmaiyo. Toro kuvi kuruv yogalo ikudodumdo su ton mi Nyunumiyago nuguro'mwonyodowodo toolluda'aiyogano. Mi Nyunumiyago su tool moro ato tovi'aro gamoro womdo ton yodowodekono.

Joon 17:4

Nuu kwako akavi mwalodumdo toga gumoro womdo anyabodo tovi me'no sopiyonyugono. Toro yopiyodore tovi'aro guu yovo aguto ma'dumdekugono.

Joon 18:11

Toro te Jisasol Pitallu aro kuudokaikono. “Guu kwallu'mopto su toul gami wo'dowodo aiko tomuu neya domullosono. Nuu dado ibwosunyo'moneyokwe tov mi Nyunumiyago toolluro anyamoka tovi kuvinono neya uumjunmonyugono.” Kuudokaikono.

Joon 4:34

Toro yajunodopure toorai Jisasol aro sovo'dogaluudokaikono. “Mi amonuwopiyaboka Gooti toolluro ilaiyo winodowo'jure tovi uumjunyo'moneyokwe tov moro wosamujuko to'busuko nyumo'nodowodokwono. Aki gamoro womdo tovi yopiyo'mo kuruv moro wosamujuko to'busuko nyumo'nodowodokwono.

Joon 5:19

Toro te Jisasol Juu su toorai aro kuudokaikono. “Nuu nebal'no kuunodo ikudumo'mokwono. Gooti toolluro Kwolaiyo toonyu nuvnokwenyuro kuudo tovida'ai womdo miyokwenyugono. Toro kwonyu kuruv yiuno mi Nyunumiyago toolluro womdo yodowo'jure tovi wonoma'dumdo tovida'ai to'no womdo aval'no yokwenyugono. Kuudo neya jaullulo. Nyunumiyago su tool burowo'nyo burowo'nyo womdo ton so'ji tov gamoro Kwolaiyo kwonyu kuruv womdo su tonyu aval'no yokwenyugono.

Joon 6:38

Neya duu'nyulo. Nuvu muunyu kai'muuda'ai kwolabo tov nuvnokwenyuro kuudo tovi uumjunyo'moneyokwe kwolabonyumaiyo. Toro kwonyu kuruv mi Nyunumiyago amonuwopiyaboka toolluro ilaiyo winodowodo tonyuno'gwowi kuvinono uumjunyo'moneyokwe kwolabonyugono.

Joon 8:28

Toro tonyu Jisasol aro kuudokaikono. “Kevu A'mwo Kwolaiyo Kuunodo toonyu i'noguropte tovi me'no sulomejukuranubwepi toga mino aro kuudo yanuupinonyugono. Oo su tool Krais tooldeyo. Aki toro tool gavnokweyolluro kuudo tovi muumjunodowodo kuvi kuruv yiuno gami Ganumiyago toolluro yodubwasodowo'jure tokwe to'no moruudodowodoldeyo. Kevu mino su toro kuudo nyouronumapinonyugono.

Joon 8:42

Toro wuujuno sumaveyokwe toga Jisasol aro kuudokaikono. “Gooti tool kemi Tellunumiyago kuunodo ikullumo'nodowodorekulno'juki kevu mino kalo buuropino nokwo aikullunowo'jujukorekikono. Su tov aro tovinokwono. Nuvu Gooti toolluda'ai kemiyomno abonyugono. Aki nuu akawai abumwako tov nuvnokwenyuro kuudo tovida'aiyo'maiyo. Toro kuvi kuruv Gooti tool amonuwopiyaboka tovida'ai abumwakono.

Joon 8:50

Nuvu nuvnokwe toonyuno yovo tovi ilomoropiyo'mo manyunodowodonyugono. Toro kuvi kuruv Gooti toolno'gwowi mino yovo tovi ilomonuwopiyo'moneyokwe winodowodekono. Gooti su tool kevuge'aro nuu kwonyuge'aro toonolluro yogalo tonyuno pi'mwono jainyubwollokwekono.

Room 15:3

Kevu kuudo neya jaullulo. Krais tool gavnokweyol ilaiyo igollunyo'moneyokwe miyajukekono. Toro tool burolyogalo wuudodopure kuga kuruv gavnokweyolluno kuudo miyau'dowo jul'nyo to'no amarokaikono. Su toro tovino Krais toolluro yogaimaguurai puruv aro ajakwollungikokwono. “Gootoloo, gumi burolyogalo gudodupudo jul'nyo su tov nuu kwonyu kuruv aval'no bwolanuwo'dowodokwono.” Ajakwollungikokwono.

Room 2:2

Gooti tool a'mwo abolo ma'no ma'no yodupudo tonyu kirumwallo'moneyokwe tov yiuno'no uubweyodowodekono. Gooti toolluro toro uubweyodowodo tov yiuno sugudo to'no yokwekono. Su toro tovino nevu kuudo me'no youroma'dowadonogano.

Room 2:5

Awiyo, kevu toro kuudo miyau'dupudo kuvi kuruv kemoro poowokalago tono'gwowi lumdo kuulopiyopi kemoro kuudo kun kuruv dogaipo'nyo kuumwiyo bwotonyo yau'dupudorekikono. Toro toorekulluro kirumwallo tov bwotonyo imo'nugelodawodokwono. Toro te aiyowo'mo toga Gooti tool gamoro kooti yogalo idopto'nodo tokwe daikullowo'ji airekumwallo'ji toga gamoro surodo tov yiuno kuu'maiyo toru'no ikuduuwallonorekikono. Toro aikuduuwallo'ji tovi noonpinorekikono.