Toro kuvi kuruv nuvu gamoro womdo su tonyu kuvinono sumi to'gwowi kuudo neya donubweyogaulo. Aki kevu moro yogalo tonyu kuudo muubweyo'mo aikulluno'ji tov moro duuwallo jurogudo ikuduuwallodumdo tonyuno'gwowi kuudo neya duubweyogaulo. Su toro kuubwepi toga mino aro kuudo nyouronumapinogaikikono. Oo su tooke'aro Ganumiyago Gooti tooke'aro tonumdal yiuno aval'no guro'mwonyodubuloraldeyo. Mino su toro kuudo nyouronumapinogaikikono.”
Joon 17:23 - Gooti Toolluro Yogalokwono23 Nuu a'mwo abolo su tonyu uuguro'mwonyugovlavo'mi aki guu kweku kuruv numi nuguro'mwonyugovla'binekugono. Su tov aro tovino'mokwono. Yiuwi'nokai a'mwo abolo kuudo kuubwepi su ton yiuno puru'monodo to'no pi'mwono neya imo'nugovla'mwalpinogano. Toro imo'nugovla'mdopure tonyu yiuwi'nokai kwako akavida'ai a'mwo abolo ton wonopi mino aro kuudo youronumapinogano. Oo akal Gooti toolluro amonekwopiyabokaldeyo. Su toro tovino kuudo youronumapinogano. Aki guvu mino kalo buuropino gujunodowodo to'busuko kubalno guu a'mwo abolo su to kunyuno kuruv kalo buuropino aval'no gujunodowodekugono. Su to kuvino kuruv kuudo nokwo youromapinogano. Δείτε το κεφάλαιο |
Joon 17:23
31 Σταυροειδείς Αναφορές
Guu mino aro tovino neya donubweyono. Mi Nyunumiyago toollu uuguro'mwonyodumdonyugono. Aki mi Nyunumiyago su tool numi nuguro'mwonyodowodekono. Moro yogalo ikudodumdo ton nuvnokwenyuro tovida'aiyonmaiyo. Toro kuvi kuruv yogalo ikudodumdo su ton mi Nyunumiyago nuguro'mwonyodowodo toolluda'aiyogano. Mi Nyunumiyago su tool moro ato tovi'aro gamoro womdo ton yodowodekono.
Toro kuudoka tovi Jisasol kuudokaikono. “Yiuwi'nokai a'mwo abolo numino kalo buuropino kwinpi ton moro yogalo wuudodo'mure tovi numjunpinogano. Aki mi anumjunpi su tonyuno mi Nyunumiyago tool kalo buuropino winmwalonekono. Aki nuuge'aro moro Nyunumiyago tooke'aro toonal a'mwo abolo su tonyu nami ago tovibusuko noulomwalosunonakono.
Nuu aga toga gumiyomno ilabiyo'mo sumwakono. Toro te nuu kwako akavi yiunokuudo mamwalmonyugono. Toro kuvi kuruv gumoro a'mwo abolo nyabodumdo su tobuurono'gwowi kwako akavi kuuno mwalmwalpinobuurogano. Mi Nyunumiyagoloo, guu judo tooku yiuno sugudo to'nodekugono. Toro te guvnokwekujuro yovo jurogudokwe su tovi'aro a'mwo abolo akabuurai po'dogalo domollovi'mwojomwalogawono. Gumoro yovo jurogudo su tov mi me'no anyabodekugono. Aki navu puru'mono imo'nodowolo to'busuko kubalno a'mwo abolo judo'no judo'nodo su to kubuuro kuruv puru'mono imo'numwalpino'moneyokwe guu pi'mwono domollomwalogawono.
Aki su toro agudumwako tov aro tovino'mokwono. Guu Nyunumiyago tooku mi me'no nuguro'mwonyodumdekugono. Aki nuu kwonyu kuruv gumi me'no guguro'mwonyodumdonyugono. Toro te navu puru'mono imo'nodowolo to'busuko kubalno yiuwi'nokai a'mwo abolo judo'no judo'no kuudo kuubwepi su to kubuuro kuruv yiuno puru'mono neya imo'numwalpino'moneyokwe tovino agudumwakono. Aki a'mwo abolo su ton nami nokwo nakuguro'mwonyumwalpinogano. Su tov aro tovinokwono. Yiuwi'nokai a'mwo abolo kwako akavi mwalodupudo ton aro kuudo neya uubwepino'moneyokweyokwono. Oo guu Gooti tooku mi amonuwopiyabodekugono. Su toro tovino kuudo neya uubwepino'moneyokweyokwono.
Mi Nyunumiyagoloo, guvnokwekujuro a'mwo abolo anyabodo ton moro amwalmi tomuu nuuge neya kuulomwalpino'moneyokwe nyunodowodonyugono. Moro su toro nyunodowodo tov aro tovinokwono. Guu kwako akavi yere miyokwollosodore kugada'ai mino kalo buuropino me'no agujunyajukekugono. Toro tovino tov guvnokwekujuro bako bwotonyo tov mi me'no nyabodumdekugono. Toro te gumoro a'mwo abolo anyabodo su tobuuro guvnokwekujuro bako bwotonyo nyabodumdo tovi neya wonpuro. Su toro wonpino'moneyokwe nyunodowodonyugono.
Nuu a'mwo abolo su tobuurai gumino yovo tovino kuu'maiyo toru me'no amoruujajonyugono. Aki nuu gumino yovo su tovino kuuno nomoruudumwalmonyugono. Su tov aro tovinokwono. Guu mino kalo buuropino gujunodowodo to'busuko kubalno kalo buuropino pasudo su tov moro a'mwo abolo akabuurai nokwo kuuluuwo'mwalonokwono. Aki nuvnokwe toonyu moro a'mwo abolo su tobuurai noulomwalmwalmonyugono.” Jisasol subusu'nyogalo toro kuudokaikono.
Su tov aro tovinokwono. Nuvu gumoro yogalo anyabodo ton me'no kwiyonyugono. Yogalo kwiyo su tonyu me'no ma'dupu mino aro kuudo souronuma'mwakopogano. Oo su tool Gooti toolluda'ai nebal'no kwolabokaldeyo. Kuudo souronuma'mwakopogano. Aki toro ton mino tov aro kuudo kuubwemwakopogano. Oo Gooti toolluro amonekwopiyabokaldeyo. Kuudo kuubwemwakopogano.
Yiuno Gooti judo toolluro kemi ilaiyo yaikullugoloduke tovida'ai kevu Krais Jisaseke me'no uuguro'mwonyodupudo togaikul kweke mujomwekovla'mdupudogaikikono. Toro mujomwekovla'mdupudo su toollu'aro Gooti tool gamoro pi'mwo kuudo ton nekuduuwallodowodekono. Aki Krais Jisas su toollu'aro nevu Gooti toolluro sumdo tovi sugudo imo'nodowa gamoro a'mwo abolo kuunodo wimo'nodowadonogano. Aki toro toollu'aro Gooti tool nemi mobiyonekuma'dowodekono.
Kuudo neya jaullulo. Krais tool ma'no ma'no puru'monodo kuruv miyajukekono. Toro kuvi kuruv Gooti tool nemi nekullo'mwojo'moneyokwe tov nemoro ma'no ma'nodo ton Krais toollu muunyu toru sulloullubweyokaikono. Toro te aga nevu Krais ma'no ma'no miyajuko su toollu me'no uuguro'mwonyodowadonogano. Toro tovino tov Gooti toolluro sumdo tovi sugudo me'no wimo'nodowadonogano.
Toro togaikulluno tov go'no go'no mimo'nodupudogaikikono. Kevu Juu togaikike'aro Juu miyawosunodupudo togaikike'aro togaikul go'no go'no mimo'nodupudogaikikono. Aki ki'nato womdokwe togaikike'aro me'no birolo'nugolokwodupudo togaikike'aro togaikul go'no go'no mimo'nodupudogaikikono. Aki a'mwo toorekike'aro abolo togaikike'aro togaikul go'no go'no mimo'nodupudogaikikono. Kevu yiuwi'nokai su togaikul Gooti toolluro sumdo tovi go'no go'no mimo'nodupudo su tov aro tovinokwono. Kevu yiuwi'nokai Krais Jisasollu uuguro'mwonyodupudo togaikul a'mwo abolo yiuno puru'mono togaikulbusuko me'no imo'nodupudogaikikono.
Kevu pugaikul Gooti toolluro Kuullo toolluro yogullumwojekwapiyoduke tovida'ai aguto me'no imo'nodupudogaikikono. Kevu su toro imo'nodupudo togaikul nuuge avaikuudo neya jaurogaulo. Toro kuvi kuruv pugaikul avaikuudo miyaupi to'gwowi lukomgu Gooti tool kemoro kuudo kaiya'nodo tovi nomollaikudo'mowonekono.
Toro tovino tov nevu Krais su toolluno kuuguudo tokwe moruudomollodowadonogano. Yiuwi'nokai a'mwo abolo tonyu duudapi kuuguudo togai wuudodowa aki yiuwi'nokai pi'mwo kuudo wo'dupudo togai yodubwosomollodowadonogano. Nemoro su toro yodubwosomollodowado tov aro tovinokwono. Yiuwi'nokai a'mwo abolo ton Krais toollu neya uuguro'mwonyogapuro. Aki toro ton Gooti toolluro sumdo tovi aguto me'no agullungopo tonbusuko neya wimo'nogapureyokwe tovinokwono.
Toro toonyu aro tovino nyunodowodonyugono. Kevu yiuwi'nokai togaikul Jisasolluro a'mwo abolo pubuurai kalo buuropino neya domollogaulo. Kalo buuropino amollupi su tov wuulo to'busuko kevu imgu amgu togaikullu jurogudo nokwo galogudupolaikwo'mwalonokwono. Toro gudupolaikwo'dowo'jure tovi'aro kemoro poowokalago tonyu jurogudo nokwo daikullumwojumwalonokwono. Aki kevu Gooti toolluro yiulo yogalo apuu'nallajuko su tov aga kuu'maiyo toru'no bomollolupto'naikubweyodowodokwono. Toro tovino kavlo tov me'no youroma'dupudogaikikono. Kavlo su tov Krais tool kwekono. Kevu Krais su toolluno kuudo me'no youromoropiyodupudo tov kuvi kuunogano. Kuudo su tovi youroma'dupudo togaikul Gooti toolluro sumdo tovi kevu gamoro yiuwi'nokai sugumaluko tollovo me'no ma'dupudo tonbusuko wimo'nodupudogaikikono.
Yiuwi'nokai pasudo su tonyu uuwolo'mdowodo pasudo puruv nooso. Su tov a'mwo abolo tonyuno kalo buuropino neya domollogaulo. Pasudo su tov youro to'busuko kevu neya domollosogaulo. Toro te kevu a'mwo abolo pwolno puru'monodo togaikul kalo buuropino kuvinono amollupi tov pasudo su tov kemi wuulo to'busuko aval'no nomoweyaikubweyonokwono. Toro moweyaikubweyodowo'jure tovida'ai kevu ilaiyo to'no guro'mwonyopi pi'mwono nokwo yomjomwekovla'mwalpinogaikikono.
Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.
Toro biyanekulo'noduke toollu nevu me'no kwonowekono. Aki gamoro yogalo moruudoduke kuvi kuruv nevu me'no kuu'nowekono. Toro te kevu nevuge aval'no ibwoto'nomwekovla'mwalano'moneyokwe nevu me'no kwonyajuuwo togai'aro me'no kuu'nyajuuwo togai'aro su tonyuno kemi sodekubwasumwakuuwono. Aki nevu Gooti Ganumiyago tooke'aro gamoro Kwolaiyo Jisas Kraiseke'aro toorake kuvinono me'no ibwoto'nomwalodowadorakono.
Neya duu'nyulo. Nemi Nellunumiyago Gooti tool nemino kalo buuropino winodowodekono. Toro winodowodo su tov bwotonyokwono. Aga'no'gwowi Gooti tool nemino tov, “Oo moro kwoloraiyo tobuurogano,” nekudodowodo su tov aguto kuunodokwono. Toro te nevu gamoro kwoloraiyo kuvinono wimo'nodowadonogano. Toro kuvi kuruv kwako akavida'ai a'mwo abolo tono'gwowi nemino tov, Oo su ton Gooti toolluro kwoloraiyodeyo, kuudo miworovonekuma'dupudonogano. A'mwo abolo su ton Gooti toolluno kuudo kuunodo miyouroma'dupudo tovino tov nevu gamoro kwoloraiyo kunolluno kuruv kuudo miworovonekuma'dupudonogano.
Toro te kevu neya duu'nyulo. Nuu Satanyolluro mollu'bwoto tonyu molleroudapiyodo'mure tovida'ai a'mwo abolo su ton kev togaikulluro suvlo dolago tomuu nobomuulo'napinogano. A'mwo abolo su ton kuunano aro dodupudogano. “Oo nevu Juu kuunodonogano.” Su toro dodupudo kuvi kuruv a'mwo abolo su ton Juu kuunodonmaiyo. Su toro ton kemoro suvlo dolago tomuu bomuulo'naropi aro tovi noonomapinogano. Nuu toonyu kevu togaikulluno'gwowi kalo buuropino nyunodowodonyugono. Su toro tovino noonomapinogano.
Διαφημίσεις