Joon 15:8 - Gooti Toolluro Yogalokwono

⁸ Kevu ikulsulo bwotonyago ai'nugovlapi tovi'aro moro Nyunumiyago tool yovo aguto maronekono. Aki ikulsulo bwotonyago ai'nugovlapi su toorekul aro tovino kuu'maiyo wuuduuwallumwalpinorekikono. Kevu moro nuumjunyokwe kuunodorekikono. Toro tovino wuuduuwallumwalpinorekikono.

Joon 15:8 Σταυροειδείς Αναφορές

Matyuu 5:16

Toro to'busuko kubalno kevu sugupasudo tokwe kuu'maiyo toru'no neya domjumovlavogaulo. Toro supi togaikullu a'mwo abolo pun ikwonopi toga kemi Tellunumiyago muunyu kai'muuda'ai toolluno nokwo ilomoropiyapinogano. Kevu toro supi togaikul a'mwo abolo tonyu bako to'busuko wimo'nopi nokwo luvomokavla'mwalpinogaikikono.”

Matyuu 5:44

Toro kuvi kuruv nuvnokwe toonyuno'gwowi aro ikudumo'mokwono. Kevu kemi ikomago ikullumo'nodupudo tooraino kalo buuropino neya domollogaulo. Aki a'mwo kaiyako yaikullugolodupudo tonyuno kevu Gooti toollu subusu'nyogalo neya duudumovlavogaulo.

Matyuu 9:8

Jisasolluro soka su tovi a'mwo abolo kwolallo abi'bwo'nopo ton wonyuno sumaveyokwe luko amorumoukuropiyopogano. Aki Gooti toolluno sulomoropiyapogano. Aro tovinokwono. Gooti su tool a'mwo abolo tonyu ikullo'moneyokwe jurogudo tov me'no kuubwemokaldeyo, do'mno sulomoropiyapogano.

Luuk 6:35

Toro kuvi kuruv kev togaikulno'gwowi kemi ikomago ikullumo'nodupudo tonyuno kalo buuropino neya domollogaulo. Aki toro tonyu ilaiyo to'no neya jugologaulo. Aki kemi dinau aikullupi toga kevu aki aiko te neya anekullabupureyokwe kuudo nyau'mwalpiyo. Kevu su toro tomgu'aro supi tovino Gooti toolluro mubiyo sugudo bwotonyo pun nomapinogaikikono. Kuudo neya jaullulo. Gooti Yiuwi'nokai Tonyu Uuwolo'mdowodo tool a'mwo abolo, Nenoloo, muudodupudo togai'aro a'mwo abolo kirovanyuvanyu kirounomollodupudo togai'aro yiuwi'nokai a'mwo abolo su tonyu ilaiyo aval'no igolodowodekono. Toro te kev kugaikul kuruv Gooti su toolluro pasudo tovi aval'no kuumjungovlapi tov aro kuudo yaikuupinogano. Oo su ton Gooti Yiuwi'nokai Tonyu Uuwolo'mdowodo toolluro kwoloraiyo wimo'nodupudodeyo. Kuudo yaikuupinogano.

Joon 13:35

Kevu kemida'ai yiuwi'nokai pwolno pwolnodo tooraino kalo buuropino kuvinono amollupi toorekullu yiuwi'nokai a'mwo abolo kwako akavi mwalodupudo ton ikwonopi kuudo yaikuupinogano. Oo a'mwo su tooro Jisasolluro uumjunyokwe toorodeyo. Kuudo yaikuupinogano.” Jisasol toro kuudokaikono.

Joon 15:5

Nuu iko wain kuunodo toonyugono. Aki kevu iko wain toonyuro ipilo toorekikono. Toro te a'mwo pwol numi nuguro'mwonyugovlavowo'ji aki nuu kuuguro'mwonyugovla'mi tov a'mwo su tool ikulsulo bwotonyago ki'nugovla'mwalonekono. Su tov aro tovinokwono. Kevu numi manuguro'mwonyugovlapi to'gwowi ikulsulo ki'nyo'moneyokwe womdo puru'monodo kuruv ku'nono mipinorekikono.

Joon 8:31

Toruda'ai Jisasol Juu a'mwo pworo gamino kuudo uubweyodopure toorai aro kuudokaikono. “Kevu moro yogalo yodekubwasodumdo tonyu avorugwo'mo'napi tov moro uumjunyokwe kuunodo imo'nupinorekikono.

1 Koorin 10:31

Toro te kevu wosamujuko ton anpiyoga'deyo oo wonyo ton anpiyoga'deyo oo buro'nyo buro'nyo womdodeyo ton supiyoga'deyo yiuwi'nokai su ton Gooti tool yovo aguto mallo'moneyokwe to'no neya jogaulo.

1 Koorin 6:20

Su tov aro tovinokwono. Gooti tool kemi me'no abiyekumarokaikono. Toro tovino tov kemoro kulako su ton Gooti toollurogano. Aki yiuwi'nokai toga Gooti tool kemoro kulako tovi'aro yovo aguto neya amarogawoneyokwe kevu sugudo to'no domjumovlavogaulo.

Filipai 1:11

Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.

Taitos 2:10

Aki toro ton kuuko mipinono. Toro kun kuruv kemi jukwo tooravuro yogalo wuudodopure tonyu kaduko to'no ilaiyo neya wimwalpinogano. Ki'nato womdokwe su ton kaduko ilaiyo kwipi toga nemi mollurolovonekumokalokwiyokwe Gooti toolluno nebaikuuguudo tokwe ilaiyo mollovaisu'nupinogano. Su toro yovaisu'nodopure tovi kemi mido mollomwalokwe tooro wonopi aro nokwo ilomodomoropiyapinorogano. “Oo Gooti toolluno kuuguudo ibwasodupudo tov ilaiyo'mdeyo.” Nokwo ilomodomoropiyapinorogano.

Taitos 2:5

Aki abewalo su ton pi'mwo kuudo tokwe neya yomjomwekovlavopi pasudo kaiya'no mollugolamo'nyo'moneyokwe su toorogai yiuno nonagutokwe to'no neya imo'numwalpinogano. Aki kemoro ago tovida'ai yiuwi'nokai womdo wo'dopure tonyu neya mollomwalmwalpinogano. Aki yiuwi'nokai a'mwo abolo tonyu ilaiyo neya igolmwalpinogano. Aki kemi kwolo toorai kwako tomuu'aro neya wipuro. Su toro tomgu'aro amjumovlapi tov a'mwo abolo kwa'mguda'ai ton Gooti toolluro kuuguudo tovino kaiya'no yogalo mabwolomodomorumwogapiyapinogano. Abolo yadainyunodo ton su toro tonyuno neya yodubwasumwalpinogano.

1 Pita 2:12

Kevu a'mwo abolo Jisasolluno kuudo muubweyodopure tonyuro akuuto tomuu amwalpi toga yiuno sugupasudo tollovogai to'no jogaulo. Su tov aro tovinokwono. A'mwo abolo Jisasolluno kuudo muubweyodupudo ton kemi bwolomekumwogapiyo'mo winodopure toga kemoro sugupasudo su tollovai wonopi lukomgu Gooti tool kuu'maiyo abiyalo'no'ji toga gamino yovo tov nyulomoropiyapinogano.

1 Pita 4:11

Toro te kemida'ai a'mwo pwol moruudomollo'moneyokwe yasuwa'wino su tovi amaro'ji tov a'mwo su tool Gooti toolluro mago tovida'ai mollodavowo'ji gamoro mago tokwe neya moruudomollumwalonekono. Aki kemida'ai a'mwo pwol a'mwo abolo pubuurai womdo wiyo'moneyokwe yasuwa'wino su tovi amaro'ji tov a'mwo su tool Gooti toolluro jurogudo uubweyodowo'jure tokwe a'mwo abolo pubuurai womdo guureji neya wimwalonekono. Su tov aro tovinokwono. Kemoro yiuwi'nokai judo'no judo'no womdo amjumovlapi su ton Jisas Kraisollu'aro Gooti toolluno yovo tovi kuvinono ilomoropiyapinogaikikono. Jisas Kraisol Gooti toolluro bako bwotonyo pwopiyodowodo tovi anakuuto tomuu mwalodowo aki yiuwi'nokai tonyu mido mollomwalodowodekono. Toro toolluno nevu yiuwi'nokai toga yiunokuudo neya ilomoropimwolowanekono. Nebalokwono.