Joon 1:34 - Gooti Toolluro Yogalokwono

³⁴ Toro anyudoka tov kuvinono me'no kwononyugono. Toro toonyu kuu'maiyo toru'no aro dodoluwosodumdonyugono. Oo akal Gooti toolluro Kwolaiyo tool kwekono.” Joonol toro kuudokaikono.

Joon 1:34 Σταυροειδείς Αναφορές

Matyuu 11:27

Aki Jisasol a'mwo abolo tonyu aro kuudokaikono. “Nuu yiuwi'nokai tonyu mido mollomwallo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo youroma'dumdekono. Aki yiuno gamoro Kwolaiyo nuvnokwe toonyuno aro kuudo yau'dumdonyugono. Oo a'mwo abolo punyu mi Nyunumiyago su toolluno neya bomollolupto'nubwemonyugono. Nuu a'mwo abolo tonyu kuu'maiyo toru'no kuvinono bomollolupto'nubweyodo'mure tovida'ai mi Nyunumiyago su toolluno kuudo nokwo youromapinogano.” Kuudokaikono.

Matyuu 16:16

Toro kuudoganoka toga Saimoon Pital aro kuudokaikono. “Guu Gooti toolluro amonekwopiyaboka Krais tookugono. Toro tooku aiyo mujomwekovla'mdowodo Gooti toolluro Kwolaiyekugono.” Kuudokaikono.

Matyuu 17:5

Pital toro wuudoduke toga sulu'wo bako awopingikokwe puruv Jisasollu abwolobu'duvolomarokakwono. Sulu'wo abwolobu'duvolomaroka su tovi anakuuto tomuuda'ai yogaimaguurai puruv alokabokakwono. Toro tov aro adokakwono. “Akal moro Kwolaiyo kalo buuropino nyunodowodo tookono. Toro toolluno ilaiyo kuunodo anyunumaiyoo. Gamoro yogalo dodowo'jure tonyu kevu neya duu'nogaulo.” Adokakwono.

Matyuu 26:63

Toro samuugojoka kwol kuruv Jisasolluro wuujo'mo tov mwinoduke tool yogalo puru'monodo kuruv maravokaikono. Toro toollu pris aguto tool aki aiko te guureji aro adumuurolovokaikono. “Gooti aiyo mujomwekovla'mdowodo toolluno yovo tovida'ai donyudono. Guu Gooti toolluro nekullo'mwojo'moneyokwe Krais ajesoka tool kwekudukono? Aki Gooti toolluro Kwolaiyo su tool guu kwekudukono?” Guureji toro adumuurolovokaikono.

Matyuu 27:40

Toro ton aro ajuwoleyajupogano. “Aiyoo, Gooti toollu ilomoropiyo'moneyokwe ago tovi mouropiyo'bi iruko pullapullu guuwolo'nowo'ji toga aki aiko te mojokwe tookugono. Toro tookujuno tov guvnokwe tooku neya duuwiyo'mwoju'nono! Aki guu Gooti toolluro Kwolaiyo tookuno'juki i'noguropte tovida'ai doolabono!” Ajuwoleyajupogano.

Matyuu 27:43

Aki toro tool Gooti toollu kuudo kuubweyajuko tovino tov Gooti tool a'mwo su toolluno ilaiyo kwino'ji tov aga toga nokwo wiyo'mwojonekono. Su tov aro tovinokwono. A'mwo su tool aro me'no ajajukekono. Oo nuu Gooti toolluro Kwolaiyo toonyugono. Su toro ajajuko tovinokwono.” A'mwo mido mollomwalokwe tooro burolyogalo toro ajunoporogano.

Matyuu 27:54

Toruda'ai Jisasol nyaboloduke toollu mollurogudo pworogai'aro kemi mollubworomokwanyokwe tooke'aro tooro wobo toru amuugonodaiyajuporogano. Toro tooro wunyu wunyu tokwe'aro yiuwi'nokai imo'nodopure togai'aro tonyu me'no kwonopo tovino tov luko morumoukuropiyo'mno aro adoporogano. “Oo a'mwo akal Gooti toolluro Kwolaiyo kuunodo tookono.” Adoporogano.

Matyuu 3:17

Toro bwolomwaloduke toga yogaimaguurai puruv sulugumdo tomuuda'ai aro adokakwono. “Numoro Kwolaiyo kalo buuropino nyunodowodo tool, akal kwekono. Toro toolluno ilaiyo bwotonyo anyunumaiyoo.” Adokakwono.

Matyuu 4:3

Toro winoduke toga yamju wiyoganyokwe tool Jisasollomno abokaikono. Toro bino sumaiyokwe aro kuudokaikono. “Guvu Gooti toolluro kwolaiyo tookuno'juki sulo akarai bret mollumo'noso'moneyokwe neya duudono.” Kuudokaikono.

Matyuu 4:6

Toro ilomorumwalluno sumaiyokwe Jisasollu aro kuudokaikono. “Guvu Gooti toolluro kwolaiyo tookuno'juki doolodukwopiyawono. Gooti toolluro yogalo tov aro sakwollungikokwono. Gamoro ensel tooro gumi po'dogalo yellukuromollogumwallo'moneyokwe nomodapiyonorogano. Ensel su tooro gumoro suvlo tovi sulo ton kaiyako nyapiyo'jokwe nokwo galogumworapinekugono. Sakwollungikokwono.” Kuudokaikono.

Matyuu 8:29

Toro te a'mwo su tooral lokabino sumaleyokwe Jisasollu aro kuudolorakono. “Gooti toolluro Kwolaiyo Kuunodoloo, guu nami adado nakullubino'mekudeyo? Guu Gooti toolluro kironakumwallo'moneyokwe me'no ajesungiko toga yere mabai'mo'mduke kuvi kuruv aga nami neronakumwallubino'mekudukono?” Kuudolorakono.

Kuuguudo Sugudo akav Makolluro sakwollokakwono Mak 1:1

Kuuguudo sugudo akav Gooti toolluro kwolaiyo Jisas Kraisollunokwono. Toro tov muudu'nodo toga aro sumo'nokakwono.

Kuuguudo Sugudo akav Makolluro sakwollokakwono Mak 1:11

Yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumono.” Adokakwono.

Luuk 1:35

Toro kuudoka tovi ensel tool aro kuudokaikono. “Gooti toolluro Kuullo tool nobagi'mowono'guugono. Toro bagi'mowo'ji Gooti Yiuwi'nokai Tonyu Uuwolo'mdowodo toolluro jurogudo tov gumi noborogurogumarono'guugono. Toro tovino tov kwolaiyo soma'bi tool Gooti toolluro kuunodo wimo'numwalonekono. Toro toolluno yovo puruv, Gooti toolluro Kwolaiyolo, dupinekono.

Luuk 3:22

Toro kuusoda'mduke tomuuda'ai Gooti toolluro Kuullo tool dokato sobuuro pwolbusuko wolabino sumaiyokwe Jisasollu abwolomwalokaikono. Toro bwolomwalno sumaiyokwe yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumonoo.” Adokakwono.

Joon 1:18

A'mwo Gooti toollu me'no kwonyungiko pwol nonagutomuugono. Toro kuvi kuruv yiuno Gooti toolluro Kwolaiyo pwolnodo su toolno'gwowi Gootekono. Toro tool gami Ganumiyago toollu wobo toru mwalodowodekono. Yiuno judo su toolno'gwowi Gooti toolluno kuu'maiyo toru nekuduuwollumovla'mdowodekono.

Joon 1:49

Toro wuujuno sumaiyokwe Natanyol kuudokaikono. “Ibwasokweyoloo, Gooti toolluro Kwolaiyo kuunodo tool guu kwekugono. Aki Isuraiyolda'ai Aguto Kig tool guu kwekugono.” Kuudokaikono.

Joon 10:30

Moro Nyunumiyago su tooke'aro nuvnokwe toonyuge'aro toonal yiuno pwolnodonakono.” Kuudokaikono.

Joon 10:36

Aki moro Nyunumiyago su tool gavnokwelluro womdo tovi yo'moneyokwe mi janubweno sumaiyokwe kwako akavi kwolomonuwopiyabokanyugono. Toro tovino tov nuu, “Gooti toolluro Kwolaiyonyugono,” aikudumi toga kevu mi aro nonyudumwalpiyo. “Guu Gooti toolluno kaiya'no yogalo abwolomorumwogapimwolano,” nonyudumwalpiyo.

Joon 11:27

Toro kuudoganoka toga Martav aro kuudokakwono. “Agutoloo, nebalokwono. Nuvu gumino kuudo agubwemono. Guu Gooti toolluro Kwolaiyekugono. Aki Gooti toolluro nekullo'mwojo'moneyokwe ajesoka Krais toolluno, “kwako akavi nobwonekono,” dodupudo tool guu kwekugono.” Kuudokakwono.

Joon 19:7

Toro kuudoka tovi Juu tooro aro kuudoporogano. “Nemoro loowo puruv nooso. Nevu loowo su tovi kuumjuna'ji tov a'mwo su tool neya bolonekono. Su tov aro tovinokwono. A'mwo su tool gavnokweyolluno aro me'no dodowodekono. “Nuu Gooti toolluro Kwolaiyo toonyugono.” Su toro dodowodo tovino tov neya bolonekono.”

Joon 20:28

Jisasol toro kuudoka tovi Toomasol aro kuudokaikono. “Guu mi Agutekugonoo! Aki guu mi Gooti tookugonoo!” Kuudokaikono.

Joon 20:31

Toro kuvi kuruv kuuguudo me'no sokwollosumo su ton kevu aro tonyuno kuudo uubwepureyokweyo'mokwono. Oo nebalo'mdeyo. Jisasol Gooti toolluro amonekwopiyaboka Krais tool kwoldeyo. Aki toro tool Gooti toolluro Kwolaiyoldeyo. Su toro toolluno kevu kuudo kuubwepi tov gamoro yovo tovi'aro aiyo yiunokuudo mujomwekovlaiyo'moneyokwe tov nomapinogaikikono.

Joon 6:69

Toro te nevu gumino kuudo me'no agubwemwakuuwo toonol aro kuudo saguu'mwakuuwono, Oo guu Gooti toolluro sugudo kuunodo tookudeyo, kuudo saguu'mwakuuwono.” Kuudokaikono.

Room 1:4

Toro tool me'no aboloka toga Gooti tool aiyo aiko te amodukavokaikono. Toro amodukavoka tovino jurogudo kuunodo tomgu'aro Gooti toolluro Kuullo tool kuu'maiyo aro anekuduuwalladopiyo. Nemi Aguto Jisas Kraisol Gooti toolluro Kwolaiyo kuunodekono.

2 Koorin 1:19

Kuudo neya jaullulo. Sumdomgu nuuge'aro Sailaseke'aro Timootiyeke'aro toonol Gooti toolluro Kwolaiyo Jisas Kraisolluno kemi me'no amodekumollowonogano. Jisas Krais su tool gamoro mido tokwe, Awiyo, kuudo yaurowo'ji gamoro mago tokwe, “Tade,” miyoukuu'najokwekono. Toro kwol kuruv yiuwi'nokai toga, “Tade,” to'no dowo'ji kuvinono uumjunyokwekono.

Hibruu 7:3

Melkisodekolluro ganumiyago toolluno kuuguudo puruv Gooti toolluro yogalo tovi miyokwollosungikokwono. Aki Melkisodekolluro ganeyago tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro iko tovasuda'ai sawosunopo tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro muudu'no sumo'noka iruko tollugwojuno kuuguudo puruv Gooti toolluro yogalo tovi miyokwollosungikokwono. Aki Melkisodekolluro aboloka tovino kuuguudo puruv Gooti toolluro yogalo tovi miyokwollosungikokwono. Toro te Melkisodekol Gooti toolluro Kwolaiyo toolbusuko sumo'nyajukekono. Aki pris womdo tov yiunokuudo mujumovlaiyo'moneyokwekono.

1 Joon 2:23

Yiuwi'nokai a'mwo abolo Gooti toolluro Kwolaiyo toollu buulo uuguunyumopiyodupudo su ton gami Ganumiyago Gooti kwollu kuruv buulo me'no uugunyumopiyodupudogano. Toro kuvi kuruv a'mwo abolo puno'gwowi Gooti toolluro Kwolaiyo toolluno kuu'maiyo toru'no aro dodowiyoku'bworosupinogano. “Oo Jisasol Gooti toolluro Kwolaiyo tool kwoldeyo.” Yiuwi'nokai toro adodowiyoku'bworosupi su ton Ganumiyago Gooti kwolluno kuruv kuu'maiyo toru'no dodowiyoku'bworosupinogano.

1 Joon 3:8

Toro kuvi kuruv a'mwo abolo puno'gwowi ma'no ma'no pasudo mujumovla'mdupudogano. Ma'no ma'no pasudo su tovi wonopi kuudo youromapinogaikikono. Oo a'mwo abolo su ton Satanyollurodeyo. Kuudo youromapinogaikikono. Su tov aro tovinokwono. Satanyol muudu'nodo togada'ai ma'no ma'no pasudo mujumelabino mujumelabino yodowo aga kuga kuruv kuuno mujumovla'mdowodekono. Aki Satanyolluro womdo mujumelabodowodo su tovi Gooti toolluro Kwolaiyo tool kaiyako mollounapiyo'moneyokwe kuu'maiyo toru me'no abiyalo'nokaikono.

1 Joon 4:9

Toro te Gooti tool gamoro kalo buuropino nemino winodowodo su tovino kuu'maiyo toru'no nekuduuwallo'moneyokwe tov gavnokweyolluro Kwolaiyo pwolnodo toollu kwako akavino kwolomonekwopiyabokaikono. Su tov aro tovino'mokwono. Nevu gamoro Kwolaiyo su toollu'aro aiyo yiunokuudo mujomwekovlaiyo'moneyokwe kwolomonekwopiyabokaikono.

1 Joon 5:20

Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.

2 Joon 1:9

A'mwo pwol Krais toolluno kuuguudo sodekubwasajuuwo tovi ku'nono magudupolaro'ji tov Gooti tool a'mwo su tooke mamwalodowodekono. Toro kuvi kuruv a'mwo pwol Krais toolluno kuuguudo sodekubwasajuuwo tovi kuvinono agudupolaro'ji toolno'gwowi Gooti Ganumiyago tooke'aro gamoro Kwolaiyo tooke'aro yiuwi'nokai tooral a'mwo su tooke mwalodubulorakono.

Adodolukuu'nosungiko 2:18

“Aki guu pas akavi wagwolago Taitairoda'ai Jisasolluro mollu'bwoto tovuro ensel moduvomwallokwe toollu aro jokwollapiyono. Kuuguudo akav nuu Gooti toolluro Kwolaiyo toonyurokwono. Numoro sumdo toval widuko to'busuko guureji pwopiyodubulovakono. Aki moro suvlo toval aiyon sallukwa'jo ailogullumowopingiko tovida'ai yainyunyo to'busukovakono. Toro toonyu kuuguudo aro agudumono.