Joon 1:18 - Gooti Toolluro Yogalokwono

¹⁸ A'mwo Gooti toollu me'no kwonyungiko pwol nonagutomuugono. Toro kuvi kuruv yiuno Gooti toolluro Kwolaiyo pwolnodo su toolno'gwowi Gootekono. Toro tool gami Ganumiyago toollu wobo toru mwalodowodekono. Yiuno judo su toolno'gwowi Gooti toolluno kuu'maiyo toru nekuduuwollumovla'mdowodekono.

Joon 1:18 Σταυροειδείς Αναφορές

Muuduko 16:13

Hegaiyov toro kuudoka tovi wuu'no'no Gooti Yawelluno yovo muuduko puruv yowallo'moneyokwe aro adokakwono. “Nuu Gooti toollu kuvinono kwonmo to'mi nokwo abolo'mujuko ku'mi kuruv nuwonyapino yodowo maromiyanubwemokaikonoo.” Adokakwono. Aki Gooti Yawelluno yovo muuduko tov aro sowarokakwono. “Gooti Tool Wonopinodolekono.” Sowarokakwono.

Muuduko 18:33

Gooti Yawel Eburaiyameke kuuguudo me'no dopino sumaiyokwe kuugollu'movokaikono. Aki Eburaiyamol gami sel ago tovino aikomgu avlavokaikono.

Matyuu 11:27

Aki Jisasol a'mwo abolo tonyu aro kuudokaikono. “Nuu yiuwi'nokai tonyu mido mollomwallo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo youroma'dumdekono. Aki yiuno gamoro Kwolaiyo nuvnokwe toonyuno aro kuudo yau'dumdonyugono. Oo a'mwo abolo punyu mi Nyunumiyago su toolluno neya bomollolupto'nubwemonyugono. Nuu a'mwo abolo tonyu kuu'maiyo toru'no kuvinono bomollolupto'nubweyodo'mure tovida'ai mi Nyunumiyago su toolluno kuudo nokwo youromapinogano.” Kuudokaikono.

Luuk 10:22

Toro wuujuno sumaiyokwe aki a'mwo abolo tonyu aro kuudokaikono. “Nuu yiuwi'nokai tonyu mido mollomwalmwalmo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo tov yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo tov youroma'dumdekono. Aki yiuno gamoro Kwolaiyo judo toonyu a'mwo abolo punyu moro Nyunumiyago toolluno kuu'maiyo toru nokwo wuuduuwallumonyugono. Su toro wuuduuwallodo'mure tovida'ai to'no a'mwo abolo su ton moro Nyunumiyago toolluno kuudo nokwo youromapinekono.” Kuudokaikono.

Joon 1:14

Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.

Joon 12:41

Aisaiyalluro kuuguudo ajakwolloka su tov Jisasollunokwono. Jisasol yovo aguto yere mama'duke kugada'ai Aisaiyal me'no kwonomallajukekono. Su toro tovino ajakwollokaikono.

Joon 13:23

Jisasol gami uumjunyokwe pwonyuno kalo buuropino kwinyajukekono. Uumjunyokwe su toonyu Jisasollu wobo toru amwalonyugono.

Joon 14:9

Toro kuudoka tovi Jisasol kuudokaikono. “Filipoloo, nuvu guuge manyu toga me'no mwalodowolo kuvi kuruv guu numino kuudo po'dogalo miyouronuma'mwakudekugono. Neya duu'nono. A'mwo pwol mi anuwono'ji su tool moro Nyunumiyago kwollu kuruv me'no wonodowodekono. Toro te guu aro madubinono. “Oo gumi Junumiyago toollu donekuduuwallono.” Madubinono.

Joon 17:26

Nuu a'mwo abolo su tobuurai gumino yovo tovino kuu'maiyo toru me'no amoruujajonyugono. Aki nuu gumino yovo su tovino kuuno nomoruudumwalmonyugono. Su tov aro tovinokwono. Guu mino kalo buuropino gujunodowodo to'busuko kubalno kalo buuropino pasudo su tov moro a'mwo abolo akabuurai nokwo kuuluuwo'mwalonokwono. Aki nuvnokwe toonyu moro a'mwo abolo su tobuurai noulomwalmwalmonyugono.” Jisasol subusu'nyogalo toro kuudokaikono.

Joon 17:6

Guu a'mwo abolo kwako akavi mwalodupudo tonyuro anakuuto tomuuda'ai a'mwo abolo pubuurai bomokalokwono moro ato tovi anyabodogano. Toro tobuuro gumoro kuunodo gujumo'nodupudobuurogano. Aki toro tobuurai nuu gumoro yovo tovino kuu'maiyo toru me'no wuuduuwallodumdonyugono. Aki a'mwo abolo anyabodo su tobuuro gumoro yogalo tovi kuvinono uumjunodupudobuurogano.

Joon 3:11

Nuvu nebal'no kuunodo aro gudumo'mokwono. Aga toga nevu kuudo me'no youroma'dowado tonyuno to'no jokwenogano. Aki yiuno sumdo muugona'dowado tonyuno to'no kuu'maiyo toru'no dodoluwosokwenogano. Toro kuvi kuruv nemoro dodoluwosodowa'jure su tonyuno kevu buulo to'no uugunyumopiyodupudorekikono.

Joon 6:46

A'mwo pwol moro Nyunumiyago toollu me'no kwonoka pwolnodo kwol kuruv nonagutomuugono. Awiyo. Yiuno Gooti toolluda'ai abo toonyuno to'no moro Nyunumiyago su toollu me'no kwononyugono.

2 Koorin 4:4

Satanyol kwako akavida'ai gooti toolbusuko imo'nodowo a'mwo abolo kuudo muubwemwakopo su tobuuravuro kuudo tonyu galobu'duvolomwora'dowodekono. Toro galobu'duvolomwora'duke tovida'ai a'mwo abolo su tobuuro sumnowojokwe tonbusuko imo'nodupudogano. Aki su toro tobuuro Krais toolluno kuuguudo sugudo tovuro bako tovi ku'nono mwonodupudogano. Aki Krais su tool Gooti toolbusuko irol'mowosunodekono. Toro toolluno kuudo miyouroma'dupudekono.

Kooloosi 1:15

Nevu Gooti toollu mwonodowadekono. Toro kuvi kuruv gamoro Kwolaiyo toolno'gwowi gami Ganumiyago toolluno irol'mowosunodekono. Kwolaiyo su tool nekuduuwalloduke tovi'aro gami Ganumiyago Gooti toolluno kuu'maiyo toru'no bomollolupto'nanekubweyodowodekono. Kwolaiyo su tool yiuwi'nokai Gooti toolluro sokwollosoka tonyuro sumdomguda'aiyekono.

1 Timooti 1:17

Toro tool Aguto Kig yiunokuudo imo'nyo'moneyokwekono. Aki mabollo'moneyokwekono. Aki Gooti mwonodowado su tool yiuno pwolnodekono. Toro toolluno yiuwi'nokai toga yovo aguto wiyowa'ji yiunokuudo ilomoropimwolowanekono. Nebal'nodokwono.

1 Timooti 6:16

Aki Gooti yiuno pwolnodo su tool mabolonekono. Aki gamoro bako mwalodowodo tovi wobo toru kwako akavida'ai a'mwo pwolnodo kwol kuruv ku'nono maulai'mowonekono. Aki kwako akavida'ai a'mwo pwolnodo kwol kuruv Gooti su toollu mwonyajukekono. Aki lukomgu kuga kuruv kwako akavida'ai a'mwo pwol ku'nono mwonekono. Gooti su toolluno aro dodowadekono. “Oo yiuno Gooti pwolnodo su tool yovo aguto neya ma'mwalonekono. Aki toro toolluro mido mollomwallo tov yiunokuudo mujo'movla'mwalonokwono. Kuuguudo su tov nebal'nodokwono.” Dodowadekono.

1 Joon 4:12

A'mwo pwolnodo kwol kuruv Gooti toollu ku'nono mwonodowodekono. Toro kuvi kuruv nevu a'mwo abolo tobuuraino kalo buuropino anekulluno'ji to'gwowi Gooti tool nemi kuvinono nonekuguro'mwonyumwalonekono. Toro nekuguro'mwonyumwalodowo'jure tonollu'aro Gooti tool gamoro kalo buuropino pasudo tov a'mwo abolo tonyuro sumdo tovi kuu'maiyo toru'no bomollolupto'nubwemwalonokwono.

1 Joon 4:20

Toro te Jisasolluro a'mwo pwol aro donekono. “Oo nuu Gooti toolluno kalo buuropino nyunodowodonyugono.” Toro dowo'ji kwol kuruv gami avalo Jisasolluro a'mwo abolo pubuuraino suroguudo sauro'ji to'gwowi a'mwo su tool yiuno kuunano yogalo to'no youkuu'nadonekono. Su tov aro tovinokwono. A'mwo su tool gami avalo Jisasolluro a'mwo abolo pubuurai me'no wonodowodekono. Toro wonodowodo kwol kuruv su tobuuraino kalo buuropino mwino'ji to'gwowi Gooti mwonodowodo kwolluno kuruv kalo buuropino ku'nono mwinonekono.

1 Joon 4:9

Toro te Gooti tool gamoro kalo buuropino nemino winodowodo su tovino kuu'maiyo toru'no nekuduuwallo'moneyokwe tov gavnokweyolluro Kwolaiyo pwolnodo toollu kwako akavino kwolomonekwopiyabokaikono. Su tov aro tovino'mokwono. Nevu gamoro Kwolaiyo su toollu'aro aiyo yiunokuudo mujomwekovlaiyo'moneyokwe kwolomonekwopiyabokaikono.

1 Joon 5:20

Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.