Jems 3:17 - Gooti Toolluro Yogalokwono

¹⁷ Toro kuvi kuruv a'mwo pwol muunyu kai'muuda'ai Gooti toolluro pi'mwo kuudo tollovai amaro'ji su toolno'gwowi pasudo aro tollovai molludo'movla'mwalonekono. Muudu'nodo tov a'mwo su tool ma'no ma'nodo tovi manyu tomuu'aro mwalmwalonekono. Aki sumwoluko kavo to'no wosunmwalonekono. Aki a'mwo gabovo tobuurai kavo uubemwojumwalonekono. Aki a'mwo pworavuro yogalo dodopure tonyu kaduko yere wimwalonekono. Aki a'mwo abolo punyuno kalo mamwonyomwalonekono. Aki toro tool iko pwol ikulsulo ki'nodowodo toolbusuko kubalno sugupasudo tollovai molludo'movla'mwalonekono. Aki yiuwi'nokai a'mwo abolo avalo punyuno kuu'dello muubweyowo'ji yiuwi'nokai tonyu yiuno aval'no igolmwalonekono. Aki toro tool yiuwi'nokai toga nebal'no pasudo to'no mujumovla'mwalonekono.

Jems 3:17 Σταυροειδείς Αναφορές

Matyuu 23:28

Su toro to'busuko kubalno a'mwo abolo pun kemi kwa'mgu tomgu aikwonpi toga kuudo yaikuu'dupudogano. Oo a'mwo akaro sugudorodeyo, kuudo yaikuu'dupudorogano. Toro kuvi kuruv kemoro poowokalago anakuuto tomuuno'gwowi youkuu'najo'mo toorogai'aro kirovanyuvanyu kiroungovlaiyo'mo pasudo toorogai'aro tooro kuullo'movaikwopiyodupudorekikono.

Matyuu 5:8

Aki a'mwo abolo pun kemi poowokalago me'no yal'mo'nodupudo su ton ilaiyo nokwo ipinogano. Su ton Gooti toollu yiuno'no noonpinogano.

Matyuu 5:9

Aki a'mwo abolo pun a'mwo molo yodopure toorai kibuuloda'mdupudo su ton ilaiyo nokwo ipinogano. Su toro tonyuno Gooti tool, “Oo moro kwoloraiyogano,” donekono.

Luuk 21:15

Nuu kemoro mago tonyu davo'mi aki pi'mwo kuudo ton nekullamonyugono. Moro yogalo aikullami su togai kevu nokwo wuudupinorekikono. Moro yogalo tokwe kuudupi su tovi kemoro yiuwi'nokai ikomago tooro ku'nono muuwolopinorogano. Aki kemoro yogalo su tovi ikomago kworo kuruv ku'nono mabwolomorumwogapiyapinokwono.

Luuk 6:36

Toro te kevu kemi muunyu kai'muuda'ai Tellunumiyago kalo winodowodo toolbusuko kubalno kev kugaikul kuruv a'mwo abolo tonyuno aval'nodo tomgu'aro kalo neya duuwinogaulo.”

Joon 1:14

Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.

Joon 1:47

Filipol toro wuujuno sumaiyokwe Natanyol noboduke toollu Jisasol wono'no Natanyolluno aro adokaikono. “Oo a'mwo akal Isuraiyolda'ai kuunodo pwekono. Toro tool kuunano yogalo youkuu'najo'moneyokwe puru'monodo kuruv nonagutekono.” Adokaikono.

Kuurotokwe 11:24

A'mwo Banabasol sugudekono. Toro tool Gooti toolluro Kuullo toollu uumjunyo'moneyokwe kuudo ton gamoro poowokalago tovi kuullo'mowopiyodowodekono. Aki toro toolluro kuudo tov yiuno Gooti toolluno uubweyodowodekono. Toro toolluro kuuguudo yodubwasoduke tovi a'mwo abolo kwolallo bwotonyo ton wuu'no'mno kuudo kuubweyopogano. Toro ton Aguto toolluro a'mwo abolo kuunodo kwimo'nyajupogano.

Kuurotokwe 9:36

To'no'gwowi wagwolago Joopada'ai abolo puruv Jisasolluro uumjunyokwe su tovino yovo tov Tabitaveyokwono. Yovo su tov Grik yogaljo tovida'ai Dookasoveyokwono. Toro tov sugudo to'no yomjomwekovla'mdowo a'mwo abolo apoo'nyaiyo pubuurai kwiyo'mwojajukokwono.

Room 12:18

Kevnokwe tobuurekulluro yomjomwekovla'mwalpino tov arokwono. Buro'nyo buro'nyo jul'nyodeyo pun sumo'no'ji toga kevnokwe togaikul molo nyunpiyo. Toro kuvi kuruv sumwoluko kavo wosunyo'moneyokwe puuto puruv kurukweyo'mno'juki yiuwi'nokai togaikul kuvinono uumjunopi ilaiyo aval'no neya jomjomwekovlavogaulo.

Room 12:9

Toro te kevu kemoro poowokalago kuunodo togai a'mwo abolo tonyuno kalo buuropino neya aikullunogawono. Aki ma'no ma'no pasudo tooraino kwoda'molo sumdo to'no yopi sugupasudo tonyuno'gwowi po'dogalo neya dogudupolarogaulo.

Room 15:14

Miyobuuravoo, nuu kemino aro kuudo guureji yaikuu'dumdonyugono. “Oo a'mwo abolo su tobuuro sugudo mujumovlaiyo'moneyokwe kuudo ton me'no kuuluuwo'dowodogano. Aki Gooti toolluro yogalo tovida'ai yiuwi'nokai kuudo ton me'no youroma'dupudogano. Toro tonyuno tov kevuge avalo pubuurai nokwo yodubwasumwalpinogano.” Kemino su toro kuudo me'no yaikuu'dumdonyugono.

1 Koorin 12:8

Toro te kevu neya duu'nyulo. Gooti toolluro Kuullo tool a'mwo pwollu pi'mwo kuudo tokwe dumul'mwojo'moneyokwe womdo tov wiyodowodekono. Aki puruv, kuudo aguto tokwe moruujo'moneyokwe womdo tov Gooti toolluro Kuullo tool a'mwo pwollu wiyodowodekono.

2 Koorin 10:1

Aga kemida'ai a'mwo pworekul mino aro bwolomodonumwogapiyodapudorekikono. “Oo Poolol nemoro sumdomago tovi anekwono'ji toga nemi kwako tomuu'aro nekullodowodekono. Toro kwol kuruv manyu tomuu amwalo'ji toga'no'gwowi nemi yogalo modanekurugollo'moneyokwe yogalo jurogudo tooro monekwopiyabodowodekono.” Su toro bwolomodonumwogapiyodapudorekikono. Toro kuvi kuruv nuvnokwe Poolonyu Krais toolluro pasudo kavo molludo'movla'mdowodo tokwe'aro kavo bemwojodowodo tokwe'aro pasudo su tovalluno'gwowi uumjunodum kemi guureji adaikujugonumwakono. Toro adaikujugonumwako tov arokwono.

2 Koorin 6:6

Aki nevnokwe toonol kaiya'no pasudo togai migolamo'nodowadonogano. Aki nevu Gooti toolluro kuudo tonyuno you'movla'mdowadonogano. Aki toro toonollu kaiyako sanekullugolpi tovino biyolo madou'mwonyopiyokwenogano. Toro kwonol kuruv yiuwi'nokai a'mwo abolo tobuurai yiuno ilaiyo to'no igolodowadogano. Aki Gooti toolluro Kuullo tool mollubworonekumokavla'mdowo'jure tovi nevu uumjunodowadonogano. Aki a'mwo abolo pubuuraino kalo buuropino kuunodo mollodowadonogano.

2 Koorin 7:11

Kevu kuudo neya jaullulo. Aga'no'gwowi Gooti toolluro womdo ikullodowo'jure tovida'ai kevu kemi kaiya'no pasudo mujumovla'mdupudo tonyuno jul'nyo ibwosunodupudogaikikono. Jul'nyo ibwosunodupudo su tov kemi ikuduka'bwo'dowo'jure tovida'ai kevu kuudo guureji aro yau'dupudogaikikono. Oo nevu ma'no ma'no pasudo toorai manyu tomuu neya amodukwopiyogawano. Su toro kuudo yauropi kevnokwe togaikul kworado jumwonyo'moneyokwe kevu guureji dodowiyoku'bworosodupudogaikikono. Aki kevu kaiya'no pasudo puvino surodo ikuunodowodogaikikono. Aki kevu Gooti toollu kwako tomuu'aro wiyodupudogaikikono. Aki nuu kemi bekuru'mallo'moneyokwe tovino guureji ikullunodowodogaikikono. Aki kevu sugupasudo molludo'movlaiyo'mo ikullunodowodo togaikulluno tov womdo guureji yodupudogaikikono. Aki kevu kaiya'no pasudo tovi kirumwallo'moneyokwe kuudo me'no saullajupogaikikono. Kemoro yiuwi'nokai su toro mujumovla'mdupudo tov kuu'maiyo toru'no aro nekuduuwallunodupudogaikikono. Nevu sugudo to'no yodowadonogano. Su toro nekuduuwallunodopure togaikullu me'no wonekuma'dowadonogano.

2 Koorin 9:10

A'mwo pwol Gooti toolluro ikulwiyo wiyodowo'jure tokwe marowo'ji gami womdo tovi movlollosodowodekono. Aki Gooti tool a'mwo su toollu wosamujuko nonyo'moneyokwe bret tov wiyodowodekono. Toro te Gooti su tool kemoro ikulwiyo pulolloso'moneyokwe tov bwotonyago youllosumelawo'ji ikullamwalonekono. Toro to'busuko kubalno Gooti toolluro ikullabodowo'jure tovida'ai kemoro sugupasudo amolludo'movlapi ton sulo bwotonyago ki'nugovla'mwalpinogano. Toro ki'nugovla'mdopure tonyu bwotonyago mollu'bworosumwalpinogaikikono.

Efesos 5:9

Bako su tov sulo ilaiyo ton ki'nodowodokwono. Toro te bako su tov kemoro poowokalago tonyu pwopiyodowo'jure toga sulo aro ton ki'nonokwono. Yiuno ilaiyo mujumovlaiyo'moneyokwe togai'aro sugupasudo togai'aro nebaikuuguudo togai'aro ton kemoro poowokalago tonyuda'ai nolokabupinogano.

Filipai 1:11

Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.

Filipai 4:8

Mi avalobuuravoo, nuu aiyowo'mo yogalo akav ikudumo'mokwono. Kevu noonyumwonyu nebal'no pasudo togai'aro pasudo punyuno ilaiyodeyo dodupudo togai'aro pasudo idopto'nodo togai'aro kaiya'no nonagutokwe pasudo togai'aro pasudo sugumaluko togai'aro ilaiyo jugollo'mo pasudo togai'aro yiuwi'nokai pasudo su tonyuno kuudo neya jou'movlavogaulo. Aki noonyumwonyu pasudo kuuroollumaluko togai'aro aki ilomodomoropiyo'mo pasudo togai'aro kunyuno kuruv kuudo neya jou'movlavogaulo. Yiuwi'nokai pasudo su tollovo kemoro kuudo tonyu neya aullo'movaikwopiyogapuro.

Kooloosi 1:10

Toro ikullabodowo'jure togai kevu aro tomgu'aro nokwo yomjomwekovla'mwalpinogaikikono. Yiuwi'nokai toga kevu Aguto toolluro sumdo tovi po'dogalo mujumovlavopi ilaiyo to'no igolmwalpinogaikikono. Aki kemoro yiuwi'nokai sugupasudo judo'no judo'no amjumovlapi su ton sulo ilaiyo tollovobusuko nokwo ki'numwalpinogano. Aki Gooti toolluno kuudo pugai'aro youromo'movlavopi aguto nokwo yogullumelamwalpinogaikikono.

1 Tesaloonaika 2:7

Aki Krais toolluro kuurotokwe toonolluno tov kemi guureji nokwo adaikumuurolowa'jujukonogano. Toro kwonol kuruv kemi anakuuto tomuu mwalodowa womdo sajuuwo to'gwowi yiuno kavo to'no aikubemwojajuwonogano. Su tov aro to'busukokwono. Abolo puruv gami kwolaiyo toollu amdo yausowo'ji pi'mwono mollomwallo'moneyokwe uubemwojodowodokwono. Su toro to'busuko kubalno nevu kemi telluneyago tonbusuko ikullumo'nodowa pi'mwono mollekumwallo'moneyokwe kaveno aikubemwojajuwonogano.

1 Timooti 5:21

Nuu Gooti tooke'aro Krais Jisaseke'aro gamoro ensel toorogai'aro tooravuro muugonanuwo'dopure toru gumi guureji aro adagujumono. Moro yogalo me'no adagubwemwako akanyu guu neya duumjunogawono. Toro tooku a'mwo abolo pun gomno gomno somuudeyapinpi tov guu a'mwo abolo yiuno avalo punyuno kuu'dello nuubwemwalbiyo. Toro kweku kuruv yiuwi'nokai tonyu yiuno aval'no neya jugologawono.

2 Timooti 2:24

Toro te kuudo neya jaurono. Aguto toolluro a'mwo womdokwe pwol molo nyumwalo'jo. Toro kwol kuruv yiuwi'nokai a'mwo abolo tonyu ilaiyo to'no neya igolmovla'mwalonekono. Aki toro tool nebal'no yogalo tokwe nokwo yodubwasonekono. Aki toro tool a'mwo pworavuro amolloluwosupi kuga kuruv sumwoluko su'mno yere mimo'nonekono.

Taitos 1:15

Neya duu'nyulo. A'mwo abolo pun Gooti toolluro sumdo tovi kaiya'no nonagutokwe me'no wimo'nodupudogano. Toro ton kuudo yau'dupudogano. Oo buro'nyo buro'nyo wosamujukodeyo oo noonyumwonyu puru'monodo kuruv nemi kaiyako mamollugolanekumopinonogano. Kuudo yau'dupudogano. Toro kuvi kuruv Gooti toolluro sumdo tovi a'mwo abolo kaiya'no kuumwiyo wimo'nodupudo tono'gwowi Krais Jisasolluno kuudo ku'nono muubweyodupudogano. A'mwo abolo su ton kuudo yau'dupudogano. Oo yiuwi'nokai ton nemi kaiyako nomollugolanekumopinonogano. Kuudo yau'dupudogano. Su toro tonyuro kuudo toorogai'aro aki kemi poowokalago tonyu dumul'mwojo'moneyokwe kuudo kuuluuwo'dupudo toorogai'aro su tooro kaiyako me'no igolamo'nodupudogano.

Taitos 3:2

Aki kevu a'mwo pwolnodo kwolluno kuruv burolyogalo madopi molo yogalo nyoullajunmwalpiyo. Toro kugaikul kuruv yiuwi'nokai a'mwo abolo tonyu kavo uubemwojopi ilaiyo to'no neya jugolmovlavogaulo.” Su toro tonyuno neya duudogawono.

Hibruu 12:11

Toro te Gooti su tool gamoro kwoloraiyo tonollu kuudo anekuuteyo'ji toga'gwono nevu ilaiyo mibwosunowa'ji jul'nyo to'no ibwosunodowadonogano. Toro kuvi kuruv lukomgu toga'no'gwowi sulo ne'nonokwono. Sulo ki'nono su tov arokwono. Gooti tool gami kwoloraiyo pubuurai kuudo me'no kuuteyo'ji toga su tobuuro sumwoluko kavo wosunmwalpinogano. Aki toro tobuuro pasudo idopto'nodo tollovai molludo'movla'mwalpinobuurogano. Sulo su tov toro ki'nonokwono.

Hibruu 12:14

Kevu yiuwi'nokai a'mwo abolo togai sumwoluko noullo wosunyo'moneyokwe tovino womdo neya jogaulo. Aki kevu Gooti gavnokwe toolluro sugupasudo tollovai mujumovlaiyo'moneyokwe womdo neya jogaulo. Gooti gavnokwe toolluro sugupasudo su tollovai a'mwo pwol nonaguto sumo'no'ji su toolno'gwowi Aguto toollu ku'nono mwononekono.

Jems 1:17

Yiuwi'nokai sugudo ma'dowado togai'aro yasuwa'wino sugumaluko ma'dowado togai'aro ton nemi Nellunumiyago Gooti tool muunyu kai'muuda'ai wolomonekwopiyabodowodogano. Nemi Nellunumiyago su tool kuujo tooke'aro lobako tooke'aro sullugabwo togai'aro yiuwi'nokai bakokwe su tonyu sokwollosokaikono. Gooti sokwollosoka su tool wakuunonabolo to'busuko pumgu'aro mamoropiyodowodekono. Toro kwol kuruv yiuno aval'no imo'nyokwekono.

Jems 1:5

Aki kemida'ai pweku pi'mwo kuudo tovino supto subi tov Gooti toollu pi'mwo kuudo pun agujabwoneyokwe tovino neya duudoganogawono. Toro kuudoganbi tookuji Gooti tool yogalo mamodagujurugolonekono. Nemi Gooti su tool yanyagekono. Toro toolluno tov pi'mwo kuudo tovino kuudoganbi su tookuji kuvinono nogujabwonekono.

Jems 2:13

Neya duu'nyulo. A'mwo pwol a'mwo gabovo pwekwojuno kalo mamamwonyo'ji tov Gooti kwol kuruv kooti yogalo aduuwiyo'ji toga a'mwo kalomaiyo su toolluno kalo mamamwonyonekono. Toro kuvi kuruv a'mwo pweku a'mwo abolo punyu kalo amamwonyubi su tookujuno'gwowi Gooti tool kooti yogalo adagujo'ji toga gumino kalo nomagumwonyonekono.

Jems 2:4

Kevu a'mwo su toorallu aval'no mamollomapi tov kevnokweyogaikul imgu amgu yeru'mdeyapinopi kemi ma'no ma'no kuudo kuulaikwo'dupudo tonyu uumjunpinogaikikono. Neya duu'nyulo. A'mwo kooti yogalo mollomwalokwe pworo ma'no ma'no kuudo kuuluuwo'dopure tokwe jainyubwo'dupudo toorobusuko imo'nupinogaikikono.

Jems 3:15

Neya duu'nyulo. Pasudo su toval Gooti toolluro ago muunyu kai'muuda'ai mwolabolovakono. Toro kuvi kuruv kwako akavida'aiyovakono. Aki kuudo uumdo tovida'aiyovakono. Aki kuudo su toval Satanyolluda'ai bodubulovakono.

Jems 4:8

Kevu Gooti toollu wobo toru kuuru'mapi tov Gooti kwol kuruv kemi wobo toru nobekuru'ma'mwalonekono. Kevu ma'no ma'no amjumovlapi to'gwowi kemi ma'no ma'no pasudo su toorai kevnokwe togaikul neya domollol'movodukwopinogaulo. Aki kevu pugaikul Gooti toollu uumjunyo'mo tovino kuudo noullo maullo saupi kugaikul kuruv kemi poowokalago tovida'ai ma'no ma'no kuudo kuulaikwo'dupudo su tooro neya domodukwopiyogaulo.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 2:1

Kevu aiyo me'no sumo'nopo tovino tov kevnokweyogaikulluro yiuwi'nokai ma'no ma'no pasudo toorai neya domodukwopiyogaulo. Kemoro magu'nyo toorogai'aro kuunano yogalo toorogai'aro kuunano pasudo toorogai'aro kwekuullu kuudo toorogai'aro yiuwi'nokai bwolomorumwogapiyo'mo yogalo toorogai'aro pasudo su toro toorai neya domodukwopiyogaulo.

1 Pita 2:18

Kevu ki'nato womdokwe togaikul kemi kwako akavida'ai a'mwo mido mollomwalokwe toorai ilaiyo to'no neya jugologaulo. Aki kemoro yogalo ikudodopure tonyu neya duumjunogaulo. A'mwo mido mollomwalokwe su tooro kemi yiuno pasudo ilaiyo tokwe kavo ikubemwojodopure toga'no kevu nuumjunmwalpiyo. Toro kugaikul kuruv a'mwo mido mollomwalokwe su tooro kemi magu'nyo saikullugolpi kuga kuruv neya duumjunogaulo.

1 Joon 3:18

Toro te mi kwoloraiyobusukobuuravoo, nevu a'mwo abolo pubuuraino kalo buuropino mollo'moneyokwe tov yiuno yogalo tokwe to'no aro nodumwala'jo. “Oo nuu gumino kalo buuropino anyunadopiyo.” Nemi mago tokwe to'no su toro nodumwala'jo. Toro kuvi kuruv nemi pasudo nebal'nodo tovi'aro to'gwowi kalo buuropino pasudo su tokwe neya amollogawano.

1 Joon 3:3

Aki yiuwi'nokai a'mwo abolo Krais su toolluno sogwollo winodupudo ton aro kuudo yaullokweyogano. Krais kaiya'no pasudo puru'monodo kuruv migolamo'nodowodo su toolbusuko kubalno nevu kaiya'no pasudo puru'monodo kuruv nyugolamo'numwala'jo. A'mwo abolo Krais toolluno sogwollo winodupudo ton su toro kuudo yaullokweyogano.