1 Joon 4:6 - Gooti Toolluro Yogalokwono

⁶ Toro kuvi kuruv nev tonolno'gwowi Gooti toolluronogano. Aki nemoro yogalo moruudodowa'jure tovi yiuwi'nokai a'mwo abolo Gooti toolluno kuudo youroma'dupudo ton kaduko nekuu'nodupudogano. Nevu su toro tonyuno aro iworovomallokwenogano. Oo Kuullo kuuluumwalodowodo tool nebal'nodoldeyo, iworovomallokwenogano. Toro kuvi kuruv Gooti toolluro a'mwo abolo mwimo'nodupudo tono'gwowi nemoro yogalo moruudodowa'jure tovi kaduko manekuu'nodupudogano. Toro manekuu'nodupudo su tovi'aro nevu aro iworovomallokwenogano. Oo kuullo kuunano youkuu'najokwe tool a'mwo abolo su tonyu kuuluumwalodowodoldeyo. Su toro tovi'aro iworovomallokwenogano.

1 Joon 4:6 Σταυροειδείς Αναφορές

Luuk 10:22

Toro wuujuno sumaiyokwe aki a'mwo abolo tonyu aro kuudokaikono. “Nuu yiuwi'nokai tonyu mido mollomwalmwalmo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo tov yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo tov youroma'dumdekono. Aki yiuno gamoro Kwolaiyo judo toonyu a'mwo abolo punyu moro Nyunumiyago toolluno kuu'maiyo toru nokwo wuuduuwallumonyugono. Su toro wuuduuwallodo'mure tovida'ai to'no a'mwo abolo su ton moro Nyunumiyago toolluno kuudo nokwo youromapinekono.” Kuudokaikono.

Joon 10:16

Aki nuvu sipsip pworogai'aro kurukwenyugono. Sipsip su tooro sipsip kuurupto tovi anakuuto tomuu mamwalodupudorogano. Toro kuvi kuruv sipsip gabovo su toorogai'aro mokabo'mi sumdomguda'ai sipsip toorogai neya moguro'mwojosumonyugono. Toro amokami su tooro moro yogaimaguurai tovi kaduko nyumwalpinorogano. Aki yiuwi'nokai sipsip amoguro'mwojosumi su tooro mollu'bwoto yiuno puru'mono imo'nupinorogano. Yiuwi'nokai sipsip su toorai duuwatokwe tool yiuno pwolnodonyugono.

Joon 10:27

A'mwo abolo moro sipsip tonbusuko nonyumo'nodupudo tono'gwowi moro yogaimaguurai tovi kaduko yodupudogano. Nuvu su toro tonyuno kuudo me'no youroma'dumdonyugono. Aki toro ton mi numjunodupudogano.

Joon 10:3

Aki a'mwo pwol sipsip kuurupto tovuro noullo tovi mollomwalodowodekono. Toro te a'mwo noullo tovi mollomwalokwe su tool a'mwo duuwatokwe toollo'mo kudo'aiko tovi kuusubweyodowodekono. Toro te a'mwo sipsip duuwatokwe tool noullo su tovi'aro kuulawo'ji kuurupto toruda'ai gami sipsip toorai deko kuuloduuwopiyodawodekono. Toro kuuloduuwopiyodowo'jure tovi sipsip tooro gamoro yogaimaguurai tovino me'no iworovomaropi kwollomno bodupudorogano. Aki duuwatokwe tool sipsip go'no go'nodo tooravuro yovo tonyu domarowo'ji sipsip kuurupto tovida'ai bomogaibworomokalokwodowodekono.

Joon 13:20

Jisasol toro wuujuno sumaiyokwe aki aro kuudokaikono. “Nuvu nebal'no kuunodo ikudumo'mokwono. A'mwo pwol moro amorapimi toollu ilaiyo amollomaro'ji tov nuu kwonyuda'ai ilaiyo mollonumaronekono. Aki su toro to'busuko kubalno a'mwo pwol mi ilaiyo amollonumaro'ji tool mi amonuwopiyaboka kwolluda'ai kuruv ilaiyo mollomaronekono.” Kuudokaikono.

Joon 14:17

Toro te Kuullo su tool Gooti toolluno yogalo nebal'nodo tov yodekubwasumwalonekono. Toro toollu kwako akavida'ai a'mwo abolo kuudo manubwepi ton mamapinekono. Toro ton kwollu mwonoma'dupudo tovino tov ku'nono mamapinekono. Toro kuvi kuruv kevno'gwowi su toolluno kuudo me'no youroma'dupudorekikono. Toro tool aga kevuge mujomwekovla'mdowodekono. Aki toro tool lukomgu kemi kuulekumwalowo'ji yiunokuudo mujomwekovla'mwalonekono.

Joon 15:26

Toro kuvi kuruv nuu moro Nyunumiyago toolluda'ai kemi ikullo'mwojo'moneyokwe tool nomekwopiyamonyugono. Toro amekwopiyami su tool Gooti toolluro Kuullo yiuno nebal'no yogalo to'no jokwe tookono. Moro Nyunumiyago toolluda'ai amekwopiyami su tool bowo'ji numino kuu'maiyo toru'no nododoluwosonekono.

Joon 16:13

Toro kuvi kuruv Gooti toolluro yiuno nebal'no yogalo to'no jokweyo Kuullo su tool abwo'ji toga'no'gwowi moro yiuwi'nokai kuuguudo aikudadokwo su tonyuno kavlo ton kuu'maiyo toru nobomollolupto'naikubweyonekono. Aki Kuullo su tool lukomgu imo'nono tonyuno nekudonekono. Kuullo su tool gavnokweyolluro kuudo tovida'ai maikudonekono. Toro kwol kuruv yiuno moro Nyunumiyago toolluda'ai marowo'ji ikudumwalonekono.

Joon 18:37

Jisasol toro wuujuno sumaiyokwe toga Pailatol aro kuudokaikono. “Guu a'mwo aguto kig pwekudukono?” Toro kuudoka tovi Jisasol aro kuudokaikono. “Mino tov, a'mwo aguto kig pwekono, anyudadokuudo su tov guvnokwe tooku kuvi anyudadokuuno. Nuvno'gwowi kwako akavi sonumaropo tov womdo yiuno puru'mono yo'moneyokwe tovino kwolabonyugono. Womdo su tov arokwono. Nuu nebaikuuguudo tokwe kuu'maiyo toru'no moruudomollo'moneyokwe kwako akavi kwolabonyugono. Toro te yiuwi'nokai a'mwo abolo nebaikuuguudo tokwe molluulnoda'mdupudo ton mi kaduko nyabodupudogano.” Kuudokaikono.

Joon 20:21

Toro yodopure toorai Jisasol aki aiko te aro kuudokaikono. “Kemoro sumwoluko ton kavo to'no doosunyulo. Moro Nyunumiyago tool mi amonuwopiyabokaikono. Toro to'busuko kubalno nuu kev kworekullu kuruv a'mwo abolo kwako akavi mwalodupudo tonyomno amekwapimono.” Kuudokaikono.

Joon 8:19

Toro kuudoka tovi aro kuudoganoporogano. “Gumi Junumiyago tool gadomuu domwallo?” Toro kuudoganopo tovi Jisasol kuudokaikono. “Kevu numino kuudo miyouronuma'mwakopo tovino tov moro Nyunumiyago kwolluno kuruv kuudo miyouroma'dupudorekikono. Kevu mino kuudo souronumaropujuko'mno'juki moro Nyunumiyago kwolluno kuruv kuudo nokwo souromaropujukorekikono.” Kuudokaikono.

Joon 8:23

Toro yajunodopure toga Jisasol yogalo purukwe'aro kuudokaikono. “Kevu dolago tomuuda'aiyorekikono. Toro kuvi kuruv nuvno'gwowi muunyu kai'muudaiyonyugono. Aki kevu kwako akavida'aiyorekikono. Toro kuvi kuruv nuvno'gwowi kwako akavida'aiyonyumaiyo.

Room 1:1

Nuugeravoo, mino yovo tov Poololenyugono. Toro toonyu Krais Jisasolluro ki'nato womdokwe pwonyugono. Jisasol gavnokwe tool gamoro kuurotokwe wimo'nyo'moneyokwe mi donumaro'no Gooti toolluro kuuguudo sugudo tokwe moruudomollo'moneyokwe ajanubweyokanyugono.

Room 11:8

Su toro tonyuno Gooti toolluro yogalo puruv aro sakwollungikokwono. “Gooti toolluro molloduke tovida'ai kemoro poowokalago ton dogaipo'nyo kuumwiyo imo'nodupudogano. Aki Gooti toolluro yoduke tovida'ai sumnowojo kadu'nollukullokwe tonbusuko imo'nodupudogano. Tono tono imo'nugelabodupu aga kuga kuruv kuuno sumo'nadokwopogano.” Gooti toolluro yogalo sakwollungiko puruv su toro dodowodokwono.

1 Koorin 14:37

Kemida'ai a'mwo pwol gavnokweyolluno aro kuudo sauro'ji tov, Nuvu Gooti toolluro yogalo tokwe kuurokado mollajokwenyugono. Su toro kuudo sauro'ji tool moro yogalo sokwollaikubwemo akavino donekono. “Oo Aguto toollu uumjunyo'moneyokwe yogalo'mdeyo.” Neya donekono. Aki a'mwo pwol gavnokweyolluno aro kuudo sauro'ji tov, Nuvu Gooti toolluro Kuullo toollu uumjunyokwenyugono. Su toro kuudo sauro'ji tool moro yogalo sokwollaikubwemo akavino donekono. “Oo Aguto toollu uumjunyo'moneyokwe yogalo'mdeyo.” Neya donekono.

2 Koorin 10:7

Kevu yiuwi'nokai pasudo toorai jagillo'moneyokwe kevnokwe togaikulluro sumdo togai neya wonoma'mwalpinogaikikono. Toro wonomaropi a'mwo pwol gavnokweyolluno aro yainyunonekono. Oo nuu Krais toolluro kuunodonyugono. Toro sainyuno'ji su tool nemino aro kuudo neya yanekuu'mwalonekono. Oo Pooleke'aro gavuge avalo toorogai'aro kworo kuruv Krais toolluro a'mwo kuunodo wimo'nodupudorodeyo. Neya yanekuu'mwalonekono. Aki kuudo su tovino nyallulo'gwonmwalo'jo.

2 Tesaloonaika 1:8

Su toro kwolabwo'ji toga a'mwo abolo Gooti toolluno kuudo muubweyodupudo togai'aro a'mwo abolo nemi Aguto Jisasolluno kuuguudo sugudo tovi muumjunodupudo togai'aro su tonyu kirumwallo tokwe kaiyako nyugolonekono.

1 Timooti 4:1

Gooti toolluro Kuullo tool aro tovino kuu'maiyo toru'no dodowodekono. Aiyowo'mo toga a'mwo abolo pun kuudo me'no uubweyodupudo tovi buulo nuugunyumopipinogano. Toro ton kuunano youkuu'najokwe kuullo toorai uumjunopi aki kuullo ma'no ma'nodo tooravuro ibwaso kunyu kuruv nuumjunpinogano.

2 Pita 3:2

Kevu Gooti toolluro proofet tooravuro yogalo amodekumollajupo tonyuno aki aiko te kuudo neya jou'movlavogaulo. Aki nemi Aguto toolluro kinamjo'mo yogalo adaikullajuko kunyuno kuruv aki aiko te kuudo neya jou'movlavogaulo. Yogalo su ton gami kuurotokwe toorai'aro ikudodowodekono. Toro ikudodowodo tool Agutekono. Aki toro tool ma'no ma'nodo tonyuro kirumwallo tovida'ai nemi bomollurolovonekumokalokwodowodekono.

1 Joon 4:1

Mi ibwoto'nyobuuravoo, a'mwo bwotonyago tooro kuunano proofet imo'nodupudorogano. Toro tooro yiuwi'nokai kwako akavuro go'no go'nodo tomuu aro modomollodupudorogano. “Oo Gooti toolluro Kuullo toolluro yogalo anekullaboka tokwe amokamwakuuwono.” Modomollodupudorogano. Toro modomollodupudo tovino tov yiuwi'nokai su tooraino kevu kuudo nuubwemwalpiyo. Toro kuvi kuruv proofet modomollokwe su tooravuro kuullo kuuluumwalodupudo tooro kuunano'mdukono oo Gooti toolluda'aiyo'mdukoneyokwe tovino gallainyubwollo'mo tov kevu yamju neya duuwiyoganogaulo.

1 Joon 4:4

Mi Kwoloraiyobuuravoo, kev togaikulno'gwowi Gooti toolluro a'mwo abolo kuunodo me'no wimo'nodupudogaikikono. Aki kevu kuunano proofet su toorai me'no uuwolo'mdupudogaikikono. Kevu me'no uuwolo'mdupudo su tov aro tovinokwono. Gooti toolluro Kuullo tool kemi kuulekumwalodowodekwono. Toro tool kwako akavida'ai a'mwo su tooravuro kuullo kuuluumwalodowodo toolluno'gwowi me'no uuwolo'mdowodekono.

1 Joon 4:8

Kuudo neya jaullulo. Gooti tool yiuwi'nokai toga yiuno kalo buuropino to'no winyokwekono. Toro tovino tov yiuwi'nokai a'mwo abolo kalo buuropino mwinpi ton Gooti su toolluno kuudo ku'nono miyouroma'dupudogano.

1 Joon 5:19

Nevu aro tovino kuudo me'no youroma'dowadonogano. Yiuwi'nokai kwako akavida'ai a'mwo abolo ton kirovanyuvanyokwe Satanyolluro jurogudo tovi dolago tomuu kuuno mujomwekovla'mdupudogano. Toro kuvi kuruv nevno'gwowi Gooti toolluro kwoloraiyo kuunodo me'no wimo'nodowadonogano.

Juut 1:17

Toro kuvi kuruv kevu tobuurekulno'gwowi nemi Aguto Jisas Kraisolluro a'mwo kuurotokwe tooro lukomgu kwako akavi nyumo'nupino tonyuno me'no aikujajuporogano. Kuuguudo aikujajupo su tonyuno kevu aki aiko te kuudo neya jaurogaulo.