لواحي ن يوحنا 1:1 - ثريفيث 2020

¹ وَانِيتَا ذ لْوَحِي ن عِيْسَى لْمَسِيح. يُوْشَا-اَس-ث أَربِّـي حمَا اَث يسْمظْهَار إِ يِنِّي ث يعَبّْذن. مَانَايَا يتْخصَّا أُو لَابُد اَذ يوْقع ذغْيَا. لْمَسِيح يسّكّ لْمَلَاك نّس اَذ يخبَّر مَانَايَا إِ ڒْعَبْذ نّس قَّارن-اَس يُوْحَنَّا.

لواحي ن يوحنا 1:1 Σταυροειδείς Αναφορές

يوحنا 12:49

أَقَا وَار سِّيوْڒغ شَا زِي غَاري؛ لَّا، نش سَّاوَاڒغ نش قَّارغ زِي ڒُوْصِيّث إِي ذَايِي يُوْشَا بَابَا يعْنِي ونِّي إِي ذَايِي د يسّكّن.

يوحنا 15:15

وَار يقِّيم عَاذ اَذَاوم سمِّيغ يخدَّامن مِينْزِي اَخدَّام وَار يسِّين شَا مِين يتݣّ ؤُوقَّاف نّس. كنِّيو اَذَاوم سمِّيغ يمدُّوْكَاڒ ينُو مِينْزِي نِّيغ-اَوم مَارَّا مِين سْڒِيغ زِي بَابَا.

يوحنا 17:8

مِينْزِي نش سِّيوْضغ-اَسَن اَوَاڒ إِي ذَايِي ثُوْشِيذ، نِثْنِي قبْڒن-ث. سّْنن ذ صَّح بلِّي نش زِي غَارك إِي د ؤُسِيغ، ؤُمْنن عَاوذ بلِّي ذ شك إِي ذَايِي د يسّكّن.

يوحنا 3:32

ئِشهّذ زِي مِين يࢲْرَا ذ مِين يسْڒَا، وَلَكِن شْهَاذث نّس وَار ت يقبّڒ ؤُڒَا ذ يجّن.

يوحنا 8:26

غَارِي اَطَّاس ن وَاوَاڒن زمَّرغ اَذَاوم ثن ينِيغ، زَّايْسن إِي غَا حكْمغ خَاوم. ونِّي ذَايِي د يسّكّن نتَّا ذَايس لْحَقِيقَا. مِين سْڒِيغ زَّايس قَّارغ-ث إِ دُّنشْت."

أيث-روما 16:25

ئِتْوَابَرَاك أَربِّـي! نتَّا ذ ونِّي يزمَّرن اَذَاوم يُوْش جّْهذ س لْإِنْجِيل-أَ إِي تْبشَّارغ أُو عَاوذ س ؤُحدّث ن عِيْسَى لْمَسِيح عْلَاحْسَاب مِين د يبَانن تُوْغَاث مَانَاينِّي زِي زْمَان ينُوْفَّر.

أيث-ݣلاطيا 1:12

وَار ذَايِي د يُوْسِي زِي حَدّ، وَار ذَايِي ث سْڒمْذن شَا يِوْذَان؛ لَّا، نتَّا يهْوَا-د خَافِي ذ لْوَاحِي زِي عِيْسَى لْمَسِيح.

أيث-ؤفسوس 3:3

يعْنِي ڒْمَعْنَا ينُوْفَّرن خ لْإِنْجِيل يسْمظْهَار-اَيِي-يث-يذ يسهْوَا-ث-يذ خَافِي س لْوَاحِي مَامش ذَاوم ت ؤُرِيغ شْوَايْت زِي قْبڒ.

ثبرات غار تيتوس 1:1

نش ذ بُوْلُس ذ اَخدَّام ن أَربِّـي ذ اَرَّسُوْل ن عِيْسَى لْمَسِيح خدّْمغ عْلَاحْسَاب يِنِّي إِݣ يخْضَر أَربِّـي بَاش اَذ اَمْنن اَذ سّْنن لْحَقِيقَا إِي ثن يسݣُّوْرن غَار مِين يدْجَان نِيشَان ذِي لْإِيمَان.

لواحي ن يوحنا 1:19

أَرِي مِين ثࢲْرِيذ، ذ مِين يتوْقِيعن ڒخُّو، ذ مِين غَا يوقْعن سَّا اَڒ ثْسَاونْت.

لواحي ن يوحنا 1:9

نش ذ يُوْحَنَّا ذ ؤُمَاثْوم، شرّْشغ اَكِذْوم ذِي ڒمْحَاين ذ ڒْمُلْك ن أَربِّـي ذْ صّْبَار إِݣ يدْجَان ذِي عِيْسَى. تُوْغَا دْجِيغ ذِي ثيْزِيْرْث ن بَطْمُس عْلَاحْسَاب اَوَاڒ ن أَربِّـي ذ مِين خف يشْهذ عِيْسَى.

لواحي ن يوحنا 17:1

يُوْسَا-د غَارِي يجّن زِي سبْعَا ن لْمَلَائِكَاث نِّي إِي غَار دْجَانْت سبْعَا ن ثْمجْمَارِين ينَّا-ٱيِي: "أَرَاح-د، أَذَاش د سْمظْهَارغ لْحِسَاب ذ لْعِقَاب ن لْفَسْدَا ثَمقّْرَانْت إِݣ يقِّيمن خ وَاطَّاس ن وَامَان.

لواحي ن يوحنا 19:10

وْضِيغ-اَس غَار يضَارن نّس حمَا اَذَاس سجّْذغ. ئِنْدق-د ينَّا-ٱيِي: "لَّا! قَا نش ذ ڒْعَبْذ اَم نش اَم شك اَم اَيْثْمَاش إِي طّْفن خ مِينْخف يشْهذ عِيْسَى. سجّذ-اَس إِ أَربِّـي! ڒَاحقَّاش مِينْخف يشْهذ عِيْسَى نتَّا ذ اَرُّوْح ن لْأَنْبِيَا."

لواحي ن يوحنا 19:9

ينَّا-ٱيِي لْمَلَاك ونِّي: "أَرِي مَانَايَا: سَّعْذ ن يِنِّي يتْوَاعَرْضن غَار ومنْسِي ن ڒْفَارْح ن يِزْمَار!" ينَّا-ٱيِي عَاوذ: "أَوَاڒن-أَ دْجَان ذ صَّح زِي أَربِّـي."

لواحي ن يوحنا 21:2

ࢲْرِيغ ثَنْدِينْت يقدّْسن نتَّاث ذ لْقُدْس ذ جْذِيذ. ثهْوَا-د زݣ وجنَّا زِي أَربِّـي ثݣَّا اَم ثسْڒِيث ثعْذڒ يخف نّس بَاش اَذ تڒْقَا مُوْڒَاي.

لواحي ن يوحنا 21:9

يُوْسَا-د غَارِي يجّن زِي سبْعَا ن لْمَلَائِكَاث نِّي إِي غَار دْجَانْت سبْعَا ن ثْمجْمَارِين إِݣ يعمَّرن س سبْعَا ن لْمُصِيبَاث نِّي ثِنْݣُّوْرَا، ينَّا-ٱيِي: "أَرَاح-د، أَذَاش د سْمظْهَارغ ثَسْڒِيث، يعْنِي ثنِّي غَا يَاوِين يزْمَار."

لواحي ن يوحنا 22:1

ئِسْمظْهَار-اَيي-د لْمَلَاك نِّي يغْزَار ن وَامَان ن ثُوْذَارْث صْفَان اَم جَّاج، ئِتفّغ-د زِي لْعَرْش ن أَربِّـي ذ يِزْمَار

لواحي ن يوحنا 22:16

ذ نش عِيْسَى سّكّغ-د لْمَلَاك ينُو حمَا اَذَاوم يشْهذ خ ثْمسْڒَايِين-أَ ذِي ثْجُمَاع ن ڒْمُوْمِنِين. نش ذ لْأَصْل ن دَاود أُو زِي دُّوْرِّيث نّس. نش ذ يثْرِي ن ڒفْجَر يتْشعْشِيعن."

لواحي ن يوحنا 22:6

ينَّا-ٱيِي لْمَلَاك ونِّي: "أَوَاڒن-أَ ذَايْسن ڒَامَان ذَايْسن ڒْحَقّ. أَربِّـي نتَّا ذ مَوْلَانَا إِي د يسهْوَان لْوَاحِي خ لْأَنْبِيَا، ئِسّكّ-د لْمَلَاك نّس حمَا اَذ د يسْمظْهَار إِ يِنِّي ث يعبّْذن مِين لَابُد غَا يوقْعن عْڒَاين."

لواحي ن يوحنا 22:8

ذ نش يُوْحَنَّا إِي سْڒِيغ، ࢲْرِيغ ثِمسْڒَايِين-أَ. وَامِي سْڒِيغ، ࢲْرِيغ مَانَايَا، هْوِيغ اَذ سجّْذغ غَار يضَارن ن لْمَلَاك نِّي إِي ذَايِي د يسْمظْهَارن ثِمسْڒَايِين-أَ.

لواحي ن يوحنا 22:9

ينَّا-ٱيِي: "لَّا! قَا نش ذ ڒْعَبْذ، أَم نش اَم شك اَم أَيثْمَاش لْأَنْبِيَا ذ مَارَّا يِنِّي يتݣّن اَرَّاي إِ وَاوَاڒن ن لْكِتَاب-أَ. سجّذ-اَس إِ أَربِّـي."

لواحي ن يوحنا 4:1

منْبَعْد إِ مَانَايَا ࢲْرِيغ يجّن ن ثوَّارْث ثْنُوْرْزم ذݣ وجنَّا، سْڒِيغ إِ ثْمِيجَّا نِّي إِي غَارِي د يسِّيوْڒن زِي قْبڒ صُّوْت نّس يݣَّا اَم زَّمَّار، ثنَّا-ٱيِي-د: "ݣَعّذ-د ذَانِيتَا اَذَاش د سْمظْهَارغ مِين لَابُد غَا يوقْعن منْبَعْد إِ مَانَايَا."

لواحي ن يوحنا 5:7

يُوْسَا-د ييْسِي لْكِتَاب-أَ زݣ وفُوْس اَفُوْسِي ن ونِّي يقِّيمن خ لْعَرْش.