Vuu ɓɔɔ zang nwangsɛ Yɔhana 2:10 - Nyaa Shɔɔ Ɓɔɔ Laa a Ɓɛɛ

¹⁰ Nɔ́ɔ kaa vɔrɔ jĩng dannang ɓɔɔ yaa kaa tɔkɔlɔng nɔɔ dǎng kaa tɔ kaɓa kpang. Nɔɔ ɓaa shoo, Sheetang naa gãsɛ nɔɔ ditɔ, naa shingnɛ zang wu mã zang ɓɔɔ ka teteng manɛ ka sãa. Zang naa dang nɔɔ jĩng diki kopi kɔ nwani. Nɔ́ɔ yaa danggn ɓɔɔ nɔɔ shing ka bii mɛɛ kpang, naa zang nyɔ nɔɔ doo vɔrɔ ɓɛɛ. Tɔ̀ɔ, n a nɔɔ suru bii ɓɔɔ waa nyaa kpang, nɔ́ɔ walɛ bannang kati.

Vuu ɓɔɔ zang nwangsɛ Yɔhana 2:10 Σταυροειδείς Αναφορές

Matiyu 10:22

Zang piti ri naa bɛ̃ɛ nɔɔ ditɔ, ka ruu nung mɛɛ. Shɔnzang ɓɔɔ nɛɛ mã danggn sasak, wukɔ naa wɔrɛ.

Matiyu 10:28

Nɔ́ɔ kaa vɔrɔ zang ɓɔɔ ri nyɔ gãmpãng bii, a ri zunung ɓɔɔ ri nyɔ suru bii kpang ɓɛɛ kpang. Nɔɔ Kaa vɔrɔ Kpanti Laa ɓɔɔ nyɔ gãmpãng bii nɛɛ suru bii piti, ka nɔng ɓɔɔ waa ning ɓi jong kpang ɓɛɛ.

Matiyu 24:13

A zang ɓɔɔ nɛɛ naa mã danggn sasak, wukɔ naa wɔrɛ.

Maraku 13:13

Zang piti, ri ti naa bɛ̃ɛ nɔɔ ditɔ ka ruu mɛɛ, shɔnzang ɓɔɔ mã danggn sasak wukɔ naa wɔrɛ.

Maraku 8:35

Ka ruu ɓɔɔ, zang ɓɔɔ kasɛ nɛɛ wu ta yuu ɓiɓɛ, naa loo ɓi katɔ kɔ jong ɓɛɛ. A Zang ɓɔɔ loo yuu ɓiɓɛ ka ruu mɛɛ, nɛɛ ka ruu, Ruu Tɔ̃ɔ Laa, wukɔ naa ta yuu ɓiɓɛ ɓi jong.

Luka 21:12

Ɓɔɔ diki keɓe à gn kpang, zang yi nɔɔ zang ti dang nɔɔ jĩng. Zang a nɔɔ rɛɛ zang bang bang gãa zɔɔ kpalɛnang, ri jɛ̃ɛ nɔɔ ruu, ri loo nɔɔ ka sãa. Zang daa nɛɛ nɔɔ ka bii kpanti, nɛɛ bii gɔmna, ka ruu ɓɔɔ, nɔɔ ráng yee mɛɛ ɓɛɛ.

Yɔhana 12:25

Zang ɓɔɔ nɛɛ kasɛ suru bìí ɓiɓɛ dɔɔli, shàarɛ́ ɓi katɔ kɔ̀ jong. Zang ɓɔɔ nɛɛ kasɛ ruu suru bii ɓiɓɛ ka koo keɓe kpang, shing ɓi katɔ ka ruu suru bii ɓɔɔ waa nyaa kpang ɓɛɛ.

Yɔhana 13:2

Yeesɔ nɛɛ zang ɓɔɔ ri mantɛ vuu ka bii ɓiɓɛ, ri shaa vuu shaanang laarang kana. A sheetang shìng Yahuda Isikariyoti jaa Siman, rɛ̃rɛnang tɔ, ka yeti ɓiɓɛ nɛɛ wu nyɔ yuu Yeesɔ.

Yɔhana 13:27

Ɓɔɔ Yahuda ta borodi hn, sheetang ta rɛ̃rɛnang ɓiɓɛ. Yeesɔ kɔɔ wu tɔɔ, “Vuu ɓɔɔ mɔɔ mangnɛ, nɛɛ mɔɔ palɛ ɓɛɛ, palɛ ta pati.”

Zang Shonang Yeesɔ 20:24

N ti tɔɔ m kpang nɛɛ suru bii mɛɛ daa naa vuu ɓɔɔ tɔ kpang. Ǹ kasɛ n palɛ vuu ɓɔɔ zang shong m ɓɛɛ, n ti hangsɛ shonang ɓɔɔ Kpanti Yeesɔ a m nɛɛ n palɛ ɓɛɛ. Shonang ɓɔɔ nɛɛ n kɔɔrɔ zang rúu, ka yuu tɔ̃ɔ ɓɔɔ Laa pàlɛ́ zang ɓɛɛ.

Zang Shonang Yeesɔ 21:13

A kasɛ ruu nyaa tɔɔ, “Nɔɔ palɛ ɓu vi, nɔɔ káarɛ̀ nɔngkɔ, nɔɔ lɔɔrɔ m sisĩng viya? N daa Urushalima keɓe m katɔ. Ri nɛɛ kasɛ ri mã m katɔ kɔ shɛ̃ɛning kpang, ri nyɔ m vɔrɔ ka ruu nung Kpanti Yeesɔ, n kasɛ m tɔ.”

1 Koranti 9:25

Zang ɓɔɔ nɛɛ tɔɔ wu yurɛ, kpɛ̃ɛrɛ yuu ɓiɓɛ doo yunang waasɛ̃. Wu zãa yuu ɓiɓɛ vuu dɔɔli. Ri pálɛ̀ nɔngkɔ nɛɛ, tɔ̀ɔ, zang a ri vuu ɓɔɔ naa lasɛ katɔ ɓɛɛ. Ruu palɛ ɓuru nɔngkɔ, tɔ̀ɔ, zang a ruu vuu ɓɔɔ lasɛ kpang dòndòng ɓɛɛ.

Afisa 2:2

Ka laa kaɓa, nɔɔ nwang manɛ nwannang keɓe kɔ, nɔɔ dũlu manɛ gbalang vuu shi kpang ɓɔ̀ɔ́ koo keɓe. Nɔɔ ɓaa shoo manɛ ka nyaa kpanti rɛɛ suru shi kpang. Suru keɓe kɔ ka yeti zang ɓɔɔ ri dũng nyaa ɓɔɔ Laa dang ɓɛɛ kpang ɓɛɛ.

Afisa 6:12

Ka ruu ɓɔɔ, ruu gáa nyaa wu nɛɛ shɔnzang kpang ɓɛɛ. Ruu gaa nyaa ɓuru nɛɛ rɛɛ suru ɓɔɔ yeti ɓarɛ shi kpang, ɓɔɔ ri ka lapa ɓɛɛ, a ɓɔɔ kaa nɛɛ rɛɛ naa vuu palɛnang, nɛɛ rɛɛ kpanti koo jaa knti keɓe ɓɔɔ tɔ̀ɔ katɔ ɓɛɛ.

Yakubu 1:12

Zang ɓɔɔ zang nɛɛ gãsɛ wu, nɛɛ watɛ kpang wukɔ tãa tĩnang. Ka ruu ɓɔɔ, nɛɛ shìi kakata, nɛɛ watɛ kpang, naa ta vuu ɓɔɔ Kpanti Laa tɔɔ wu a zang ɓɔɔ kasɛ wu katɔ ɓɛɛ. Vuu keɓe wukɔ suru bii ɓɔɔ waa nyaa kpang ɓɛɛ.

1 Bituru 5:4

Naa nɔɔ palɛ nɔngkɔ, ka diki ɓɔɔ Yeesɔ Kirisi ɓɔɔ wukɔ kpanti jagãng tusu yuu ɓiɓɛ nɛɛ tɔ̀ɔ, zang piti ri zi wu nɛɛ jĩng, naa a nɔɔ bannang. Zang kãng nɔɔ lapoo yuu kpanti ɓɔɔ kɔlɔ katɔ ɓɛɛ ka yuu. Kɔlɔnang lapoo keɓe tù ɓi kpang dòndòng.

1 Bituru 5:8

Nɔɔ yiti yuu manɛ waasɛ̃ nɔɔ ti gãng jĩng waasɛ̃, sheetang zang ɓɔɔ shing jĩng nɛɛ nɔɔ kpang kaɓa rakɛ nɛɛ nɔng piti piti. Nwang ɓi zing ɓɔɔ shaa varɛ ɓɛɛ, kãa vuu ɓɔɔ wu shaa ɓɛɛ.

Vuu ɓɔɔ zang nwangsɛ Yɔhana 13:14

Tuu vuu ɓɔɔ zang a wu naa palɛnang ka tĩng yɔpɔ jĩngti ɓɔɔ tĩng shɔɔnang kaɓa, a nwãarɛ zang piti, ɓɔɔ ri nwalɛ ka koo nandon nɛɛ mani. Kɔɔ ri nɛɛ, ri pálɛ́ vuu ɓɔɔ nwang yɔpɔ jĩngti ɓɔɔ tĩng shɔɔnang, ɓɔɔ bɛ̀ɛ́ zang shing wu nyaa vuu waa ka bii nɛɛ yere bang a nwang doo ningkãari ɓɛɛ, ri a wu bannang nɛɛ mani.

Vuu ɓɔɔ zang nwangsɛ Yɔhana 13:2

Yɔpɔ jĩngti ɓɔɔ n zirɛ ɓɛɛ, nwang gbɛ̃ɛ, doo ɓiɓɛ naa ɓɔ̀ɔ́ vuu jĩngti ɓɔɔ zang ɓaa nɛɛ bíyàa ɓɛɛ, a nyaa ɓiɓɛ nwang ɓɔɔ zing. Sɔkɔ bang tuu bannang ɓiɓɛ nɛɛ kpanti ɓiɓɛ, a ɓɔɔ naa vuu palɛnang ɓiɓɛ, a yɔpɔ kaɓa.

Vuu ɓɔɔ zang nwangsɛ Yɔhana 13:7

A zang ti yaa wu nɛɛ wu ta sĩiri nɛɛ rɛɛ zang Laa wu ti shaa ri. A zang a wu naa wu roo kpanti ka yuu zɔ̃ng zang ka nɔng piti ka koo, nɛɛ zang ɓɔɔ ri rangkɛ nyaa ka bm bm ɓɛɛ.

Vuu ɓɔɔ zang nwangsɛ Yɔhana 17:14

Ri naa ta sĩiri nɛɛ Jaa Mɛ̀ɛrɛ́ Laa, a Jaa Mɛ̀ɛrɛ́ naa shaa ri katɔ, ka ruu ɓɔɔ, wukɔ kpanti ka yuu rɛɛ kpanti nandon. Kpanti roonang ɓiɓɛ, ɓa ɓɔɔ zang piti ɓɛɛ. Zang ɓiɓɛ ɓɔɔ wu zɔ̃ngkɔ, a ɓaa ri nyaa katɔ, ɓɔɔ ri dũng wu nɛɛ yeti gbete, ri naa shaa zang jong ka nyaa sĩiri nɛɛ wu.”

Vuu ɓɔɔ zang nwangsɛ Yɔhana 2:13

N zi nɔng ɓɔɔ nɔɔ nwàng gn ɓɛ̀ɛ́ tɔ, ka nɔng ɓɔɔ Sheetang roo kpanti kagn ɓɛɛ. Nɔɔ yaa kɔɔnang kpang nɛɛ nkɔ kpanti manɛ kpang. Nɔɔ yaa danggn ɓɔɔ nɔɔ shing ka bii mɛɛ kpang doo nɛɛ mani, ka laa ɓɔɔ zang nyɔ Antiba, yɔɔ ɓɔɔ dũng m nɛɛ yeti gbete vɔrɔ ɓɛɛ. Zang nyɔ wu vɔrɔ ka teteng manɛ, ka nɔng ɓɔɔ Sheetang nwang ɓɛɛ, ka ruu ɓɔɔ, kɔɔ ka shoo zang piti nɛɛ wu dũng ɓi nkɔ ɓɛɛ.

Vuu ɓɔɔ zang nwangsɛ Yɔhana 2:9

N zi jĩng ɓɔɔ nɔɔ dang ɓɛɛ tɔ. N ti zi tɔ, nɔɔ vuu ka naa kpang. A niizang nɔɔ wu vuu ka naa kpang, kpang, nɔɔ manɛ wujɛ ying. N ti zi naa ɓɔɔ zang kaɓa ɓɔɔ ri suu sèé, ri tuu yuu ɓarɛ naa ri zang Yahudi, ri rangkɛ ruu shi kpang ka yuu manɛ tɔ. Ri ɓarɛ zang ɓɔɔ ri dũng Sheetang ɓɛɛ.