Vuu ɓɔɔ zang nwangsɛ Yɔhana 1:5 - Nyaa Shɔɔ Ɓɔɔ Laa a Ɓɛɛ

⁵ Yeesɔ Kirisi ɓɔɔ kɔ̀ɔ́ ɓi ruu ɓɔɔ niizang diki diki ɓɛɛ, ɓɔɔ Laa wisi wukɔ paa shɔɔnang nɛɛ sàa, a wukɔ ti nwang kpanti ka yuu rɛɛ kpanti ɓɔɔ ka koo keɓe, wu palɛ nɔɔ tɔ̃ɔ jong, wu ti shingnɛ yeti manɛ wu valɛ katɔ. Yeesɔ ɓɔɔ kasɛ ruu katɔ, a vɔ ka ruu ɓuru nɛɛ, tɔ̀ɔ, zĩi ɓiɓɛ wu ta ruu kaa nɛɛ naa vuu shi kpang ɓɔɔ ruu palɛ ɓɛɛ.

Vuu ɓɔɔ zang nwangsɛ Yɔhana 1:5 Σταυροειδείς Αναφορές

Matiyu 20:28

Naa ɓɔɔ n Jaa Shɔnzang n arɛ, nɛɛ zang shong m shonang kpang, n arɛ nɛɛ n shong m zang kɔ jong, n ti mãlɛ́ bii mɛɛ ka ruu zang dɔɔli nɛɛ tɔɔ n ta yuu ɓarɛ.”

Matiyu 28:18

A Yeesɔ arɛ naa kɔɔ ri tɔɔ, “Laa a m naa tɔ ka yuu vuu ɓɔɔ ka lapa, nɛɛ ɓɔɔ ka tipi nandon.

Yɔhana 13:1

Bɛɛ diki nyaalaa pasika ɓɔɔ zang kpaa danggn diki ɓɔɔ Laa tɛɛ ɓɛɛ, yaa kaa tɔkɔlɔng. Yeesɔ zi tɔ nɛɛ diki a tɔ, ɓɔɔ wu yaa koo keɓe, wu daa ka bii Daa ɓiɓɛ ɓɛɛ. Yeesɔ kasɛ zang ɓiɓɛ ɓɔɔ ka koo keɓe, ka ruu nɔngkɔ, kasɛ nɛɛ wu tusu ri naa ɓɔɔ wu kasɛ ri dɔɔli ɓɛɛ.

Yɔhana 13:34

Kãntang keɓe, n dang nɔɔ kaa nyaa ɓɔɔ shɔɔ. Nɔɔ kasɛ ruu zɔɔ katɔ. Naa ɓɔɔ n kasɛ nɔɔ, nɔɔ kasɛ ruu zɔɔ doo nɔngkɔ.

Yɔhana 15:9

Naa ɓɔɔ Daa mɛɛ kasɛ m, n kasɛ nɔɔ doo nɔngkɔ. Nɔɔ yáa kasɛnang kɔ n kàsɛ̀ nɔɔ ɓee kpang.

Yɔhana 18:37

A Bilatu hɛ̃ɛ wu kati tɔɔ, “Mɔɔ ɓu Kpanti ya?” Yeesɔ kasɛ wu nyaa tɔɔ, “Naa ɓɔɔ mɔɔ kɔɔ ɓɛɛ, n Kpanti kɔ. N a ka koo keɓe, a zang yi m nɛɛ n kɔɔ zang ruu ɓɔɔ niizang. Zang ɓɔɔ nɛɛ kasɛ ruu ɓɔɔ niizang katɔ, ɓaa shoo katɔ ka yee mɛɛ.”

Yɔhana 3:11

N kɔ̀ɔ́ mɔɔ ruu ɓɔɔ niizang kɔ nwani, rùu ráng yee ɓuru, ka yuu vuu ɓɔɔ ruu zi tɔ ɓɛɛ. Ruu ti kɔ̀ɔ́ ɓuru vuu ɓɔɔ ruu zi nɛɛ jĩng ɓuru ɓɛɛ, a mɔɔ ta vuu ɓɔɔ ruu kɔɔ ɓɛɛ kpang.

Yɔhana 3:16

Laa kasɛ zang ɓɔɔ ka koo keɓe dɔɔli, ka ruu nɔngkɔ, shong nyaa nɛɛ Jaa gbete ɓiɓɛ. Nɛɛ tɔ̀ɔ, zang ɓɔɔ nɛɛ shing danggn ka bii ɓiɓɛ wu shaarɛ kpang, wu wàlɛ̀ suru bii ɓɔɔ waa nyaa kpang kɔ jong.

Yɔhana 3:32

Zang keɓe rang yee ka yuu vuu ɓɔɔ wu zirɛ, a ti tãa ɓɛɛ. A zang ɓɔɔ ta vuu ɓɔɔ wu kɔɔ ɓɛɛ, kagn gbete kpang.

Zang Shonang Yeesɔ 20:28

Nɔɔ gãng jĩng ka yuu manɛ nɛɛ zang ɓɔɔ Suru Laa, a ri nɔɔ ka naa ɓɛɛ waasɛ̃. Nɔɔ nwang jagãng zang ɓɔɔ ri dũng Laa, ɓɔɔ ri nwàng ka ruu ɓɔɔ, wu hoo ri nɛɛ zĩi Jaa ɓiɓɛ ɓɛɛ.

Zang Shonang Yeesɔ 26:23

Ri kɔɔyi tɔɔ Kirisi naa dang jĩng ditɔ, wukɔ ti naa yupaa shɔɔnang nɛɛ saa, wu kɔɔ rɛɛ zang Isirela nɛɛ zang ɓɔɔ ri zang Isirela kpang ruu nɔng yakɛnang ɓɔɔ a zang suru bii ɓɛɛ.”

Rooma 3:25

Laa a zang wu, nɛɛ zang nyɔ wu vɔrɔ, nɛɛ tɔ̀ɔ, wu nwang kaa gbalang ɓɔɔ Laa yàá shɔnzang nandon gbalang vuu shi kpang ɓarɛ ɓɛɛ. Ka ruu danggn ɓɔɔ ri shing ka bii ɓiɓɛ ɓɛɛ. Laa palɛ vuu keɓe, tɔ̀ɔ, wu tusu zang tɔ̃ɔ ɓiɓɛ. Ka tĩng, Laa mã danggn, a yee laa ka vuu shi kpang ɓɔɔ shɔnzang ri palɛ ɓɛɛ kpang.

Rooma 8:37

Wu nɔngkɔ kpang, zang ɓɔɔ basɛ ruu nɛɛ Yeesɔ kpang. Ka vuu kɔ palɛ ruu ɓee nandon zang ɓɔɔ kàsɛ̀ ruu ɓuru katɔ keɓe, yiki ruu naa kagn, ruu ɓa vuu keɓe yuu gbãng gbãng.

1 Koranti 6:11

Ɓeleng, zang ɓɔɔ ka teteng manɛ, ri nwang nwannang shi kpang keɓe kɔ. A Laa naa kɔsɔ vuu shi kpang manɛ, nɔɔ kaa kalang kalang. A shɛ̃ɛrɛ nɔɔ nɛɛ nɔɔ nwang kaa zang ɓiɓɛ. Laa zí nɔɔ manɛ kaa naa zang ɓɔɔ ri palɛ tɔ̃ɔ, ka ruu ɓɔɔ, nɔɔ a bìí ɓiɓɛ nɛɛ nung Kpanti ɓuru Yeesɔ Kirisi, a ɓɔɔ nɛɛ Suru Laa ɓɔɔ ruu bang wu ɓɛɛ.

Galati 2:20

Zang ɓaa m naa m tɔ laa nɛɛ Kirisi, ɓi tɔ̀ɔ́ nkɔ nwang ningkãari kpang. Ɓi kaa Kirisi ɓɔɔ ka bii mɛɛ kɔ nwang ningkãari. Nwannang kɔ n nwang kãntang ɓee, n nwang m kaa nɛɛ danggn ɓɔɔ n shing ka bii Jaa Laa ɓɔɔ kasɛ m, a á zang yuu ɓiɓɛ, nɛɛ zang nyɔ wu vɔrɔ ka ruu mɛɛ ɓɛɛ.

Afisa 2:4

A gn zang kɔng Laa kaa dɔɔli doo nɛɛ mani, a kasɛnang ɓɔɔ wu kasɛ ruu nɛɛ nɔɔ nɛɛ mani ti bang dɔɔli.

Afisa 5:2

Nɔɔ nwáng nwannang zɔɔ kasɛnang, naa ɓɔɔ Yeesɔ Kirisi kasɛ ruu ɓuru, a á yuu ɓiɓɛ nɛɛ zang nyɔ wu vɔrɔ ka ruu ɓuru ɓɛɛ. Suru bii ɓiɓɛ keɓe, ɓɔɔ wu a Laa, nwang kaa naa vuu ɓɔɔ á sɛ̃ɛ tɔ̃ɔ, ɓɔɔ zang dɔ̀ɔ́ Laa, a shingnɛ Laa tãa tĩnang ɓɛɛ.

Kolosi 1:18

Wukɔ zang bang zang ɓɔɔ ri dũng wu, ɓɔɔ ri nwáng kaa naa bii ɓiɓɛ ɓɛɛ. Bii keɓe walɛ suru bii nɛɛ bii ɓiɓɛ kɔ. Wukɔ jamari zang ɓɔɔ zang wisi ri paa nɛɛ sàa ɓɛɛ, tɔ̀ɔ, ka vuu piti wukɔ wu nwang kaa tĩng.

1 Timoti 6:13

Ka tĩng Laa ɓɔɔ a vuu piti suru bii ɓɛɛ, a ɓɔɔ ka tĩng Yeesɔ Kirisi ɓɔɔ kɔ̀ɔ ruu ka yuu danggn ɓɔɔ wu shingnɛ ka tĩng kpanti Pontu Bilatu ɓɛɛ, n kɔɔ mɔɔ,

1 Timoti 6:15

Yeesɔ Kirisi naa nwang nyaa ka diki ɓɔɔ Laa shing ɓɛɛ. Laa ɓɔɔ zang piti dɔɔ wu, wukɔ roo kpanti gbete. Wukɔ Kpanti ka yuu rɛɛ kpanti nandon. Wukɔ dabang gãa rɛɛ dabang gãa.

Yahudi 10:29

Ɓɔɔ nɔɔ rɛ̃rɛ ka yeti manɛ, jĩng dannang zang ɓɔɔ risi Jaa Laa naa vĩi, naa bang ɓu biya? Zang ɓɔɔ risi zĩi Yeesɔ ɓɔɔ Laa mã nyaa shɔɔ nɛɛ mani, naa vuu ɓɔɔ kpang ɓɛɛ. Zĩi ɓɔɔ zang kɔsɔ wu vuu shi kpang ɓiɓɛ nɛɛ mani ɓɛɛ. A ti dãa Suru Laa ɓɔɔ palɛ zang tɔ̃ɔ ɓɛɛ.

Yahudi 9:14

Zĩi Kirisi palɛ vuu ɓɔɔ ɓa weɓe kpang ya? Kirisi ɓɔɔ shi kpang ka bii kpang, a Laa yuu ɓiɓɛ nɛɛ naa vuu palɛnang Suru Laa ɓɔɔ nwang ɓi dòndòng ɓɛɛ. Zĩi ɓiɓɛ shing katɔ rɛ̃rɛnang ɓɔɔ nɔɔ rɛ̃rɛ ka yuu vuu shi kpang palɛnang, wu nwang tɔ̃ɔ, tɔ̀ɔ, ruu pàlɛ̀ Laa ɓɔɔ ɓi ningkãari shonang kati.

1 Bituru 1:19

Ta yuu manɛ ɓi nɛɛ zĩi bii ɓiɓɛ ɓɔɔ ɓa vuu piti katɔ ɓɛɛ. Yeesɔ Kirisi nwàng naa jaa mɛ̀ɛrɛ́ ɓɔɔ zang zɔ̃ngnɛ nɛɛ zang dɔ̀ɔ́ Laa ɓɛɛ. Ɓi zang tɔ̃ɔ, shi kpang ɓi kagn bii ɓiɓɛ kpang.

1 Yɔhana 1:7

Ruu nɛɛ nwang ka nɔng ɓɔɔ yakɛ katɔ naa wukɔ, ruu nwang katɔ nyaa zɔɔ tɔ̃ɔ tɔ̃ɔ. Zĩi Jaa ɓiɓɛ Yeesɔ sɔɔ ruu vuu shi kpang ɓuru katɔ nandon.

1 Yɔhana 4:10

Zang kasɛnang nwàng ɓi hn. Wu rukɔ gaayu Laa kasɛnang kpang, Laa kɔ kasɛ ruu ɓuru jong, a shong Jaa ɓiɓɛ nɛɛ wu naa nwang kaa naa vuu vàa ɓɔɔ zang dɔ̀ɔ́ Laa, tɔ̀ɔ, Laa wu yaa ruu gbalang vuu shi kpang ɓuru kati ɓɛɛ.

Vuu ɓɔɔ zang nwangsɛ Yɔhana 11:15

A zang nyaa shonang Laa ɓɔɔ wukɔ wàa rɛɛ zang nyaa shonang Laa ɓɔɔ ri manziti nyaa knti ɓɛɛ, jee gboo ɓiɓɛ. A n tãlɛ yee nwangnɛ lapa, ri rang yee nabm nɛɛ, “Kpanti roonang koo keɓe, raa ɓɔɔ kpanti ɓuru tɔ, nɛɛ ɓɔɔ Kirisi ɓiɓɛ. Laa kɔ naa roo kpanti gbinggbing.”

Vuu ɓɔɔ zang nwangsɛ Yɔhana 11:3

N shong zang mɛɛ ziti ɓɔɔ ri daa kɔɔ zang ruu ka yuu mɛɛ ɓɛɛ. Ri naa hã̀lɛ́ fɔ̃ɔrɔ ɓɔɔ zang ɓɔɔ ri kaa nyavɔ ri hã̀lɛ́ ɓɛɛ. N a ri naa ri kɔɔ zang ruu ka yuu mɛɛ diki labang gbete tu laa maani dakn ziti, tu laa taati.”

Vuu ɓɔɔ zang nwangsɛ Yɔhana 17:14

Ri naa ta sĩiri nɛɛ Jaa Mɛ̀ɛrɛ́ Laa, a Jaa Mɛ̀ɛrɛ́ naa shaa ri katɔ, ka ruu ɓɔɔ, wukɔ kpanti ka yuu rɛɛ kpanti nandon. Kpanti roonang ɓiɓɛ, ɓa ɓɔɔ zang piti ɓɛɛ. Zang ɓiɓɛ ɓɔɔ wu zɔ̃ngkɔ, a ɓaa ri nyaa katɔ, ɓɔɔ ri dũng wu nɛɛ yeti gbete, ri naa shaa zang jong ka nyaa sĩiri nɛɛ wu.”

Vuu ɓɔɔ zang nwangsɛ Yɔhana 19:11

Vuu keɓe ɓa tɔ, a n zi nyaa gãa puu ka lapa. Gbantang puru nwangnɛ. Zang ɓaa nung zang ɓɔɔ vang kagn nɛɛ, “Zang ɓɔɔ palɛ vuu ɓɔɔ wu kɔɔ ɓɛɛ katɔ, ɓɛɛ.” A ɓɔɔ, “Zang ɓɔɔ kɔɔ ɓi ruu ɓɔɔ niizang diki diki,” ɓɛɛ. Palɛ ɓi vuu tɔ̃ɔ, ka ɓɔɔ wu jɛ̃ɛ zang ruu, nɛɛ ɓɔɔ wu ta sĩiri ɓɛɛ.

Vuu ɓɔɔ zang nwangsɛ Yɔhana 19:16

Ka fɔ̃ɔrɔ ɓiɓɛ, nɛɛ doo sãng ɓiɓɛ, zang bee nung ɓiɓɛ kagn nɛɛ, “Kpanti ɓɔɔ ka yuu rɛɛ kpanti nandon ɓɛɛ, kpanti roonang ɓiɓɛ ɓa ɓɔɔ kpanti piti.”

Vuu ɓɔɔ zang nwangsɛ Yɔhana 2:13

N zi nɔng ɓɔɔ nɔɔ nwàng gn ɓɛ̀ɛ́ tɔ, ka nɔng ɓɔɔ Sheetang roo kpanti kagn ɓɛɛ. Nɔɔ yaa kɔɔnang kpang nɛɛ nkɔ kpanti manɛ kpang. Nɔɔ yaa danggn ɓɔɔ nɔɔ shing ka bii mɛɛ kpang doo nɛɛ mani, ka laa ɓɔɔ zang nyɔ Antiba, yɔɔ ɓɔɔ dũng m nɛɛ yeti gbete vɔrɔ ɓɛɛ. Zang nyɔ wu vɔrɔ ka teteng manɛ, ka nɔng ɓɔɔ Sheetang nwang ɓɛɛ, ka ruu ɓɔɔ, kɔɔ ka shoo zang piti nɛɛ wu dũng ɓi nkɔ ɓɛɛ.

Vuu ɓɔɔ zang nwangsɛ Yɔhana 3:14

A zang kaɓa kɔɔ tɔkn nɛɛ, “Bèe zang nyaa shonang Laa ɓɔɔ ka lapa ɓɔɔ gãng jĩng ka zang Laa ɓɔɔ ri ka gari Lawodikiya ɓɛɛ ruu keɓe, mɔɔ kɔɔ wu nɛɛ: Wee ruu ɓɔɔ nwang nɛɛ nyaa zang ɓɔɔ zang ɓaa wu nɛɛ, Wu nwang ta nɔngkɔ ɓɛɛ. Zang ɓɔɔ kɔ̀ɔ́ ɓi ruu ɓɔɔ niizang diki diki, ɓɔɔ ti palɛ vuu ɓɔɔ wu kɔɔ ɓɛɛ katɔ ɓɛɛ. Laa ti mã́arɛ̀ vuu piti nɛɛ bii ɓiɓɛ kɔ.

Vuu ɓɔɔ zang nwangsɛ Yɔhana 7:14

A n kasɛ wu nyaa nɛɛ, “Dabang, ɓi mɔkɔ zirɛ.” A kɔɔ m nɛɛ, “Wee ɓi rɛɛ zang ɓɔɔ ri wɔ nɛɛ jĩng dannang bang kaɓa ɓɛɛ, a ri sɔɔ fɔ̃ɔrɔ ɓarɛ kaa nɛɛ zĩi Jaa Mɛ̀ɛrɛ́, a tu kaa puru shãa shãa.”