Santiago 5:3 - Alacatlatzala Mixtec New Testament

³ Ndiꞌi ñaoro xíꞌin ndiꞌi ñaplata ña kómí ndó xa ni̱kusu ndiꞌi ña. Ta xa va̱xi yatin ki̱vi̱ ña kasa nani Ndios xa̱ꞌa̱ kua̱chi ndiꞌi ni̱vi, ta ndiꞌi ña ni̱kusu yóꞌo kúu ña ndakuii̱n xa̱ꞌa̱ ña o̱n váꞌa ke̱ꞌé ndó. Ta xa̱ꞌa̱ ña ndakuii̱n ña saá, Ndios tiꞌví ra ndóꞌó ko̱ꞌo̱n ndó ko̱ko̱ ndó no̱o̱ xíxi̱ ñoꞌo̱ ndiꞌi saá ki̱vi̱. Saá chi ndóꞌó ndasaá kuiti ndíꞌi ní ini ndó nakaya ndó ndiꞌi ñakuíká ta taan va̱ꞌa ndó ña, ta o̱n vása ní‑xini̱ ñóꞌó ndó ña nda̱tán kóni Ndios.

Santiago 5:3 Σταυροειδείς Αναφορές

Hechos 2:17

Saá káꞌa̱n Ndios: Tá xa yatin va̱xi ki̱vi̱ ñasondíꞌí ñoyívi yóꞌo, ta saá tiꞌví i̱ Níma̱ i̱ ko̱ꞌo̱n ña koo ña xíꞌin ni̱vi ndiꞌi saá xiiña ñoyívi. Ta yi̱ꞌi̱ taxi i̱ ña ka̱ꞌa̱n ni̱vi to̱ꞌon ña káku Níma̱ i̱, ta ka̱ꞌa̱n ndoso na to̱ꞌon yóꞌo no̱o̱ inka̱ ni̱vi. Án sa̱ꞌya ndó ñaꞌa̱ kúu ná, án sa̱ꞌya ndó ta̱a kúu na, ta yi̱ꞌi̱ Ndios taxi i̱ ndee̱ ña ka̱ꞌa̱n ndoso na to̱ꞌon i̱ no̱o̱ inka̱ ni̱vi. Ta ndóꞌó na kúu ni̱vi nakuáchí, ta taxi i̱ ña ti̱vi no̱o̱ ndó koto ndó ña kóni i̱ kunda̱a̱ ini ndó. Ta ndóꞌó na kúu ni̱vi naxi̱kua̱ꞌa̱, ta taxi i̱ ña xa̱ní ndó ña sanáꞌa i̱ ndóꞌó ña kóni i̱ kunda̱a̱ ini ndó.

Romanos 2:5

Ta ni̱vi nasóꞌó ní kúu sava ndóꞌó, ta o̱n vása xi̱in ndó nandikó ini ndó ta kasa ndivi ndó ña kóni Ndios. Ña̱kán kía̱ ndiꞌi saá ki̱vi̱ va̱xi kuaꞌno ka̱ kua̱chi ndó no̱o̱ Ndios. Ta saá kixaa̱ ñii ki̱vi̱, ta Ndios sanáꞌa ra ña ndixa sáa̱ ini ra xíni ra ndiꞌi ña o̱n váꞌa kéꞌé ni̱vi, ta xíꞌin ñanda̱a̱ kasa nani ra xa̱ꞌa̱ kua̱chi ndiꞌi ni̱vi.

2 Timoteo 2:17

Ta to̱ꞌon ña sánáꞌa ni̱vi na o̱n váꞌa yóꞌo, nda̱tán yóo ñii kue̱ꞌe̱ táꞌyí ña kuee kuee va̱xi kuaꞌno, ta sándiꞌi ña xa̱ꞌa̱ ko̱ñu ni̱vi saá yóo ña. Yóꞌó ta yi̱ꞌi̱ xíni̱ yó ta̱Himeneo xíꞌin ta̱Fileto kúu o̱vi̱ ta̱a ta̱ sánáꞌa to̱ꞌon o̱n váꞌa yóꞌo.

2 Pedro 3:3

Ña siꞌna ka̱ xíni̱ ñóꞌó kunda̱a̱ ini ndó kúu ña ndasaá koo tá xa kuyatin va̱xi ki̱vi̱ sondíꞌí. Chi ki̱vi̱ saá kutaku̱ ni̱vi na kutoo ní keꞌé ndiꞌi no̱o̱ ña o̱n váꞌa ña káchí ini mi̱i na, ta kusiki na ni̱vi xa̱ꞌa̱ ña kándixa na Jesucristo,

Apocalipsis 17:16

Ta ña u̱xu̱ ndi̱ki̱ ña xi̱ni ún ña kúu ña káꞌa̱n xa̱ꞌa̱ u̱xu̱ narey, ñii ki̱vi̱ ña va̱xi narey yóꞌo kusaa̱ ini na koni na ñáñaꞌa̱ o̱n váꞌa yóꞌo. Ta ñii ki̱ꞌva saá kusaa̱ ini kiti̱ tí yi̱yo ní káa koni rí ñáñaꞌa̱ yóꞌo. Ta saá narey xíꞌin tíkiti̱ yóꞌo kindaa na ndiꞌi ña kómí ñá, ta sandakoo yálá na ñá, ta kaxi na ko̱ñu ñá. Ta ko̱ñu ñá ña ndo̱o ndaa no̱o̱ yi̱ki̱ ñá, kaꞌmi na ña xíꞌin ñoꞌo̱ xíxi̱.

Apocalipsis 21:8

Ta ni̱vi na sa̱ndakoo yichi̱ i̱ chi yíꞌví na ko̱to̱ xo̱ꞌvi̱ na xa̱ꞌa̱ i̱, ta ni̱vi na o̱n vása kándixa yi̱ꞌi̱, ta ni̱vi na kéꞌé ndiꞌi saá no̱o̱ ña o̱n váꞌa ñakini, ta ni̱vi na xáꞌni inka̱ ni̱vi, ta ndiꞌi ta̱a ta̱ kíꞌvi kua̱chi xíꞌin ñaꞌa̱ ñá o̱n si̱ví ñásíꞌí ra kúu, án ndiꞌi ñaꞌa̱ ñá kíꞌvi kua̱chi xíꞌin ta̱a ta̱ o̱n si̱ví yii̱ ñá kúu, ta ni̱vi na nákuati tásín xa̱ꞌa̱ inka̱ ni̱vi, ta ni̱vi na kísa káꞌno ñaídolo án ñaimagen ña o̱n si̱ví Ndios ndinoꞌo kúu, ta ni̱vi na káꞌa̱n ñavatá, ndiꞌi ni̱vi yóꞌo xíni̱ ñóꞌó ko̱ꞌo̱n na ko̱yo na no̱o̱ ndíka̱ no̱o̱ xíxi̱ ñoꞌo̱ xíꞌin ñoꞌo̱ káꞌndi ña na̱ní azufre. Ta ña xo̱ꞌvi̱ na ñayóꞌo na̱ní “ña ni̱xiꞌi̱ na yichi̱ o̱vi̱” ―káchí Ndios, ni̱ka̱ꞌa̱n ra xíꞌin i̱.