Hechos 23:7 - Alacatlatzala Mixtec New Testament

⁷ Tá ndiꞌi na ndóo yóꞌo xi̱ni̱ so̱ꞌo na to̱ꞌon yóꞌo, ta nafariseo xíꞌin nasaduceo ki̱xáꞌá na náa na xíꞌin táꞌan na, ta ni̱ta̱ꞌvi̱ táꞌan nafariseo xíꞌin nasaduceo.

Hechos 23:7 Σταυροειδείς Αναφορές

San Mateo 10:34

Ta ni̱ka̱ꞌa̱n tuku ta̱Jesús, káchí ra saá: ―O̱n kani si̱ni̱ ndó ndí ña kundo̱o va̱ꞌa ndó xíꞌin natáꞌan ndó, kúu ña ki̱xaa̱ i̱ ñoyívi yóꞌo, chi xa̱ꞌa̱ ña nataꞌví i̱ ni̱vi kúu ña ki̱xaa̱ i̱. Nda̱tán yóo ñii espada si̱i̱n táꞌví ña ñii ña̱ꞌa o̱vi̱ ñáꞌño, saá yóo to̱ꞌon i̱. Saá chi sava ni̱vi kándixa na to̱ꞌon i̱, ta inka̱ ni̱vi o̱n vása kándixa na to̱ꞌon i̱.

Hechos 14:4

Ta saá ni, ni̱vi nañoo yóꞌo ni̱ta̱ꞌvi̱ táꞌan na: sava na xi̱kundiko̱n na ta̱Pablo xíꞌin ta̱Bernabé, ta sava na xi̱kundiko̱n na najudío na ni̱‑xiin kandixa to̱ꞌon xa̱ꞌa̱ ta̱Jesús.

Hechos 23:6

Ta ta̱Pablo ku̱nda̱a̱ ini ra ndí sava naJunta Suprema yóꞌo kúu na nafariseo, ta sava na kúu na nasaduceo, ta saá ni̱ka̱ꞌa̱n ra xíꞌin na, káchí ra saá: ―Natáꞌan yó, yi̱ꞌi̱ kúu i̱ ta̱fariseo, ñii ki̱ꞌva nda̱tán yivá i̱ xi̱kuu ra ta̱fariseo. Ta kua̱chi ña sákuiso na yi̱ꞌi̱ kúu xa̱ꞌa̱ ña ndáa ini i̱ ndí ndixa nataku̱ ni̱vi na ni̱xiꞌi̱ ―káchí ta̱Pablo xíꞌin na.

Hechos 23:8

O̱n vása yóo ñii yuꞌú ka̱ na, chi nasaduceo kándixa na ndí ni̱vi na ni̱xiꞌi̱ o̱n nataku̱ ka̱ nayóꞌo, ta kándixa na ndí o̱n ko̱ó níma̱ kómí ni̱vi, ni o̱n ko̱ó naángel, ni o̱n ko̱ó inka̱ no̱o̱ níma̱. Ta nafariseo kándixa na ndí yóo níma̱ ni̱vi, ta yóo naángel, ta yóo inka̱ no̱o̱ níma̱, ta kándixa na ndí ni̱vi na ni̱xiꞌi̱ nataku̱ nayóꞌo.