Apocalipsis 17:14 - Sharanahua: Diospan Tsain

¹⁴ Ascacashon nan nocofunun yoina pofu cuscara futan nan mucu rafuti niaifofoan nocon Ifo Jesús ahuun yorafoya noicasmacani. Jesús ahuun yorafo cunani ahuun tanamisifo inonfo. Ascashon ato catoan. Nanfo ahuuscarafiaino nocon Ifon cachiquiri huamisima. A tanacoinmisifo. Nan yoina pofu cuscara nan mucu rafuti niaifofo futan Jesús chashoan facu cahuan sharashta cuscara nan nocon Ifo yafi ahuun yorafo rutumapaishcani. Rutupaiyaifoan atorocofin Jesús ato namashquin. Nantianri ahuun tanamisifo afu iishquicani. Nocon Ifon nantifi niaifofo uhuapafo non niaifofo patashariri aton niaifocoinshon ato iquitiro. Nocon Ifon Jesús aton Ifocoinshon ato iquitiro. Nantifi niaifofo yafi ifoafori manifoti anoafo ato iquitiro. Ascan tsoancai nocon Ifon Jesús shuhuintiroma ahuun tanamisifocai ato tsoan cuyotiroma, —ishon nan Diosin oinmati afu nai muran imisiton ua yoia.

Apocalipsis 17:14 Σταυροειδείς Αναφορές

Daniel 2:44

Ascan nan niaifofo mani futsafo fu icaitian Diosin nan nai muran icaton ahuun yorafo ichanan huai. Nanfin ato niaifo iishquin. Tsoancai Diosin yafi ahuun yorafo potayamafain cuyopacunacama. Diosin ahuun yorafo futan nantifi niaifo futsafo ato shatumashqui afanan tsoa nipanonfoma. Ascanfia Diosin yafi ahuun yorafocai unupacunacama. Diosifin nantifiton niaifo ipanacaquin. Nantofi manifoti iquinaquin.

Daniel 2:47

Ascashon niaifo Nabucodonosor Daniel yoini isca huaquin, —Icon, maton Diosin nantifi dios futsafo finoncoian. Nanfin nantifi niaifofoan aton Ifoquin. Uhuun namapan mian tapimana cuscan min yora ahuara tapiamafo Diosin ato tapimatiroran, —ishon Nabucodonosor yoini.

Mateo 22:14

Nanscarifiai Upa Diosin yora ichapa cuna a icano funonfo. Nan ahuun facu noiaifosi afu ipanacafo. Ascafia Upa Diosin fustirasi ato catoin nan icoinra huafosi afu ipashanonfo, —ishon Jesús ato yoini.

Mateo 25:40

Ascaifoan un aton niaifoan un ato yoiqui isca huashquin, “Uhuun yorafo nan ua icoinra huafo futsafoan atohuunoa yoiqui isca huamisi ‘Nancai ahuamaran,’ ishon man yoimisi. Asca nan uhuun yora ahuamafiashu man ato shara huamisi cuscafin nan uari shara huai cafisca man ato huamisiquin,” ishon un ato yoishquin.

Mateo 28:18

Ascano nocoqui chaimashta oshon noco yoini, —Uhuun Upa ua yonoa nantifi nai ariafo yafi mai anoafori un yononon.

Juan 15:16

Man ua catonyamafiaiton ufi un mato catoan ua cuscara man inon matohuunshon futsafoanri ua icoinra huanonfo. Nanfoan ua tanapacunacafo ufu ipashcaquin. Asca huaino man ahuarashta Upa Dios uhuun anuhuunshon yocaiton mato ashotiro.

Romanos 1:6

Upa Diosin manifoti icoinra huamapai. Mato Roma anoafori noiquin mato catonni maton chaca man shatunon Furun Jesucristo ahuun yorafo man inon. Upa Diosin nocohuun ramapaiquin nocon ointi shinansharacoinon. Furun futan Apamain mato asca huashopainon.

Romanos 8:30

Onanyoni non ahuun facufo ishquinon. Ascano noco nomuranshon noco yoini, —Uhuun facu icoinra huahuu. Tsoan anori yoiaiton un ato chaca soashoni isharanonfo, —ishon Upa Diosin yoini. Aton chaca soashonano ahuun Furun sharashtacoin cuscara inonfo.

Romanos 8:37

Noco asca huafafainfiaifoan Jesús noco noiaino ahuunshon non ato finoncointiro.

1 Corintios 15:24

Ascainocai ahuara chacafoan afanan noco fucash huatirofoma nantifi cuyopacunaca. Nantianri nantifi Cristo noicasmamisifo yafi Satanás yoshin chacafoan aton niaifo non nantifi yoshin chacafo ato omitsiscapanacafo muran potai afanan tsoashta yonononfoma. Ascaiton Criston Apa Dios yoiquin isca huashquin, —Upan, natian min yorafo nantifi min ato yonomatiro. Afanancai tsoan mia nicacasmapacunacama. Ato iquipacuhuun, —ishon Criston Apa yoishquin.

1 Timoteo 6:15

Upa Diosin nichipaitian nocon Ifo Jesucristo afanan nocoqui nocoshquin. Nantianri non oinshquin. Nocon Diosin arus fusti nantifi iquisharafain nantifi niaifofoan aton niaifocoinri. Ifofoan aton ifocoinri.

2 Timoteo 2:4

Ranushumua sharapan ahuun niaifo ahuunoa unimamapaitiro. Ascan afu ranushumuafoma fucai yonotiroma. Ascashon ahuun niaifoan yonopaiyai cuscan fustisi nicatiro. Nanscarifiai Jesús fusti nocon Ifo icaino arus fusti noco yonotiro. Ascashon noco amapaiyai cuscan non aashquin.

1 Pedro 2:9

Ascafia Diosin noco catonni ahuun yorafo non inon. Afin niaifocoinquin non yonoshotiro futsafori cufishoshquin Jesushuunoa ato tapimashquin. Noco a cuscara sharacoin imaino non ahuun yoracoinfo itiro. Ascashon ahuunoa futsafo yoisharashquin. Non faquish muran ica shinantsa apaoni. Ascafia afincoin noco catonni ahuun yoracoinfo non inon afu shafacafi shara ipashquin.

Apocalipsis 11:7

Ascano Diosin ahuun yorafo yoipaiyai cuscan nan rafutan ato yoiquin anaitiano nan yoshin chaca quininhuan faquish murannoashu atoqui nocoshon ato rutupai oa. Ascashon man ato rutua.

Apocalipsis 16:14

Nan rafu non fusti fushco ointsa yoshin chacafoan ahua tsoan oinyomisima cuscara ahuamamishti yorafo ismafo. Nantifi niaifofo manifoti ano focani ato ichanan huamai nocon Ifo Jesús ahuun yorafo rutunonfo. Nantianri nocon Diosin ahuamamishti amisiton ahuun yono ismashquin.

Apocalipsis 2:10

“Ascano inon pacoai cuscan un mato yoiyonon. Satanás atirifi mato cunu muran iquimashquin manmain ua cachiquiri huamainquin tapipai. Ascacun ahuutiaran man omitsiscashquiain cuscan ratuyamacahuun. Ua cachiquiri huatamarocon isca huaquin shinancahuun, ‘Ua rutufiaifoannocai un ratuima. Ua chaca huafiainfoanri un tunucointiro. Uncai uhuun Ifo potapacunacama. Ascacun uhuun Ifo un tanaqui finacoinfafaini,’ ascashu man naiton un mato nimapacunaca man ufu ipanon.

Apocalipsis 2:13

Mun tapia man pushurasi Pérgamo ano ica. Nannoshori Satanás yorafo iquimisi. Ascafiaino rafitama man ua tanasharamisi. ‘Jesús uhuun Iforan,’ man ato huamisi. Nannori ua tanamisi futsan ahuun anu Antipas nanton uhuunoa ato yoifafainmisi. Ascacun nan man rutuafo. Nanscara man tapifiashocai man ua potama. Manricai ratuima. Ascashon maton nomuran man shinanquin isca huaa, ‘Noco rutufiaifoannocai nocon Ifo Jesús non icoinra huaquin shatuimaran,’ ishon man shinanmisi.

Apocalipsis 3:21

“Ascano tsoan chaca huamisi cuscan shatufain ua tanasharacoian naanfin uhuun Upa Diosin icari ufu ipasharatiroquin. Ascafia un niaifocoin icaino nanfin niaifo patashari itiroquin. Unfin Satanás yafi yoshin chacafo finoncoianquin. Uhuun Upa Dios icariashu uhuun Upa fu un niaifocoin ica. Nanscarifiai tsoan ahuun chaca cachiquiri huafain ua tanasharacoianshu un icanoashu arifi ufu niaifo ipatiroquin.