Roma 3:4 - U Maganda A Baheta Ni Jesu-Cristo

⁴ Awan, dipo tapat u Diyos tu upos na, maske mabule u atanan a tolay. Konna ngane tu kinagi na tu Kautusan, “Talaga a mapatunayan a tapat ka tu upos mo Panginoon Diyos. Sakay ni kagiyán nu tolay ate pagkakamale ka mapatunayan a awan ka ti págkakamale.”

Roma 3:4 Σταυροειδείς Αναφορές

Mateo 11:19

Nadid hikán a Anak nu Tolay ay kuman sakay uminom ti alak ay kagiyán di be a ‘Katoy u essa a tolay a maunas sakay lasingero. Barkada siya nu tagakolekta hide ti buwes sakay u makasalanan hide.’ Pero ketan labe u bunga nu karunungan nu Diyos tu biyag nu tolay a sumunud.”

Lukas 20:16

“Angay siya hod sakay bunuwan na u katiwala hide tu kaubasan sakay iyatád na tu agum u uma na.” Pákkasaneg nu tolay hide tu kinagi na ay kinagi de, “Dyan nakwan iye ipakultad nu Diyos a mangyare!”

Juan 3:33

Pero u maniwala hide tu kinagi ni Jesus ay hide u mangpatunay a tatahoden u kinagi nu Diyos.

Roma 11:1

U tanung ko nadid ay: Inadiyan beman nu Diyos u pinile na hide a tolay? Awan! hikán ay Israelita a mismo, gábwat tu lahe ni Abraham sakay kabilang tu lahe ni Benjamin.

Roma 11:11

Nesángdul u Judio hide dipo awan hide simmampalataya ni Cristo. U gusto na beman a kagiyán ay tulos dán a mepahamak u Israel? Awan! Pero dipo tu kássuway de ay nagkahod ti pagkakataun u Hentil hide a maligtas. Sakay dipo hod ay sinumene u Judio hide sakay gustuwán di be i kaligtasanan iye.

Roma 3:31

U gusto na beman a kagiyán ay bali-awanán mi dán u Kautusan? Awan! Dipo u tatahoden ay mas lalo mi pa a tinupad u layunin nu Kautusan.

Roma 6:15

Nadid, maggimet kitam pa beman ti kasalanan dipo awan kitamon sakup nu kapangyariyan nu Kautusan, nan sakup dán nu kapangyariyan nu habag nu Diyos? Awan!

Roma 6:2

Awan! Awan kitamon dapat mabiyag, tu págkakasala dipo konna kitam tu essa a patay a awan dán magkasala.

Roma 7:13

U gusto na beman a kagiyán a u mágkaganda a bagay u nangatád nikán ti kamatayan? Awan! U kasalanan ay siya u nangatád nikán ti kamatayan. Ginamit nu kasalanan u Kautusan a essa a maganda a bagay, tánni mahatulanák ti kamatayan. Sakay dipo hod, ay natukuyan ko ni sakodya ti kadukás u kasalanan.

Roma 7:7

U gusto na beman a kagiyán ay madukás u Kautusan? Awan! Dipo awan ko nakwa natukuyan u kasalanan ni awan u Kautusan. Awan ko nakwa natukuyan ni ánya u pagin sakim ni awan kinagi nu Kautusan, “Dyan ka magin sakim.”

Roma 9:14

Ni konna hod makagi tam beman a awan makatarungan u Diyos? Awan!

1 Corinto 6:15

Awan moy beman tukoy a parte kam nu bággi ni Cristo? Kaya ni hikán u bággi ko a kabahagi nu bággi ni Cristo ay talaga awan ko iduhog tu bággi nu belyas? Awan itod maare!

2 Corinto 1:18

Ni kodya a tapat u Diyos, ay konna bi hod u upos ko nikam: u “On” ko nadid ay manatile a “On.”

Galacia 2:17

Pero ni ketan a hikame ay makasalanan pade maski tu págsikap me a meturing nu Diyos a matuwid kame tu pamamag-itan ni Cristo, u gusto beman a kagiyán ni iye ay ti Cristo u dahilan nu pagigin makasalanan me? Bakán!

Galacia 2:21

Ni hikán ay awan ko ituring a awan ti halaga u kagbi nu Diyos. Dipo ni ituring nu Diyos a matuwid u tolay tu pamamag-itan nu kássunud tu Kautusan, ay awan ti kabuluhan u kákkatay ni Cristo!

Galacia 6:14

Nakwa awan iye mangyare nikán. U ipagmadakál kula ay u kákkatay nu Panginoon tam a ti Jesu-Cristo. Dipo tu kamatayan ni Cristo tu kudus ay awan dán ti halaga para nikán u bagay hide ti munduwáy, sakay hikán ay awan dámbe ti halaga para ti munduwáy.

1 Timoteo 3:16

Tunay ngane a maganda u impakapos-pos nu Diyos nikitam a tama a pannampalataya: Ti Jesus ay nehayag nikitam nikuna nagin tolay siya, sakay pinatunayan nu Banal a Ispirito a siya ay matuwid sakay netan nu anghel hide. Sakay nadid ay nepahayag dan tu buo a mundu u tungkul nikuna sakay tehhod a simmampalataya. Sakay siya ay inyontok ti langet ni hadya siya a maghare.

Tito 1:2

U pánnampalataya sakay pakkaunawa a iye u mangatád tu pag-asa tam a matanggap tam u biyag a awan ti kahád a inpananto nu Diyos bagu na a linalang i munduwáy. Siya u Diyos a awan mágbule-bule.

Hebreo 6:18

Awan magbabagu oni magbule-bule u Diyos ti duwwaan iye a bagay: U pananto na sakay u sinumpaan na. Kanya hikitam a nagpasakup tu Diyos ay matibay u isip tam a umasa tu inpananto na.

1 Juan 5:10

Ni ti deyaman u sumampalataya tu Anak nu Diyos ay maniwala ti iye a patunay. Ni ti deyaman u awan sumampalataya tu patunay nu Diyos ay ginimet na a mabule u Diyos. Dipo awan siya maniwala tu págpatunay na tungkul tu Anak na.

1 Juan 5:20

Tukoy tam a immangay dán he u Anak nu Diyos sakay inatádden na kitam ti pággintendi tánni matukuyan tam u tatahoden a Diyos. Sakay katoy kitam tu tatahoden a Diyos, tu Anak na a ti Jesu-Cristo. Siya u tatahoden a Diyos sakay u Biyag a awan ti Kahád.

Pahayag 3:7

Isulat mo be iye tu anghel nu gurupo nu mánnampalataya hide ti Filadelfia: Iye u pekagi nu banal sakay u tatahoden, hod nikuna u susi oni kapangyariyan a nagsapul tu pághare ni David. Siya u maghatul ni ti deya u makasaddáp tu kahariyan na, nan awan ti makapángsiradu tu binukasan na, sakay awan ti makapangbukas tu siniraduwan na: