Lukas 9:39 - U Maganda A Baheta Ni Jesu-Cristo

³⁹ Sináddáp siya ni madukás a ispirito, kaya bigla dálla siya a mágpapákhawán sakay mágpapágpággán hanggan a maghuho u labi na. Pirme na siya a páppasakitan sakay awan na dán gusto a lakadan.

Lukas 9:39 Σταυροειδείς Αναφορές

Markos 9:18

Ni pahirapan nu madukás a ispirito ay itumba na siya; magbugak u labi na sakay magngaritengát u ngipán na, sakay umigát u bággi na. Nákpagguhunák dán tu disepulus mu hide a palakadán u madukás a ispirito, pero awan di kaya!”

Markos 9:20

Kanya inyangay de u anak tu kán Jesus. Pero tu pákketa nu madukás a ispirito ni Jesus ay pinagpágpág na u anak, pinatumba sakay pinaggulung tu luta a magbugak u labi na.

Markos 9:26

Tu pákkakagi hod ni Jesus ay pimmákhaw u madukás a ispirito, sakay pinagpágpág na u anak ti mahigpit, sakay immibut. U anak ay kumán dán a bangkay u idsura na, akala nu tolay hide ay natay dán!

Lukas 4:35

Pero sinaway siya ni Jesus, kinagi na, “Dyan ka pakahehaw! Umibut ka ti tolaye!” Káttapos inlugmuk nu madukás a ispirito u lállake tu atubang nu katolayan, sakay tulos na a linakaden sakay awan na pinasakitan.

Lukas 8:29

Kinagi na iye dipo inutusan ni Jesus u madukás a ispirito a lumakad nikuna. Nalay dán siya a sassaddappan nu madukás a ispirito. Kaya maski ni pakababantayan sakay punguwán ti kadena u tika-tikád na sakay u kama kamát na ay bágsután na la. Sakay iyáangay siya nu madukás a ispirito tu adeyo a lugar.

Lukas 9:38

Tu kákpalan nu tolay hide ay tehhod a lállake a pummákhaw, “Maisto,” kagi na, “Kagbiyan mu pay a pagpiyyaán i kaessa-essa kuwáy a anak a lállake!”

Lukas 9:40

Nákkekagbiyák dán be tu disepulus mo hide a palayasán u madukás a ispirito, pero awan di kaya.

Juan 8:44

Ti Satanas u ama moy. Sakay ni ánya u gusto na ay itod u gusto moy be a gimitán. Mágbabono siya sapul pa tu sapul, sakay umád na u tatahoden dipo awan u tatahoden nikuna. Dipo ugale na dán a mágbabuli-buliyán dipo mabule siya, sakay siya u naggábwatan nu atanan kakabuliyan.

1 Pedro 5:8

Pirme kam a humanda sakay magbantay dipo u kadima moy a ti Satanas ay dumahi-dahengding a kumán a liyon a magtágguwang a magehyok ti sangwabán na.

Pahayag 9:11

U hare de ay u anghel a mágbantay tu ábbut a tunay ti kadsalad. U ngahan na tu upos a Hebreo ay Abadon, sakay ti Griego ay Apolion; u gusto na a kagiyán ay Tagapagsida.