Juan 3:5 - U Maganda A Baheta Ni Jesu-Cristo

⁵ Kinagi ni Jesus, “Kagiyan ko niko u tatahoden: Awan ti maski ni deya man u makasáddáp tu kaharian nu Diyos ni awan siya meenak tu pamamag-itan nu dinom sakay tu Banal a Ispirito.

Juan 3:5 Σταυροειδείς Αναφορές

Mateo 18:3

Kinagi na, “Pakatandaan moy iye: hanggan awan kam nagbago sakay pumarehas tu anak hide a mapakumbaba, talaga a awan kam mebilang tu pinaghariyán dán hide nu Diyos.

Mateo 19:24

Sakay kagiyan ko be nikam: mas alisto pa a makasáddap u dakal a hayop a kamelyo tu ábbut nu digum nan magpasakop tu pághari nu Diyos u essa a mayaman.”

Mateo 21:31

Deya tu duwwa u summunod tu gusto nu ama na?” “U panganay,” tábbeg de. Sakay kinagi nide ni Jesus, “Kagiyan ko nikam: u madukás hide a tagakolekta ti buwes sakay belyas hide ay mágdipalongo pa nan nikam a magpasakop tu pághare nu Diyos.

Mateo 28:19

Kanya angay kam sakay gimitán moy a disepulus ko u atanan a tolay tu atanan a bansa. Bawtismuwan moy hide tu ngahan nu Ama sakay nu Anak sakay tu Banal a Ispiritu.

Mateo 3:11

Bawtismuwan ko ti dinom u tolay hide bilang tanda nu págsisi de pero u Tagapagligtas a dumemát ay mas makapangyariyan nan nikán. Awanák pa ngane karapatdapat a magin utusan na a tagatawed nu sapatus na. Siya u magbawtismo nikam tu Banal a Ispiritu sakay tu apoy.

Mateo 5:20

Kanya ikagi ku nikam a paghariyan kam la nu Diyos ni tatahoden moy a sunudán u kautusan nu Diyos. U kássunud moy tu kautusan ay dapat mas humigit pa tu págsunud nu Pariseo hide sakay tu maistu hide nu Kautusan ni Moises.”

Markos 10:14

Nikuna a ketan ni Jesus u nangyare ay nagingál siya, sakay kinagi na tu disepulus na hide, “Pabayan moy a umadene nikán u anak hide, diyan moy hide bawalan, dipo maghare u Diyos tu anak hide.

Markos 16:16

U sumampalataya sakay magpabawtismo ay maligtas, pero u umád a sumampalataya ay maparusaan.

Markos 9:47

Sakay ni u mata mo u dahilan nu pagkasalaan mo ay lábwetán mo! Mas maganda pa ni eessa la u mata mo pero tehhod ka a biyag a awan ti kahád, kasera ni duwwa u mata mo pero ibut ka la be ti impiyerno.

Lukas 13:24

Kinagi na nide, “Pilitán moy a makasáddáp tu mapiit a pintuwan. Makpal u masoh a sumáddáp hod pero awan makasáddáp.

Lukas 13:3

Pero tandaan moy i kagiyán kuwáy nikam, ni awan kam magsise tu kasalanan moy hide ay matay kam labe a konna nide.

Lukas 13:5

Pero tandaan moy i kagiyán kuwáy nikam, ni awan kam magsise tu kasalanan moy hide, ay mepahamak kam labe a konna nide.”

Juan 1:13

Nagin anak ngane hide nu Diyos, bakán a tu pamamagitan nu pangpilas a kákkeenak oni tu kagustuwan nu tolay, nan dipo tu kaluuben nu Diyos.

Juan 3:3

Timmábbeg ti Jesus, “Kagiyan ko niko u tatahoden: Awan ti maketa tu paghare nu Diyos maski ti deya man maliban a meenak a huway.”

Juan 3:4

Kinagi nikuna ni Nicodemo, “Kodya a meenak u essa a tolay ni matanda dán siya? Awan dambe siya makasole tu tiyan nu ina na para iyenak siya a huway.”

Gimet 2:38

Timmábbeg ti Pedro, “Kákkapatkákka ko hide, pagsisiyan moy dán sakay adeyuwan u kasalanan moy hide, sakay magpabawtismo kam tu ngahan ni Jesu-Cristo tánni mapatawad kam tu kasalanan moy hide, sakay pagkaluuben nakam tu Banal a Ispirito.

Gimet 3:19

Kanya nadid ay magsisi kamon sakay umadene tu Diyos, tánni patawadán na u kasalanan moy hide,

Roma 14:17

Dipo u kahariyan nu Diyos ay awan tungkul tu pagkain oni áinumán, ni awan tungkul tu matuwid a kákkabiyag, maganda a rilasyon tu balang essa, sakay kasayaan a gábwat tu Banal a Ispirito.

Roma 8:2

Dipo tu pákpagkaessa tam ni Cristo Jesus, ay napalaya kitamon tu kapangyariyan nu kasalanan sakay kamatayan tu pamamag-itan nu kapangyariyan nu Banal a Ispirito a makapangatád ti biyag.

1 Corinto 15:50

Iye u gusto ko a kagiyán, kákkapatkákka ko hide: u bággi tam a nabuo nu pilas sakay dige ay awan magkahod ti bahagi tu kahariyan nu Diyos. U bággi a iye a mahunot ay awan maare a makatanggap ti biyag a awan ti kahád.

1 Corinto 2:12

Pero bakán a u ispirito nu mundu u tinanggap tam nan u Ispirito nu Diyos, tánni maintendiyan tam u kaluub hide a inyatád na nikitam.

1 Corinto 6:11

Konna hina u agum nikam tu itod. Pero nalinis kamon tu kasalanan moy hide sakay netalaga kamon tu Diyos. Napatawad kamon tu ngahan nu Panginoon tam a ti Jesu-Cristo sakay tu Banal a Ispirito nu Diyos.

Galacia 6:15

Awan mahalaga ni nature oni awan u essa a tolay. U mahalaga ay u pángbagu nikitam nu Diyos.

Efeso 5:26

Ginimet na iye para hikitam a mánnampalataya hide ay magin banal tu atubang nu Diyos dipo hikitam ay imbilang na a nalinisan dán tu pamamag-itan nu pánniwala tam tu upos na kanya hikitam ay nabawtismuwan dán tu dinom.

1 Pedro 1:2

Pinile kamon nu Diyos a Ama sapul pa tu sapul dipo itod u kagustuwan na. Sakay u Banal a Ispirito u nangpabanal nikam. Kanya magpasakup kamon ni Jesu-Cristo, tánni malinisan kam tu kasalanan moy tu pamamag-itan nu kákkatay na tu kudus. Magkahod kam nakwa ti págpapala sakay kapayapaan.

1 Pedro 3:21

I dinuman itod a lonso ay sa itod u mage letrato nu págbautismo a mángligtas nikam. Tu pamamag-itan nu kákkabiyag a huway ni Jesu-Cristo. U págbawtismo a iye ay bakán a para linisán u dangát nu bággi tam nan iye ay tanda a nagsise kitamon tu kasalanan tam hide. Dipo ti iye ay maare kitamon a iligtas nu Diyos dipo ti Cristo ay huway a nabiyag.

1 Juan 2:29

Ni tukoy moy a matuwid ti Cristo, ay dapat tukoy moy be a u atanan a mággimet ti matuwid ay anak nu Diyos.

1 Juan 5:1

Ni maniwala kitam a ti Jesus u Cristo a sinugu nu Diyos, ay anak kitam ngane nu Diyos. Sakay ni ti deya man u magmahal tu Ama ay magmahal be tu kapareho de a anak nu Ama.