2 Corinto 3:1 - U Maganda A Baheta Ni Jesu-Cristo

¹ Nadid, tu palagay moy beman ay páppuriyán me dámman i sadile miyáy? Awan kame konna tu agum a kailangan pa ti sulat para tanggapán moy oni sulat a gábwat nikam para tanggapán be tu agum a lugar.

2 Corinto 3:1 Σταυροειδείς Αναφορές

Gimet 18:27

Sakay nikuna maggayak siya a angay ti Acaya ay nagsulat u mannampalataya hide a taga-Efeso para tu mánnampalataya hide hod a tanggapán de ti mahusay ti Apolos. Káddemát na hod ay dakál u netulung na tu mánnampalataya hide dipo tu kabaitan nu Diyos.

Roma 16:1

Nadid, gusto ko a ipatengge nikam u kapatkákka tam a ti Febe. Nagserbi siya tu grupo nu mánnampalataya hide ti Cencrea.

1 Corinto 10:33

Magporsigiyák a mapasaya u atanan a tolay tu gággimitán ko; bakán la a u sadile ko a kapiyyaan u áisipán ko nan pate u kapiyyaan nu agum, tánni maligtas hide.

1 Corinto 16:3

Káddemát ko hina ay paangayán ko ti Jerusalem u tolay hide a napili moy a mangtawed tu tulung moy sakay manggimiták be ti sulat para ipakilala hide tu mánnampalataya hide ti Jerusalem.

1 Corinto 3:10

Ayun tu kabaitan nu Diyos nikán, hikán u nagdátton tu pundasyon, konna tu essa a malalake a mágpataknág. Sakay u agum be u mángtapos tu bilay. Pero magin maingat u balang essa a mángtapos tu bilay,

1 Corinto 4:15

Maskin magkahod kam ti sapulo a libo a tagapagtoldu tu kákkabiyag moy bilang Kristiyano, ay eessa padi u meturing a ama moy tu pánnampalataya. Hikán itod dipo hikán u nakasanigan moy tu Maganda a Baheta tungkul ni Cristo Jesus.

2 Corinto 10:12

Awan ko gusto a ibilang oni ipareho u sadile ko tu agum a magmadakál tu sadile de. Awan ti tukoy i tolayan ina hide! Dipo u sadile dila u ginimet de a sukatan sakay parisan.

2 Corinto 10:18

U parangalan nu Diyos ay u tolay a karapat-dapat tu kaluuban na bakán a u mánglangkaw tu sadile na.

2 Corinto 10:8

Dipo maski susubra dán u págmadakál ko tu kapangyariyan a inyatád nu Diyos nikán ay awanák masanike dipo iye ay pángpasibát tu pánnampalataya moy bakán a para tu kákkepahamak moy.

2 Corinto 12:11

Kumánnák a essa a tolay a awan ti tukoy dipo tu pághambug ko, pero hikam u nángtoglad nikán a manggimet ti konna hina. Hikam nakwa u dapat a mangpure nikán, dipo maski awanák ti kabuluhan, awanák be medimodyan ti mágkalalakiyan ina hide a apostol kan.

2 Corinto 12:19

Akala moy beman ay isuhog ko u sadile ko? Awan! Mahal me hide a kákkapatkákka, kagiyán ko nikam nadid tu atubang nu Diyos sakay bilang alipin ni Cristo, a atanan nu gággimitán ko ay para bumegsák u pánnampalataya moy.

2 Corinto 2:17

Dipo awan kame konna tu agum a gággimitán de a negosyo u upos nu Diyos. Tukoy me a áelingán kame nu Diyos kaya bilang mánnampalataya ni Cristo sakay tagapagserbi nu Diyos, ay tapat kame a mangaral tu upos na.

2 Corinto 5:12

Kinagi me iye nikam a huway, bakán a para ipagmadakál nikam i sadile miyáy, nan para atádden kam ti rason a mepagmadakál moy kame, tanni matábbeg moy u tolay hide a mangpuri la tu bagay hide a pangluwas bakán a u maganda a ugale.