1 Tesalonica 3:5 - U Maganda A Baheta Ni Jesu-Cristo

⁵ Kaya ngane, nikuna a awanák dán makatiis ay nangutusák ti umangay hina tánni ilingán ni kumusta dán u pánnampalataya moy tu Panginoon. Mabalisaák bakay ni nalinlang kamon ni Satanas, ay ni mara konna hod i mangyariyay ay mawanan ti serbi u pángngaral me.

1 Tesalonica 3:5 Σταυροειδείς Αναφορές

Mateo 4:3

Sakay immangay nikuna ti Satanas sakay kinagi na “Ni tatahoden a hiko u Anak nu Diyos ay ipeta mo. Gimitán mo a makan i bitowe hide.”

Gimet 15:36

Kállipas nu sangan a aldew ay kinagi ni Pablo ni Bernabe, “Angen ta soliyán sakay bisitaán u kákkapatkákka tam hide tu banuwan hide a nangaralan ta tu Upos nu Panginoon. Sakay ilingán ni anya dán i kalagayan diyay.”

1 Corinto 7:5

Kanya dyan moy ikemot a mákduhog tu kákkabanga moy, maliban dálla ni napagkasunduwan moy a dyan kam palla magduhog, tánni melaan u panahun moy tu págdasal. Pero káttapos ay maare kamon a magduhog tánni awan kam matokso ni Satanas dipo la a awan kamon makapagpugád tu sadile moy.

2 Corinto 2:11

Dapat la a magpatawad kitam tánni awan kitam malinlang ni Satanas. Dipo tukoy tam u plano na a madukás.

2 Corinto 6:1

Nadid, bilang kaguman tu gawain nu Diyos, ay mákkekakagbi kame nikam a dyan moy sayangán u inyatád nikam nu Diyos a pagpapala.

Galacia 2:2

Simmoliyák dipo kinagi nikán nu Diyos a dapaták a angay hod. Nákpágguhunák ti sadiliyan tu puno hide nu mánnampalataya hide, sakay inpakapospos ko nide u Maganda a Baheta a ibábbaheta ko tu Hentil hide. Ginimet ko iye tán masigudu ko a awan masayang u pinagpaguden ko tu nakalipas hanggan tu kasalukuyan.

Galacia 4:11

Mabalisaák bakay ni masayang la i pagud kuwáy para nikam.

Efeso 4:14

Tánni awan kitamon konna tu anak hide a pabagu-bagu ti isip sakay alisto la a maniwala tu iba-iba a toldu nu tolay hide a mágdaya. Awan kitamon metaw-taw nu tolay hide a u gustu dila ay meangay u tolay tu baka-bakán tu pamamag-itan nu págdaya de.

Filipos 2:16

mentras a ipakapospos moy nide u Maganda a Baheta a makapangatád ti biyag a awan ti kahád. Tánni tu káddemát ni Cristo ay mepagmadakál takam dipo awan nawanan ti kabuluhan u págpagud ko.

Filipos 2:19

Maniwalaák a kaluuban nu Panginoon Jesus a mapaangay ko hina a pagdaka ti Timoteo tánni masayaák be ni ibaheta na u kalagayan moy hina.

1 Tesalonica 2:1

Kákkapatkákka mi hide, hikamon u makatukoy a te pakinabang kam tu káangay me hina nikam.

1 Tesalonica 3:6

Nadid ay nagsole dán he ti Timoteo, maganda u inbaheta na tungkul tu pánnampalataya sakay págmahal moy. Sakay inbaheta na be nikame a pirme moy kame a maalaala sakay tunay u pagkasoh moy a metan kame. Konna tu pagkasoh me a metan mikam.