Kolosi 2:16 - Nupela Testamen long tokples Kandas

¹⁶ I mo ra, gong mot madek tar taio sur in takun mot lena, ka mot pam sot pas a kum warkurai un asau ra mot in nani ma mot in inumi, ma una kum lamlabino bung na lotu, ma una kalang ra i wanpat kibin, ma una Bung na Sabat.

Kolosi 2:16 Σταυροειδείς Αναφορές

Matiu 15:11

Asau ra in ruk una wan tu musano, ken uduri umatan o God. Ikut, asau ra i watungi nama wano, i ra in uduri umatan o God.”

A Wakak na Wasiso un o Iesu Karisito o Mak i tumusi 7:19

Uni ke ruk una nuknukino, i ruk pas kut unin balano ra i pirso melet.” Ra una nun a wasiso ra, i upuaso i lena, a kum utna na inangon rop i wakak.

Aposel 15:20

Dat in tumtumus torom det, ma dat in inanos det lena, det in mur a kum warkurai kut lenri: Gong det wan tu utna ra di sa etabor taru nami torom a kum torotoro na god, uni a ngas na lotu lenri i udur a utna na inangon. Gong det pam a kum petutna na pamuk. Gong det wan tu utna ra ka di gos wakak a gap gusuni, ma tu wewegua ra di pos doko i kut ra a gap kura utmakai uni.

A Pas anun o Pol torom a taro Rom 14:10

Ma ui, u lai ra u takun o tisim? U lai ra u tama pisopiso o tisim? Uni dat rop dat in tur numugu tan a kiskis na warkurai anun o God.

Galesia 4:10

Mot dekdek doko sur mot in mur a kum warkurai anun a taro Juda una kum lamlabino bung, ma a kum kalang, ma a kum kilalo, ra mot nuki lena mot in tokodos uni.

Kolosi 2:20

Mot sa mat tomo nam o Karisito, ma mot sa langolango gusun a kum etowo tan a kum laulau na nion tagun a rakrakon bual. Asau a kibino ra mot laun melet kut elar nam mot taginin una rakrakon bual ma mot mur a kum warkurai taginin? A kum warkurai lenri:

Ibru 13:9

Gong mot mur a kum wur ngas na etowo ra i ben raro mot. I wakak ra a marmaris anun o God in udekdek a niondat. Ra dat mur a kum warkurai una utna na inangon, ken udekdek a niondat, ma ken warut det ra det ser mur a kum warkurai ra.

Ibru 9:10

A kum warkurai ri tagun a inangon ma a ininum ma a kum pinapam na gos talapor a taro umatan o God. Det a kum warkurai kut tagun a pinindat. Det tur kut, tuk una bung ra o God i umatok a kum utna.

Jems 4:11

A kum tistising, gong mot mang etalai mot. Osi ra i mang tu tisino, o i kuro i, i watung laulau a Warkurai anun o God ma i kuro a Warkurai ra. Ma ra un kuro a Warkurai, awu sur u muri, u nuki kut lena ui ut u labo tauni.