Ibru 4:14 - Nupela Testamen long tokples Kandas

¹⁴ Dat in tur dekdek una kum etowo ra dat nurnur uni ma dat ser wasiso puaso uni. Uni anundat a labino mugumugu na tene etabor torom o God, ra i wan usapat una langit, i ra o Iesu, a Nutun o God.

Ibru 4:14 Σταυροειδείς Αναφορές

Matiu 4:3

Ra a tene ululam i wanpat toromi, ma i watungi tano lena, “Ra ui a Nutun o God, un inanos a kum watat ri sur det in nanpat a beret.”

A Wakak na Wasiso un o Iesu Karisito o Mak i tumusi 1:1

Iri a Wakak na Wasiso un o Iesu Karisito, a Nutun o God.

A Wakak na Wasiso un o Iesu Karisito o Mak i tumusi 16:19

Ra a Labino o Iesu i sa wasiso taru tandet, o God i ben toto pasi usapat una langit, ma o Iesu i kis una papor sot na laman o God.

Luk 24:51

Ra i watung udan det utmakai, i wan gusun det, ra o God i ben toto pasi usapat una langit.

Aposel 1:11

Ma der watungi lena, “Mot a kum te Galili, sur asau ra mot tur ma mot tatado usapat una bakut? O Iesu mo sapat, i ra o God i sa ben pasi gusun mot usapat una langit, in nanpat melet urin, elar ut nami ra mot tama ru i, ra i wan usapat netes.”

Aposel 3:21

In kis sapat netes una langit, tuk una bung ra o God in umatok melet a kum utna rop, ra i sa watung tari numugu utmakai nama wasiso anun a kum tasur na poropet anunu.

A Pas anun o Pol torom a taro Rom 8:34

Osi ra in watungi lena, din pitar a warkurai na minabalu torom dat? Katutaio. Uni o Karisito Iesu i sa mat sur dat. Awu sur i kut ra, o God i sa ukatutur melet pasi kai gusun a minat, ma uniri kusapat mo i kis una papor sot na laman o God, ma i ser wararing sur dat.

2 Korin 12:2

A tasman ara musano, a te Karisito, numugu tan a noino ma wat na kilalo, o God i ben pasi usapat una mantul na langit. Ka tasmani ra i los tito pasi, tomo nama pinino, o a niono kut. O God kut i tasmani.

2 Korin 9:13

A pinapam ri mot pami, i upuaso a wakak na magiramot. Ma a susut na taro det in watung ulabo pas o God, uni anumot a nurnur una Wakak na Wasiso un o Karisito, i pam pati kai a petutna na mur wasiso. Ma det in watung ulabo pas o God, una numot a wakak na petutna ra mot tabor det, ma a taro gisen kai.

Epeses 4:10

O naro ra i wan pirso, i ut ra i wan tito usapat sakit gusun a bakut, sur in ubukus a kum utna rop sapat netes ma nin upiso.

Ibru 1:8

Ikut o God i watungi un o Nutunu lenri, “God, anum a kiskis na king in kis tukum ma ken rop. U ser warkurai sur a taro tagun anum a matanitu nama tokodos na petutna.

Ibru 10:12

Ikut o Karisito, anundat a mugumugu na tene etabor i pitar tari ut sur a etabor torom o God una kum sakino petutna anun a taro. Ara dino kut i pami. Anun a pinapam ra in tur tukum, ma ken pam meleti mo. Ra i sa pam tari, i kis taru una papor sot na laman o God.

Ibru 10:23

Dat in tur dekdek una nundat a kinkinis langlang nama nurnur sur asau ra o God in pami, ra dat ser wasiso puaso uni. Dat in tur dekdek, ma gong dat wan gisen gusuni, uni o God in pam soti ut asau ra i sa uliliman taru uni.

Ibru 10:29

Ikut a warkurai na minabalu in dekdek sakit taun a minabalu ra, torom taio ra in pas tataun a Nutun o God, ma i nuki lena a gapin a kunubus, ra di sa rus talapor tari nami, i a utna oros kut, ma i watung laulau a Tokodos na Nion ra i pitar a marmaris.

Ibru 12:2

Dat in tamtama tokodos sur o Iesu, i ra a kibin anundat a nurnur, ma i ra in ulabo pas anundat a nurnur tuk in kudulano. O Iesu i mat netes unin nanai kutus, a utna na maimai mulus. Ikut ke nuk pas a maimai ra, i pitar tari ut sur in taramo a ngunungut ma in mat unin nanai kutus, uni i tasmani lena, numur in los a labino gasgas. Ra uniri i sa kis una papor sot na laman a kiskis na king anun o God.

Ibru 2:1

I mo ra i wakak sur dat in mur a kum etowo ra dat sa longoro tari. Dat in mur a kum etowo ra, sur gong dat wan gisen gusuni.

Ibru 2:17

Iri a kibino ra o Iesu i wanpat elar ut nama kum tistisino una kum utna rop, sur in mugumugu na tene etabor torom o God ma una nun a pinapam ra torom o God, in ese a marmaris torom a taro, ma a lingmulus na petutna. In pitar anun a nilaun sur in mat, ma o God in unus ru a kum sakino petutna anun a taro, ma in urop ru anun a kankan ma ken kankan melet mo torom det.

Ibru 3:1

I mo ra a kum tistising ra o God i sa pilok pas mot sur mot anun a taro, a nuknuki mot in kis dekdek un o Iesu. I ra a Aposel ma a mugumugu na tene etabor torom o God, ra dat nurnur uni ma dat wasiso puaso uni.

Ibru 3:14

Ra dat turpas a mur o Karisito, dat tur dekdek una nurnur. Ra dat in tur dekdek una nurnur tuk una ururopino, elar nami ra dat pami numugu, dat tagun o Karisito.

Ibru 6:20

O Iesu i sa ruk mugu taru una nubual ra, sur in warut dat. I anundat a mugumugu na tene etabor torom o God, elar nam o Melkisedek, ma anun a pinapam ra in tur tukum.

Ibru 6:6

Ra det in rosumur gusun o God, katutaio in ben pukus lar pas det, sur det in nukpukus. Uni i elar nami ra det sak wat melet a Nutun o God unin nanai kutus, ma det ban umaimai i umatan a taro.

Ibru 7:3

Katutaio i tasman o tamano ma o nano, ma anun a kabotaro. Katu turturkibin ina nun a nilaun, ma katu ururopino kai. O Melkisedek i elar nama Nutun o God, i kai a tene etabor torom o God, ma anun a pinapam in tur tukum.

Ibru 8:1

Iri a labino utna ra met sa wasiso pas uni: Anundat a mugumugu na tene etabor torom o God i sa kis una papor sot na laman a kiskis anun o God, a labino King sakit sapat netes una langit.

Ibru 9:12

Ara dino kut o Iesu i ruk una nubual ra i Tabu Sakit ma ken pam meleti mo. Awu sur i ruk nama gapin a kum meme ma a kum barman na bulumakau sur in etabor nami. I ruk nama gapino ut, ra i kul langolango pas dat. Ma anun a pinapam na kunukul ra, in tur tukum.

Ibru 9:24

Uni o Karisito ke ruk una nubual ra i Tabu Sakit, ra a taro det pami, awu. A nubual ra, a malalar kut tagun a nubual mulus ra i Tabu Sakit. I ruk usapat ut una langit ma uniri i ser tur umatan o God sur in warut dat.

1 Pita 3:22

I ra i wan tito usapat una langit, ra uniri i kis una papor sot na laman o God. Ma a kum ensel, ma a kum nion ra det utur ukai a warkurai, ma a kum nion kai ra det utur ukai a dekdek, det kis utuntudu ino.