Epeses 4:1 - Nupela Testamen long tokples Kandas

¹ A kis una karabus uni a papam torom a Labino. Anung a dekdek na sasaring torom mot i lenri: Mot in laun elar nama nilaun ra o God i sa kabo pas mot suri.

Epeses 4:1 Σταυροειδείς Αναφορές

Aposel 9:31

Numur a taro na lotu tong una tulu papor Judia, Galili ma o Samaria, det kis na malmal. Det kis nama urur torom a Labino, ra a Tokodos na Nion i uragot det. Ra a niluluk ina taro na nurnur i labo nanan.

A Pas anun o Pol torom a taro Rom 11:29

Uni o God ke ser los pukus anun a kum etabor ma ke ser pukus a nuknukino gusun a taro ra i sa kabo pas det. Awu!

A Pas anun o Pol torom a taro Rom 12:1

I mo ra a kum tistising, a saring mot sur mot in pitar tar a pinimot rop torom o God, uni o God i maris doko mot. Mot in pitari elar nama etabor ra i laun, ma katu dur uni, ma i elar nam anun a nemnem ut. I ra anumot a lotu mulus torom o God.

1 Korin 4:16

I mo ra a udekdek pas mot sur mot in mur anung a petutna.

2 Korin 10:1

A ramano taro det watungi lena, ra a kis torom mot, ka ser wasiso dekdek, ikut ra a kis gisen anung a wasiso i dekdek sakit. Iau, o Pol, a saring mot sur mot in longoro iau, uni o Karisito i unatino pasi, ma i papam nama wowowon na magirano torom a taro.

2 Korin 5:20

I mo ra met tur ukinalong o Karisito. Ra met wasiso, i elar nam o God ut i saring mot sur mot in emarom nami, ma met saring mot una risan o Karisito, sur mot in emarom nam o God.

2 Korin 6:1

Met papam tomo nam o God, ra met saring mot, sur gong mot ukio orosi kut a marmaris anun o God torom mot.

Galesia 4:12

A kum tistising, a saring dekdek mot sur mot in kis langolango gusun a Warkurai elar nam iau, uni a elar kut nam mot ra awu sur a te Juda. Numugu ra a kis nisamot, ka mot pam tu laulau ino un iau.

Epeses 2:10

Dat a sap na laman o God. Dat tagun o Karisito Iesu, ma o God i ukis dat sur dat in pam a kum wakak na pinapam, ra o God i sa waninar tari sur dat in pami.

Epeses 3:1

I mo ra iau o Pol, a wararing sur mot. Iau a karabus anun o Karisito Iesu, uni a papam torom mot ra awu sur a taro Juda.

Epeses 4:17

Una risan a Labino, a inanos mot ma a utumarong mot lena, gong melet mo mot laun elar nama kum taro ra ka det nurnur. A nuknukin det ke topas tu utna.

Epeses 4:4

Dat ara pinin o Karisito, ma ara Tokodos na Nion kut i kis un dat rop. Ma o God i kabo pas dat sur dat in takai kut una kinkinis langlang nama nurnur sur a kum wakak na utna ra in udan dat nami.

Epeses 5:2

Mot in laun nama marmaris, elar nam o Karisito i maris dat, ra i pitar tar anun a nilaun sur dat, elar nama etabor ra i sangnain wakak torom o God.

Pilipai 1:27

Asau ra in nanpat, anumot a nilaun in mur sot pas a Wakak na Wasiso anun o Karisito. Ra an nan sur an tama mot, o ra an kis bakbak ma an longoro i kut a wasiso un mot, an tasmani lena, mot tur dekdek un ara nuknuk sot kut, ra mot papam tomo nam ara nuknuki mot kut sur a taro det in nurnur una Wakak na Wasiso,

Pilipai 3:14

A kalabor usa numugu sur a ururopino sur an los pas anung a ikul. A ikul, i a kakabo anun o God torom iau sur a nilaun sapat una langit, kibino un o Karisito Iesu.

Kolosi 1:10

Mir wararing lenri, sur anumot a nilaun in elar nama petutna anun a Labino, ra mot in ser pam a kum utna ra in gas uni. Ra in lenra, anumot a nilaun in wu a wimot una kum wakak na pinapam rop ra mot in pami, ma mot in lubung una numot a tastasman un o God.

Kolosi 2:6

Mot sa los pas o Karisito Iesu sur i a Labino una numot a nilaun, i wakak sur mot in laun bolbolos ut uni.

Kolosi 4:12

O Epapras, i ara ut tagun mot, ma a tultul anun o Karisito Iesu, i pitar anun a marmaris torom mot. I ser wararing dekdek sur mot, sur mot in tur dekdek una numot a kinkinis na nilaun un o Karisito, ma mot in tasman mulus a nemnem rop anun o God.

1 Tesalonaika 2:12

Metul udekdek mot, metul wasiso na emarom torom mot, ma metul inanos mot sur mot in laun nama ngas na nilaun ra i ugasgas o God, i ra i kabo pas mot sur anun a matanitu ma anun a minamar.

2 Tesalonaika 1:11

I mo ra metul ser wararing sur mot torom anundat a God, sur in watung mot lena mot tokodos sur a ngas na nilaun ra i kabo pas mot suri. Ma una dekdekino in warut mot, sur mot in pam sot pas a kum wakak na pinapam ra mot nem na pami, ma a kum petutna rop ra anumot a nurnur i pam pati.

2 Timoti 1:9

I ut i sa ulaun pas dat, ma i kabo pas dat sur a nilaun ra katu dur uni. Awu sur i kibino una nundat a kum wakak na pinapam, awu. I kibino ut una nun a nemnem, ma anun a marmaris, ra i pitar tari torom dat un o Karisito Iesu. Numugu utmakai, ra ke ukisi utmakai a rakrakon bual, i maris mugu dat.

Taitus 2:10

Gong det wolong anundet a kum mugumugu. Det in upuaso anundet a wakak na petutna, sur anundet a kum mugumugu det in nurnur un det, sur in upuaso i lena, a etowo un o God a Tene Ulaun anundat i wakak.

Ibru 13:21

A wararing torom o God sur in tabor mot nama kum wakak na petutna rop, sur mot in mur anun a nemnem. A wararing kai un dat, lena, una pinapam anun o Iesu Karisito, o God in papam una nilaun anundat sur asau ra in gas nami. Dat in watung ulabo pas o Iesu Karisito, ken rop ma ken rop. Amen.

Ibru 3:1

I mo ra a kum tistising ra o God i sa pilok pas mot sur mot anun a taro, a nuknuki mot in kis dekdek un o Iesu. I ra a Aposel ma a mugumugu na tene etabor torom o God, ra dat nurnur uni ma dat wasiso puaso uni.

1 Pita 2:11

A kum wakak na paspasang, mot kis na usiro nin una rakrakon bual, awu sur anumot a tamon ri. I mo ra a saring mot, sur gong mot mur a kum sakino nemnem ina pinimot, ra det inaim nama niomot.

1 Pita 3:9

Gong mot balu a laulau ino nama laulau ino, ma gong mot balu a sakino wasiso nama sakino wasiso. Mot in watung udan det ra det pam a laulau ino torom mot, uni o God i kabo pas mot sur mot in pami lenra, ra in watung udan mot.

1 Pita 5:10

Ikut o God, i a God na marmaris, ma un o Karisito i kabo pas mot sur mot in kis tomo nami una nun a minamar ra ken rop. Ra mot sa taramo tar a ngunungut un tu nat na du bung kut, numur i ut in uwakak pas mot melet, in udekdek mot ma in warut mot sur mot in tur dekdek.

2 Pita 1:3

Una dekdekin o God, i tabor dat nama kum utna rop ra dat sibo suri, sur dat in laun wakak, ma dat in mur a petutna ra i wakak umatan o God, uni dat tasman o God, i ra i kabo pas dat, sur dat in los anun a minamar ma a wakak na magirano.

2 Jon 1:5

A wakak na ino, uniri a saring ui, sur dat in nem etetalai dat. Awu sur a tumus tu matok na warkurai torom ui, awu. A warkurai kut ra dat sa longoro tari tagun numugu.