Epeses 3:8 - Nupela Testamen long tokples Kandas

⁸ Ma iau, a natino sakit tandet rop a taro anun o God. Ikut i maris iau, ra i pitar tar a pinapam ri tang, sur an warawai torom det ra awu sur a taro Juda una kum utna anun o Karisito ra i labo sakit, ma ken elar sur taio in tasman rop pasi.

Epeses 3:8 Σταυροειδείς Αναφορές

Luk 14:22

Numur a tultul i watungi lena, ‘Labino, a sa pam tar a kum utna rop ra u itula suri, ikut a ramano kum kolo liklik kura utmakai una rumu.’

A Wakak na Wasiso un o Iesu Karisito o Jon i tumusi 1:16

I bukus nama marmaris, ma gusun anun a labino marmaris i udan dat nama susut na wakak na utna ra i wanan pat torom dat.

Aposel 5:41

Ra a kum aposel det pirso gusun a kiwung, ma det gas, uni o God i tama det lena det wakak sur det in los a maimai una risan o Iesu.

Aposel 9:15

Ikut a Labino i watungi tano lena, “Un nan kut, uni a sa pilok pasi, sur i anung a tene pinapam. In wasiso puaso una risang torom a taro ra awu sur a taro Israel, torom a kum king, ma torom a taro Israel kai.

A Pas anun o Pol torom a taro Rom 11:33

Nandet! I labo sakit a kum wakak na ululeng anun o God, anun a wakak na nuknuk ma anun a mananos. A warkurai anun o God i labo sakit, kataio in palos lar pasi. Katutaio i tasman anun a kum kisapi.

A Pas anun o Pol torom a taro Rom 12:10

Mot in nem etetalai mot elar nami ra mot nem a kum tistisi mot. Mot in urur etetalai torom mot, ma gong mot nuk pas mot ut.

A Pas anun o Pol torom a taro Rom 2:4

I sa ese anun a wakak na petutna ra i bukus torom mot, ma ke warkurai lakit mot una numot a kum sakino petutna, ma a pinino ke ngoro lakit nam mot. Pepetlai, mot nuk penpen kut una nun a kum wakak na petutna ra? Pepetlai, ka mot tasmani lena, i maris mot lenri sur mot in nukpukus?

1 Korin 1:30

O God ut i sa pam tar a kisapi sur mot in laun tomo nam o Karisito Iesu, ma i pitar tari sur i a kimkibin anundat a mananos. Un o Karisito, o God i watung dat lena dat tokodos umatano, ma dat anun a taro. Ma una pinapam anun o Karisito, o God i kul langolango pas dat gusun anundat a kum sakino petutna.

1 Korin 15:9

Uni iau, a natino sakit taun a kum aposel rop, ma ka wakak sur din watung iau ara aposel, uni a ser ban laulau a taro na lotu anun o God.

1 Korin 2:9

Ikut, i elar nama wasiso ra di sa tumus tari una Buk Tabu lenri, “A kum utna ra kataio i tama i, ma kataio i longoro i, ma ke wanpat tagun a nuknukin taio, a kum utna ra, o God i sa waninar tari sur det ra det nem doko i.” Ais 64:4

Galesia 1:16

sur in upuaso o Iesu a Nutunu torom iau, sur an warawai nami torom a taro ra awu sur a taro Juda. Katu musano i ususer iau uni.

Galesia 2:8

O God i pitar tar a dekdek tan o Pita sur in aposel torom a taro Juda, lenkutkai ra torom iau, i pitar tar a dekdek tang sur an aposel torom det ra awu sur a taro Juda.

Epeses 2:7

O God i pami lenra, sur in ese anun a marmaris torom dat un o Karisito Iesu, sur anun a labino marmaris sakit in nanpat talapor torom a kum taun taro numur.

Epeses 3:1

I mo ra iau o Pol, a wararing sur mot. Iau a karabus anun o Karisito Iesu, uni a papam torom mot ra awu sur a taro Juda.

Epeses 3:16

Ma o God anun a ululeng i bukus nama minamar. Ra a wararing sur in tabor mot nama Niono, sur in udekdek a niomot,

Epeses 3:19

A wararing sur mot in tasman a marmaris anun o Karisito, ra i labo taun a mananos anun a taro, sur mot in bukus nama kudulano nilaun anun o God.

Epeses 3:2

A nuki lena, mot sa longoro tari lena, o God i sa pitar tar a pinapam ri tang una nun a labino marmaris, sur an warut mot.

Pilipai 2:3

Gong mot pam tu utna sur in warut mot ut, ikut ken warut ara taro kai. Gong mot pam tu utna sur mot in ulabo pas mot nami. Mot in unatino pas mot ma mot in nuk ulabo pas ara taro gisen.

Pilipai 4:19

A God anungi in pam sot a kum utna rop ra mot sibo suri, tagun anun a kum wakak na ululeng ra anundati, kibino un o Karisito Iesu.

Kolosi 1:27

O God i upuaso i lena, a taro ra awu sur a taro Juda, det kai det in tasman a utna ra numugu i kis eno, ra i wakak doko ma in udan det. Iri a utna ra: o Karisito ut i kis una numot a nilaun, i mo ra, mot kis langlang nama nurnur sur a minamar anun o God, ra mot in rakoni.

1 Timoti 1:13

Numugu a ser watung laulau o Iesu, a ban laulau a taro na nurnur ma a ukadik det. Ikut o God i maris iau, uni ka tasman asau ra a pami, ma ka nurnur utmakai.

1 Timoti 1:15

I wan pirso urin una rakrakon bual sur in ulaun a kum tene sakino. A wasiso ri i lingmulus sakit, ma dat in nurnur uni. Ma iau, a laulau sakit tan a kum tene sakino rop.

1 Timoti 2:7

Iri a kibino ra o God i pilok pas iau, sur an aposel ma an warawai nama Wakak na Wasiso, ma an ususer a taro ra awu sur a taro Juda nama nurnur mulus. A watung a lingmulus, awu sur a toro.

2 Timoti 1:11

O God i sa pilok pas iau sur an tene warawai nama Wakak na Wasiso, an aposel ma an tene ususer kai uni.

Tamtama 3:18

A warut mot nama kum nuknuk ri: Mot in kul a gol tang, ra di sa tun talapor tari una sungun, sur mot in tene ululeng. Ma mot in kuli kai in kabang na malu ma mot in pipisi, sur mot in pipis bat a mengere ra mot ser maimai nami. Ma mot in kul a marasin, ma mot in ubeki umatamot, sur mot in tamtama.