Epeses 1:4 - Nupela Testamen long tokples Kandas

⁴ Numugu utmakai ra o God ke ukisi utmakai a rakrakon bual, i sa pilok tar dat, sur dat anun a taro, ma katu etakun in los dat umatano, uni dat kis un o Karisito.

Epeses 1:4 Σταυροειδείς Αναφορές

Matiu 24:22

Ra gunuk o God ken kutus pirso a kum bung ra, kataio ut in laun. Ikut in kutus pirso ru i sur det ra i sa pilok pas det, det in laun.

Matiu 24:24

Uni lako kum torotoro na Karisito, ma lako kum torotoro na poropet det in nanpat. Det in pam lako kum labino ukinalong ma lako kum utna na ukisin sur det in toro pas a taro ra o God i sa pilok pas det, raut ko det in pet lar pasi. Ikut ka det in pet lar pasi.

Matiu 24:31

In tuwuru in tangis bing, ra a Nutun a Musano in tulu pirso anun a kum ensel, sur det in ben tomo anun a taro na pipilok tagun a wat na matmatano wuwu, tagun ara papor rakrakon bual tuk tong una ara papor rakrakon bual.

Matiu 25:34

A king in watungi tandet ra kura una papor sot na lamano lena, ‘Mot wan urin, mot ra o Tita i sa watung udan tar mot. Mot in rakon pas a matanitu di sa waninar tari sur anumot, tagun numnumugu utmakai una turturkibin ina rakrakon bual.

A Wakak na Wasiso un o Iesu Karisito o Jon i tumusi 10:16

Anung a ramano kum sipsip kai, ka det kis unin noworo na sipsip ri. An ben pas det utkai, ma det in longoro in nalngang, sur det rop det in kis kut unin teken noworo, ma ara sot kut in tene tamtamabat anundet.

A Wakak na Wasiso un o Iesu Karisito o Jon i tumusi 15:16

Awu sur mot pilok pas iau, iau ut a pilok pas mot. Ra a pitar a pinapam tamot sur mot in nan ma mot in wu a wimot, ma a wimot in kis tukum. Ma o Tita in tabor mot nama sau ra mot sasaring suri nama risang.

A Wakak na Wasiso un o Iesu Karisito o Jon i tumusi 17:24

“Tita, a nemi sur det ra u sa pitar tar det tang, det in kis tomo nam iau una tamon ra an kis iai, sur det in tama anung a minamar, a minamar ra u pitar tari tang, uni u nem iau numugu ra ko ukisi utmakai a rakrakon bual.

Aposel 13:48

A taro ra awu sur a taro Juda det longoro a wasiso ri, ra det gas doko, ma det watung ulabo pas a wasiso anun a Labino. Ma det rop ra di sa pilok pas det sur a nilaun tukum, det nurnur.

Aposel 18:10

Uni an kis tomo nam ui, ma kataio in ban laulau ui, uni anung a susut na taro kuri una tamon ri.”

A Pas anun o Pol torom a taro Rom 8:33

Osi ra in takun a taro na pipilok anun o God? Katutaio in pet lar pasi, uni o God ut i sa watung tar dat lena dat tokodos umatano.

1 Korin 1:8

I ut in udekdek mot tuk una ururop na bung, sur katu utna ra din takun mot nami una bung anun anundat a Labino o Iesu Karisito.

Galesia 5:13

A kum tistising, o God i sa kabo pas mot toromi sur mot in langolango mulus. Ikut gong mot nuki lena mot sa langolango sur mot in mur a kum sakino nemnem ina pinimot, awu. Mot in warut etetalai mot nama marmaris.

Galesia 5:22

Ikut, a Tokodos na Nion i wu a kum petutna ri: A marmaris, a gasgas, a malmal, a kinkinis wowowon, a petutna na warut torom taio, a wakak na petutna, a pam a lingmulus na pinapam,

Galesia 5:6

Ra kura dat un o Karisito Iesu, ra di tok talilis a pinin taio, o ka di tok talilisi, i a utna oros kut umatan o God. Ara utna kut ra i labo sakit umatan o God, a nurnur ra i pam pat a marmaris.

Epeses 2:10

Dat a sap na laman o God. Dat tagun o Karisito Iesu, ma o God i ukis dat sur dat in pam a kum wakak na pinapam, ra o God i sa waninar tari sur dat in pami.

Epeses 3:17

sur o Karisito in kis una balamot, ra mot nurnur uni. Ra a wararing sur anumot a marmaris in tur dekdek elar namin nanai ra a wakakorino i rarau.

Epeses 4:2

Mot in unatino pas mot, ma mot in kis na malmal. Mot in ese a wowowon na magiramot, ma mot in maris etetalai mot, ma gong mot balano sungun ra a ramano taro tagun mot det raro un lako kum utna.

Epeses 5:2

Mot in laun nama marmaris, elar nam o Karisito i maris dat, ra i pitar tar anun a nilaun sur dat, elar nama etabor ra i sangnain wakak torom o God.

Epeses 5:27

I pami lenri sur in ben pas anun a taro toromi, elar nam anun a wakak na ino ra katu dur uni, ma kalako karkar uni, ma katu sakino utna uni. In tokodos ma katu etakun in losi.

Pilipai 2:15

sur mot in langolango gusun a kum etakun ma mot in tokodos, a kum nutnutun o God, ma katu niraro un mot, epotor tan a taro ra ka det tokodos ma a magirandet i laulau sakit. Ra mot etabor nama wasiso na nilaun, mot in talapor epotor tandet elar nama kum nangnang ra det talapor una rakrakon bual. Ra mot in pami lenra, an warango mot una bung anun o Karisito, uni in talapor lena, ka kalabor oros kut, ma anung a pinapam ke utna oros kut.

Kolosi 1:22

Ikut uniri, o God i sa dat pas mot toromi, sur mot pasano melet. I pam a pinapam ri, nama pinin o Karisito ra i mat, sur in ben pas mot umatan o God, ma mot anun a taro, ra katu niraro kura un mot, ma katu etakun in los mot.

Kolosi 2:2

A pami lenra, sur in uragot anundet a nilaun, ma det in kis na marmaris tomo, sur det in bukus nama labino mananos, sur det in tasman a utna anun o God, ra numugu i kis eno, i ra o Karisito ut.

Kolosi 3:12

Mot a talapor na taro anun o God, ra i maris doko mot, ma i pilok pas mot. I mo ra, i wakak sur mot in emar nama kum petutna ri: mot in warut a taro, mot in pam a wakakino torom det, mot in unatino pas mot, mot in kis na malmal ma mot in ese a wowowon na magiramot.

1 Tesalonaika 3:12

Ma metul wararing kai sur a Labino in ulabo anumot a marmaris, ma in bukus ma in tilingis epotor tamot ma torom a taro gisen kai, elar nama numetul a marmaris kai torom mot.

1 Tesalonaika 4:7

Uni, o God ke kabo pas dat sur a dur na petutna, i kabo pas dat sur dat in mur a tokodos na nilaun.

2 Timoti 1:9

I ut i sa ulaun pas dat, ma i kabo pas dat sur a nilaun ra katu dur uni. Awu sur i kibino una nundat a kum wakak na pinapam, awu. I kibino ut una nun a nemnem, ma anun a marmaris, ra i pitar tari torom dat un o Karisito Iesu. Numugu utmakai, ra ke ukisi utmakai a rakrakon bual, i maris mugu dat.

2 Timoti 2:10

I mo ra a taramo a kum ngunungut, ikut a tur dekdek ut, sur det ra o God i sa pilok pas det, det kai det in nurnur un o Karisito Iesu ma in ulaun pas det, ma det in los a minamar tukum.

2 Timoti 2:19

Ikut, o God i sa ubek tar a kibin a nurnur ra ken tugunu, ma di sa tumus tar a wasiso uni lena, “A Labino i tasman det ra anunu.” Nam 16:5 Ma di sa tumus tari kai lena, “I ra i watungi lena i anun a Labino, in nan gisen gusun a sakino petutna.”

Jems 2:5

A kum wakak na tistising, mot in longoro iau: Pepetlai, ka mot tasmani lena, o God i pilok pas a kum sibo na taro nin upiso, sur det in tene gongon una nurnur? Det in rakon pas a matanitu ra o God i sa uliliman tari, sur in pitari tandet ra det nemi.

1 Pita 1:2

O God a Tamandat i sa pilok pas mot ra i sa tasman mugu tar mot, ma a Tokodos na Nion i umatok pas mot sur mot a taro anun o God, sur mot in mur a wasiso anun o Iesu Karisito, ma in rus mot nama gapino. A marmaris ma a malmal in kis torom mot, ma in labo sakit.

1 Pita 1:20

O God i sa pilok pasi numugu utmakai ra ke ukisi utmakai a rakrakon bual, ma uniri, una kum ururop na bung, i sa wanpat sur in warut mot.

1 Pita 2:9

Ikut mot a taro na pipilok, a kum tene tuntun etabor anun a King, a tokodos na kabotaro, ma a taro anun o God. O God i sa kabo pas mot gusun a dumirum sur anun a talapor ra i wakak doko, sur mot in wasiso puaso una anun a kum wakak na pinapam.

2 Pita 3:14

A kum wakak na paspasang, ra mot kis langlang sur a bung ra, mot in dekdek sur gong tu dur una numot a nilaun, ma katu etakun in los mot un tu utna, ma mot in kis na malmal tomo nam o God.

1 Jon 4:16

I mo ra dat ut, dat tasman a marmaris anun o God torom dat ma dat nurnur uni. O God, i a kimkibin a marmaris. Osi ra i tasman a marmaris, i laun un o God, ma o God i laun uni.

Tamtama 13:8

Ma det rop ra det kis una rakrakon bual, ra a risandet ke kis una buk na nilaun, ra di sa tumus tari numugu ra o God ke ukisi utmakai a rakrakon bual, det in lotu torom a kuabor na wewegua. A buk na nilaun ra, anun a Barman na Sipsip, ra di um doko ru i.

Tamtama 17:8

A kuabor na wewegua ra u tama tari, i laun pas numugu, ma ke laun uniri, ma numur in nanpat melet tagun in labino tung ra katu tuktukino, ma in nan sur in iru. Ma a taro una rakrakon bual ra ka di tumus a risandet una buk na nilaun, turpasi ra o God i ukis a rakrakon bual, det in kisin ra det in tama a kuabor na wewegua ri. Uni i laun pas numugu, ma ke laun uniri, ma numur in nanpat melet.