1 Jon 5:20 - Kobon

²⁰ Hon nɨŋbun, God Ñɨ nɨpe apöm gasɨ aij hanɨp ñö, God pör kabö göl hagab u nɨp nɨŋnabun. Ñɨ nɨpe Jisas Krais aip jɨm ñöl mɨdpun u me, Nap God Bɨ kabö göl u aip jɨm ñöl mɨdpun. Jisas Krais nɨpe God kabö göl me. Nɨpe kamɨŋ pör mɨdep Bɨ u.

1 Jon 5:20 Σταυροειδείς Αναφορές

Madyu 13:11

Hageila haga, “God nɨbi bɨ nɨpe udöm abad mɨdeinab manö pi göl mɨdmɨdöp u, kalöp gasɨ ñö nɨŋnabim; pen nɨbi bɨ yɨharɨŋ gau nɨŋagnaböl.

Luke 21:15

Yad ke kalöp gasɨ aij ñem manö magö ñɨnö, kale manö anɨbu nöp hag ñɨbe, kale pen hagöm ud yuep rö lagnab.

Luke 24:45

Anɨg hagöm, God Manö kalɨ kƚiñ rɨkla u nɨŋ aij gɨlaŋ, a göm, gasɨ aij yabɨƚ u kalɨp ña.

John 1:18

Nɨbi bɨ rɨmnap God nɨp nɨŋagal. Ñɨ añɨ nɨpe u nöp nɨpe ke God. Nɨpe Nap aip mɨdpil. Nɨpe Nap nɨpe hag waiö la nɨŋöm mɨñi hon Bap God hadö nɨŋbun.

John 10:30

Bapi ke, yad ke, wasö; hol apɨl añɨ yabɨƚ mɨdpul,” a ga.

John 14:20

Ñɨn anɨbu yad Bapi yad aŋ nɨpe daŋ mɨdpin manö hagnö iƚ u nɨŋ aij gɨnabim. Pen kale yɨp aŋ daŋ mɨdpim, yad kalöp aŋ daŋ mɨdpin iƚ u u rö nöp nɨŋ aij gɨnabim.

John 14:23

Hageia, Jisas haga, “Nɨbi bɨ an yɨp mɨdmagö lɨnab u, manö hagpin u udöm hagpin rö nöp gɨnab. Bapi yad nɨp mɨdmagö löm, hol apɨl nɨp apul, nɨp aip mɨdeinabun.

John 14:6

Hageia, Jisas haga, “Yad nöp adan; yad nöp manö nɨŋö; yad nöp kamɨŋ mɨdep iƚ u. Nɨbi bɨ yɨp aunaböl gau nöp, Bapi aunaböl. Nɨbi bɨ yɨp auagnaböl gau, Bapi auagnaböl.

John 14:9

Hageia, Jisas haga, “Pilip. Yad kalöp aip mɨlö padö mɨdainö u, yɨp nɨŋagmön anɨg hagabön ar? Nɨbi bɨ yɨp amgö nɨŋbal gau, Bapi abe hadö amgö nɨŋbal. Anɨb u, ne nɨhön gɨnɨg hagabön, ‘Bapi hanɨp yamö nɨŋun,’ a gabön?

John 15:4

Yɨp aŋ daŋ mɨdaimim; yad kalöp aŋ daŋ mɨdeinabin. Lö kɨd gau, iƚ halö jɨm ñöl mɨdöm nöp, magö pɨlnab; ke nöp mɨdöm magö pɨlagnab. Anɨb unbö rö nöp, kale yɨp jɨm ñöl mɨdageinabim u, magö rɨmnap pɨlagnab.

John 17:14

Manö aij ne u kalɨp hag ñɨnö nɨŋ udpal rö, nɨbi bɨ mɨnöŋ naböŋ iƚ i gau kalɨp mulu kal nɨŋbal. Yad nɨbi bɨ mɨnöŋ naböŋ iƚ i gasɨ nɨŋbal rö gasɨ nɨŋagpin rö, kale u rö nöp nɨbi bɨ mɨnöŋ naböŋ iƚ i gasɨ nɨŋbal rö gasɨ nɨŋagpal. Anɨb u me, nɨbi bɨ mɨnöŋ naböŋ iƚ i kalɨp mulu kal nɨŋbal.

John 17:25

“Bapi! Ne me bɨ asɨŋ mɨdagöp! Nɨbi bɨ mɨnöŋ naböŋ iƚ i gau kale nöp nɨŋagpal. Pen yad nöp nɨŋbin. Nɨbi bɨ yad gai i ne nöp yɨp yuö aunö u, nɨŋbal.

John 17:3

Nɨbi bɨ kale, ne God nɨŋö añɨ nöp mɨdpan u nɨŋöm, yɨp Jisas Krais yuna u nɨŋnaböl nɨbi bɨ gau, pör pör nöp kamɨŋ mɨdeinaböl.

John 20:28

Hageia, Domas haga, “Bɨ Kub yad, God yad!” a ga.

John 8:42

Anɨg hageila, Jisas pen haga, “ ‘God añɨ me Bapi hon yabɨƚ,’ a gɨpim u pen God nɨpe Bapi kale mɨdböp, yad God nɨbö apem, uri aui mɨdpin u nɨŋmim, yɨp mɨdmagö lɨbep. Yad gau mɨdem, gasɨ yad ke nɨŋem auagnö; God aip mɨdul, yɨp nɨŋebir hag yua, aui aunö.

Aposɨl 20:28

Kale ke nɨŋ aij gɨmim, nɨbi bɨ Ana Uɫ nɨpe hagö abad mɨdpim gau abe nɨŋ aij gɨmim mɨdaimim. Bɨ kaj sipsip mukep gau kaj sipsip kale gau abad mɨd aij gɨpal rö, kale u rö nöp, God nɨbi bɨ nɨpe, hagape nɨpe ke rau adog uda nɨbi bɨ anɨb gau me, kalɨp abad mɨd aij gɨmim midaimim.

Romans 9:5

Isrel nɨbi bɨ nɨhi iƚaŋ kale Ebraham, Aisak, Jekop bɨ gau me. Ebraham, Aisak, Jekop ñɨ pai rɨklö, rɨk dam dapɨl gɨ damöm, Isrel nɨbi bɨ kalɨp rɨk daula. Kɨgɨn añɨ u nöp rɨk dam dapɨl gɨ damöm, Krais nɨp bɨ yabɨƚ rɨk daula. Krais nɨpe ke God mɨdöm, nɨbi bɨ magöŋhalö abadab. Kale magöŋhalö hib nɨpe u pör haglö adö araŋ.

1 Korid 1:30

God gö, Krais Jisas aip jɨm ñöl mɨdpim. Anɨb u, God gö, Krais Jisas nɨp nɨŋ udun, nɨp aip jɨm ñöl mɨdun, nɨp gasɨ nɨŋöl gɨ mɨdpun u me, hon gasɨ kɨd hiɨk nɨŋeb nɨbi bɨ rö mɨdpun. Krais aip jɨm ñöl mɨdpun u me, God hanɨp nɨŋöm nɨbi bɨ kamɨŋ aij yad a gab. Krais aip jɨm ñöl mɨdpun u me, God hanɨp nɨŋöm nɨbi bɨ asɨŋ mɨdagöp yad ke a gab. Krais aip jɨm ñöl mɨdpun u me, God hanɨp nɨŋöm nan si nan naij gɨpal gac u Ñɨ yad hadö ƚɨk gɨ yua a gab.

2 Korid 4:6

God nöd “Sɨbön aŋ yaŋ mailö gaŋ,” a ga. God añɨ anɨbu nöp mailö nɨpe mɨdmagö aŋ hon daŋ ñɨ lab. Anɨb u, God mailö aij nɨpe u Krais mulu majmaŋ mailö gab u hadö nɨŋbun.

2 Korid 5:17

Nɨbi bɨ Krais nɨp cɨg gɨpal gau, God gö kamɨŋ gɨsön nɨbö adö u mɨdpal. Nan nöd nɨbö u pɨs gö, nöd mɨdmɨdal rö mɨdagpal; nan gɨsön nɨbö hadö auub.

Epesas 3:18

Yad sabe gabin, kale abe Krais nɨbi bɨ magöŋhalö gau abe, Krais nɨpe pör nöp nɨbi bɨ mɨdmagö yabɨƚ löp u nɨŋnabim.

Pilipai 3:9

Yad Krais aip jɨm ñöl nöp mɨdeinam. Yad Juda lo manö adö u geinabin u, God yɨp nɨŋöm bɨ kamɨŋ aij yad hagagnab. Pen Krais nɨp nɨŋ udpin u me, God yɨp nɨŋöm bɨ kamɨŋ aij yad hagöp.

1 Dimodi 3:16

Nɨŋö nöp, God manö nɨpe hagöp u manö nɨŋö yabɨƚ hagöp: Krais Jisas bɨ hañ romaŋ lö, nɨbi bɨ nɨp waiö nɨŋla. God Ana, Jisas gɨ aij yabɨƚ nöp göp, a ga. Ejol kumi kabö adö laŋ au nɨp nɨŋla. Nɨbi bɨ ram mɨnöŋ gau gau ajöm, manö aij nɨpe nɨbi bɨ gau kalɨp hag ñeila. Nɨbi bɨ ram mɨnöŋ gau nɨp nɨŋ udla. Nap nɨpe nɨp ud mailö aij unbö ke halö kumi kabö adö laŋ au ud ara.

Daidas 2:13

Anɨb u, God hon Jisas Krais hanɨp ud Kamɨŋ yuöp u, mailö halö ado gɨ aunab a gun, gasɨ halö mɨdun aij gö nɨŋöl gɨ mɨdpun.

Hibru 1:8

Pen God nɨpe Ñɨ nɨpe nɨp manö hagöm haga, “Ne God. Ne Kiŋ pör nöp pör nöp mɨdmön, nɨbi bɨ ne gau pör nöp abad mɨdeinabön. Nɨbi bɨ ne abad mɨdmön, gɨ aij gɨmön, kabö rö nöp gɨmön, abad mɨdeinabön.

1 Jon 2:23

Nɨbi bɨ Jisas nɨpe God Ñɨ wasö gɨpal gau, kale Nap nɨp nɨŋagpal. Pen nɨbi bɨ Jisas nɨpe God Ñɨ nɨpe mɨdöp hag waiö gɨpal gau, kale Nap nɨp abe nɨŋbal.

1 Jon 2:24

Manö nöd nɨŋbe u, mɨdmagö aŋ kale daŋ ud aij göl gɨ mɨdmim. Manö nöd nɨŋbe u, mɨdmagö aŋ kale daŋ ud aij göl gɨ mɨdeinabim u, God Ñɨ aip jɨm ñöl mɨdmim, Nap aip jɨm ñöl mɨdmim mɨdeinabim.

1 Jon 4:14

Bapi God Ñɨ nɨpe nɨbi bɨ kalɨp ud kamɨŋ yunɨm, a göm, yua u, hon amgö hon ke nɨŋun, nɨbi bɨ gau kalɨp hag ñabun.

1 Jon 4:16

Anɨbu, God nɨpe hanɨp mɨdmagö yabɨƚ löp u nɨŋ udun, gasɨ anɨbu nɨŋöl gɨ nöp mɨdpun. God Bɨ mɨdmagö lep. Nɨbi bɨ mɨdmagö lɨbal gau, God aŋ daŋ mɨdpal; God kalɨp aŋ daŋ mɨdöp.

1 Jon 4:2

God Ana ana kale aip jɨm ñöl mɨdöp mɨdagöp u, ai göl gɨmim nɨŋnabim? Jisas Krais nɨpe bɨ hañ romaŋ löm, ram mɨnöŋ iƚ i aua, a gɨnaböl u, God Ana kale aip mɨdöp u, a gɨ nɨŋnabim.

1 Jon 5:1

Nɨbi bɨ, Jisas nɨpe Krais, a göm nɨŋ udpal gau, kale magöŋhalö God ñɨ pai nɨpe mɨdpal. Pen nɨbi bɨ nap mɨdmagö lɨbal gau, ñɨ nɨpe u rö nöp mɨdmagö lɨbal.

1 Jon 5:15

Anɨbu, hon nɨŋbun, nan nɨhön nɨhön hag nɨŋeinabun, hagnabun rö nöp gɨnab.

1 Jon 5:18

Hon nɨŋbun, nɨbi bɨ God ñɨ pai nɨpe mɨdpal gau, nan si nan naij gagnaböl; God Ñɨ nɨpe kalɨp abad mɨdö, Seden kalɨp gɨ naij gɨnɨm rö lagöp.

1 Jon 5:5

Nɨbi bɨ, Jisas nɨpe God Ñɨ nɨpe yabɨƚ, a göm, nɨŋ udpal gau nöp, nɨbi bɨ God Manö nɨŋagpal gau nagɨ gɨpal adö u, gasɨ kalɨp ɫɨp gɨ ud aröl rö lagöp.

Repelesin 15:3

bɨ Mosɨs God nɨp wög gɨ ñɨmɨdöp manö u abe, Sipsip Pi manö u abe hagöl gɨ, kɨmap hagöm hagla, “God, ne Bɨ Kub kƚö unbö ke halö nan nɨhön gɨnabin a gɨnabön, gɨnabön. Ne kiŋ bɨ kub ram mɨnöŋ gau magöŋhalö, Kiŋ kale mɨdpan u, pör pör yɨjɨg gɨmön, kabö rö nöp gɨpan.

Repelesin 19:11

Pen magö u nɨŋnö, kumi kabö adö laŋ mɨgan hiɨka nɨŋöm bɨ ap kaj hos rud ap adö asɨk mɨdeia. Bɨ kaj hos adö asɨk mɨdeia bɨ anɨbu, hib nɨpe mɨhöp: hib ap Cɨg Göp, hib ap Kabö Rö. Nɨpe nɨbi bɨ gau kalɨp manö kub hagöm, manö ud asɨk aij göm, pen ilön ñöb u, haƚöwaƚö ñagöp, gɨpal rö nöp nɨŋöm ñöb. Anɨg unbö rö nöp u, nɨbi bɨ gau aip pen pen göm al rɨdɨk yuöp u, gasɨ nɨŋ aij göm, manö ud asɨk aij göm, pen pen göm al rɨdɨk yuöp.

Repelesin 3:14

“Pen daun kub Leodisia Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön: ‘Bɨ hib nɨpe “Anɨb Unbö Rö Gɨnɨm” u; Bɨ, God nɨpe hagö, nan gau magöŋhalö gɨ la u; Bɨ nɨpe God hagöp rö nöp göm, manö aij u dam kabö göl nöp hag ñöb u, Leodisia nɨbi bɨ abad mɨdpan gau kalɨp manö anɨbi hag yuöp.

Repelesin 3:7

“Pen daun kub Piladelpia Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön: ‘Bɨ Uɫ u; Bɨ manö nɨŋö yabɨƚ hagöp u; kiŋ Depid ki rib nɨpe nöd abad mɨdmɨdöp u, Bɨ ki rib anɨbu uri udöl mɨdöp u, adan hiɨkö, nɨbi bɨ rɨmnap gɨ ñöl rö lagöp; pen adan gɨ ñö, nɨbi bɨ rɨmnap hiɨköl rö lagöp. Bɨ anɨbu nöp, Piladelpia nɨbi bɨ abad mɨdpan gau kalɨp manö anɨbi hag yuöp.

Repelesin 6:10

Kale wɨñ kub alöm hagla, “God Bɨ Kub kƚö yabɨƚ. Ne Bɨ Uɫ. Ne nɨŋö yabɨƚ adö u nöp gɨpan! Pen ñɨn aigegö rö mɨdmön, nɨbi bɨ ram mɨnöŋ iƚ yaŋ, hanɨp al pak lɨla gau kalɨp manö kub gɨmön, ilön ñɨnabön?” ö gɨla.