I Samuel 5:8 - Sră Goh 2018

⁸ Behơ̆ bol khai hòi pơjum jơh ală cau kwang at bồ làng bol Philistin dê mơ lùp bol khai lah: “Ñchi bol he rơp lơh mơ Đài Yàng Tom Trồ Israel dê taih?” Làng bol Gat ho lah: “Pal cèng Đài Yàng Tom Trồ Israel dê tus hơ bol hi.” Behơ̆ bol khai cèng Đài Yàng Tom Trồ Israel dê tus hơ ƀòn cau Gat dê.

I Samuel 5:8 Σταυροειδείς Αναφορές

I Yal Yau 7:21

Jabat kòn klau khai dê, mơ Suthela kòn klau khai dê. Ejer mơ Eleat neh kong cau deh tòm lơgar Gat tơnchơt tòm tŭ bol khai lòt tus nàng tòmpìt ai mpồl phan poan jơng bol hơ̆ dê.

Amôs 6:2

Lòt gan tĕ hơ Kalneh mơ sền, bơh hơ̆ lòt tus hơ ƀòn dờng Hamat, lồc behơ̆ mù tus hơ Gat tòm lơgar Philistin. Bol mê la niam rlau mơ ală lơgar bơtau do sơl? Hala ù tiah bol mê dê la dờng ơnàng rlau mơ ù tiah bol khai dê ơ?

Sacari 12:3

Tòm ngai hơ̆, tòm tŭ jơh ală làng bol tòm ù pơjum bal tòmdră mơ Jerusalem, Añ rơp lơh Jerusalem in gơlik gơs kung be dô pơnai lŭ klềr cau ò rgơi pơrlă gơwèt mơ jơh ală làng bol. Jơh ală cau lơi kòñ pơrlă gơ gen să tòm bol khai rơp kong jê sồt.”

Jôsue 13:3

Bơh hiòng Sihor đah mattơngai lik lơgar Ejiptơ tus di nhàr đah đang Ekrôn dê, jơh ù tiah hơ̆ la gơrê bal mơ làng bol Kanaan (gơs pram nă bơtau at bồ làng bol Philistin dê, hơ̆ la bơtau Gaja, Asdôt, Askalôn, Gat, mơ Ekrôn la ù tiah làng bol Abim dê),

Jôsue 15:11

Nhàr gơ lòt tus hơ kơh mơnơm đah đang Ekrôn, gen lòt wơl hơ đah Sikerôn, lòt gan rò gah mơnơm Baalah mơ tus hơ Japneel. Nhàr gơ lồi di dàlềng.

I Samuel 17:4

Dô nă cau jak tòmlơh sơnđan la Gôliat cau Gat, lik bơh di sàl cau Philistin; khai jơnhoa rlau mơ sin tal.

I Samuel 17:52

Gen cau Israel mơ cau Juda brồ tus hơđap mơ ting jat cau Philistin jơl tus di gùng mut tòm ƀòn Gat mơ tus di ală mpồng ƀòn Ekrôn. Ală cau Philistin gơkòl jê sồt gơpừ rò gùng bơh Saaraim tus hơ Gat mơ Ekrôn.

I Samuel 29:6

Behơ̆ Akis hòi Dabit mơ đơs mơ khai lah: “Di ngan kung be Yàng Jehôwa kis, mê la dô nă cau rgơi dòn kơnòm, mơ añ niam nùs gơs mê duh broă bal mơ añ tòm mpồl ling. Bơh di ngai mê tus mơ añ jơl tus di ngai do, añ ò bàn dô bơta tìs lơi tòm mê, bulah behơ̆ ală kwang at bồ ò dòp rò mê.

I Samuel 5:11

Behơ̆ bol khai hòi pơjum jơh kwang at bồ làng bol Philistin dê mơ đơs lah: “Cèng tĕ Đài Yàng Tom Trồ Israel dê lik ngài bơh di bol hi, mơ ơn tĕ gơrê wơl hơ tiah tòm gơ dê, nàng gơ rơp ò tơnchơt bol hi mơ làng bol bol hi dê!” Bơh bơta chơt neh cèng bơta rngòt rngơt làm jơh tòm ƀòn dờng hơ̆; tê Yàng Tom Trồ dê klơn kơnjơ̆ ngan hơđang tềng hơ̆.

I Samuel 5:7

Tòm tŭ làng bol ơm tòm Asdot gŏ bơta neh gơlik gơs gen bol khai đơs lah: “Đài Yàng Tom Trồ Israel dê ò di ơm mơ bol he; bơh tê Kơnràñ klơn kơnjơ̆ hơđang bol he mơ hơđang Dagôn la yàng bol he dê.”

I Samuel 6:2

Gen làng bol Philistin hòi pơjum ală cau kơiang mơ ală cau bơjơu gru mơ đơs lah: “Ñchi bơta bol he pal lơh mơ Đài Yàng Jehôwa dê taih? Yal tĕ bol hi in git ñchi bol hi pal lơh nàng pơyoa wơl gơ hơ tiah gơ dê.”