उदुःतो कताकून 13:16 - Korwa Bible

¹⁶ हाँय जमा होड़कूराः खउना तिःईरे सहे समांगरे मेमेडटोंग चिनहा लगावगे लगाय रेनहातेडकुःआ। मरंग होड़कू अरू हुडिंग होड़कू, गिरहत होड़कू अरू गरीब होड़कू, सेवकियाकू अरू मालिकूतुकू, हँकू जमाकू हना चिनहा गोःगो पराःता।

उदुःतो कताकून 13:16 Σταυροειδείς Αναφορές

मूक चेलाकू 26:22

मनदो भगवान नुँहू वरी ईंगे बनसावकिडिंगा, अरू मरंग मरंग होड़कू अरू लचार होड़कू एचेरे हों हिदइतिंग उदुःगेतना। भगवानराः बड़रा कता होड़कू अरू मोसेस होंकू कता उदुःतेरा हना अड़ाःकेडखन कहिसाः मेरिंग कतायतना।

1 कुरिंती 12:13

अबू अते तोनोंग तोनोंग होड़कू एहूदाकू हवे अरू तोनोंग तोनोंग होड़कू बेगर एहूदाकू हवे। अबू अते तोनोंग तोनोंग होड़कू बेगारी होड़कू इदानकुःआ अरू तोनोंग तोनोंग होड़कू बेगारी होड़कू कोवाकुःआ। मनदो भगवान सुद बिरुवाते अबू जमाकू बतिसमाय एमेवाडबुःआ अरू मसीराः देहराः एटाः एटाः दगलीकूने बड़ाँवकेडबुःआ। नुँहू भगवान अबू जमाकू जीवरे हनानाः बिरुवाय एमेकेरा।

गलातिया 3:28

अपे एहूदा होड़ सहे बेगर एहूदा होड़पे दोहोन, बेगारी होड़ सहे मालिकपे दोहोन, मरद सहे अइमीपे दोहोन, अपे ईसू मसी एचेरेपे बिसवासकेरा अते अपे जमाकू बरोबइर इदानपेःआ।

गलातिया 6:17

ईंग ईसूरीग मूक चेला हवे अरू हनाराः चिनहा इया ईंग इनिंग देहरे कटसियाराः जोरोडिंग गोः चुवेरगेता। हनालगा अपे तोनोंगीग नुँहू वरीते ईंग अहापे हलकइनगींग।

इपीसी 6:8

अपे नाःआ कता उहियारबाःकापे, सेवकियाकू सहे मालिककू दोहोन, नपाय बुताकू बुताता हँकुःआ जमा होड़कू लगा अँनकूराः बुता इया, परबू इमाने एमेवाकूता।

कुलूसी 3:11

नाःआ नँवा जीवरे तोनोंग इयाःआ हिगार हटिंग कोवानेःआ। खतनाकू एचेयता हँकुःआ एहूदाकू, सहे मेरकू खतनानता हँकुःआ बेगर एहूदाकू सहे जोडेकू सहे अलीगवारकू, सेवकियाकू सहे मालिककू, अबू तोनोंगीग एटाः कोवाबुःआ। मनदो मसी एकला मनारंग इदानिया अरू हनाँय अबू जमाकूराः जीवरे इदानिया।

2 तिमुतियूस 3:8

एनेस अरू अंबरेस, मोसेसकिन घंटावतेरा हनन इया ओंगोल बेलूरयना अरू भगवान मेडरे बिसवास सदायना हँकुःआ लबरा चेडदार होड़कू हों सताय चेडकू घंटावता।

उदुःतो कताकून 11:18

जमा जइत होड़कू रीसयना अरू आम रीस भीकयानमे। दो गोएगतो होड़कू फड़ियाव लगा नुँहू बेला सोदोरयना, आमरिकुःआ सेवकियाकू अरू आमराः बड़रा कता होड़कू, अरू आमरिकुःआ सुद होड़कू, अरू आम सुदा अकूसकू मनाःता हँकुःआ मरंग अरू हुडिंग होड़कू, हँकू इमानमे एमेवा लगा हों बेला सोदोरयना, अरू चउंदीसकू लायतना, हँकुःआ होड़कूम लाय एंडाकूता।”

उदुःतो कताकून 15:2

हनते सेंगेल मेसातो काँचराः समुंदर इया तोनोंगाः ईंग ञेलतेरा। अरू हना समुंदर धरीरे मुरुक होड़कू चड़ाँयान। हँकू जानर एचेरेकू जितावनेना। हँकू हाँयग जानर अरू हाँयराः मुरती मेरकू जागगाड, अरू हँकू हाँयग जानरराः नमार हों मेरकू गोःगाड। अरू भगवान एमेवातेडकुःआ हना तंबुरराकूनकू साबकातेरा,

उदुःतो कताकून 19:18

अपे राजाकूराः मास, अरू मरंग सइना होड़कूराः मास, अरू जंगरदार होड़कूराः मास, अरू घोड़ाकूराः मास, अरू घोड़ा सलावदारकूराः मास, अरू सेवकियाकूराः मास, अरू मालिकूताकूराः मास, अरू हुडिंग होड़कू अरू मरंग होड़कू, जमा होड़कूराः मास जोजोम लगापे वेग जुमाः।”

उदुःतो कताकून 19:20

मनदो हँकू हाँयग जानर अरू हाँय सुदा भगवानराः बड़रा लबराते कतायीग होड़ होंकू साबतेरा। भगवानराः बड़रा लबराते कतायीग होड़ जानर मड़ंगरे बयाव जुवाः इयाःआ चिनहाकूने एचेया। मड़ंगरे हाँय हना बयाव जुवाः इयाःआ चिनहाकूनते, हाँयग जानरराः चिनहाकू गोःतेरा अरू हाँयग जानरराः मुरतीकू सेवाःआ हँकुःआ होड़कूय अडिगतेडकुःआ। हँकिनकू साबतेरा हना तयोमरे, हँकिन बनर जिनियत जीयत सेंगेलराः हुडिंग समुंदररेकू रेमगे बोलोगोतेडकिन। हना सेंगेलराः हुडिंग समुंदररे लेटे दिरि हितकाःआ।

उदुःतो कताकून 19:5

हनते गदी अते मीटोंग अरोयिंग अयूमतेरा, “ने जमा सेवकियाकू, अबूरीग भगवानपे जाग। ने हुडिंग होड़कू अरू मरंग होड़कू, अपे जमाकू हाँयराः अकूसपे मनाः।”

उदुःतो कताकून 20:12

जमा गोएगतो होड़कू हना गदी मड़ंगरे चड़ाँतिंग ञेलतेडकुःआ। हुडिंगीग अरू मरंगीग, जमाकू हंडाकू दोहोना। बराहीलकू मुरुक बगरा कागदकूनकू पितोरतेरा। हनते जीवराः कागद होंकू पितोरतेरा। हना कागदकूनरे गोएगतो होड़कूराः बुताकून ओजाःतो दोहोना। अरू हनानाः बुता इया भगवान हँकूय फड़ियावतेरा।

उदुःतो कताकून 20:4

हनते ईंग गदीकूनिंग ञेलतेरा। अदोम होड़कू हना गदीकूनरेकू दुड़ुःकिया अरू हँकू फड़ियावगे लगा हातपातकू पवावकिया। ईसूराः सताय कता अरू भगवानराः सरवन उदुः अते पुजा ञेड एंडाकुःआ हँकुःआ होड़कूराः बिरुवा ईंग ञेलतेरा। हँकुःआ होड़कू जानर अरू हाँयराः मुरती मेरकू सेवागाड, अरू हाँयग जानरराः चिनहा अँकूराः समांगरे सहे तिःईरे मेरकू गोःगाड। हँकू जियाव रेमनेनखन मसी सुदा हजार बरिस वरीकू राइजगोड ञवना।

उदुःतो कताकून 6:15

हनते चउंदीसरिकुःआ राजाकू, अरू हातपातदारकू, अरू मरंग सइना होड़कू, अरू गिरहत होड़कू अरू जंगरदारकू अरू सेवकियाकू अरू मलिकूतुकू, हँकू जमाकू लात पेंदारे अरू पहाड़राः चटइन तलारे सेनेडखनकू ओकोयान।

उदुःतो कताकून 7:3

“अबूरीग भगवानरिकुःआ सेवकियाकूराः समांगरे मोहर अरीनबू लगावगे वरी, ओत अरू समुंदर अरू सींगकून अहापे लायगे।”