पिलिपी 3:20 - Korwa Bible

²⁰ मनदो अबूराः राइज सेरमो देस हवे अरू सेरमो देस अतेय कुदा वेगता अबूरीग सडावदार परबू ईसू मसी लगाबू टकागोड ञवनतना।

पिलिपी 3:20 Σταυροειδείς Αναφορές

मती ओजाःतेरा भगवानराः नपाय सरवन 19:21

दो ईसू कता कुदातेरा, “आम नाय नपाय बड़ाँः लगाम चहाःतना दो, सेनेकियानखन आमराः जमा जइतकून अकिरिंगकेडखन गरीब होड़कूम हटिंगगोडवा। अरू हना तयोमरे आम ईंग अगीम ओतोंग वेग। दो आम सेरमो देसरे मुरुक नपाय नपाय इमानमे पवाःता।”

लूका 12:21

अनँयग लगा आन-धाने जुमावता हाँयग होड़ ननाँयग गिरहत होड़ इयाय दोहोनता। अरू ननन इयायीग होड़ भगवानराः मेडरे गिरहत मेरेय दोहोनता।”

लूका 14:14

हँकुःआ होड़कू आम ओरोकू राः बदला अवेतेडमेःआ। हनालगा नाःआ इयाम एचेय दो भगवान आमे भलावाता। बेगर गारबार होड़कू जियाव रिमुःता हना दिन भगवान अते नपाय इमानमे पवाःता।”

मूक चेलाकू 1:11

अरू हँकिन कतातेड, “ने गलीलरिकुःआ होड़कू, अपे नंडा चड़ाँकियानखन चिला लगापे संगीलगेतना? अपे अते सेरमो देस अगी भगवान गोःयडिया हनाँयग ईसू करा इया तोराया हनन इयाय कुदा वेगता।”

1 कुरिंती 1:7

दो अपे अबूरीग परबू ईसू मसीराः कुदा वेग लगापे टकागोड ञवन मेला, सुद बिरुवाराः दहिन बदीरे अपे जीवरे तोनोंगाः हुडिंग बगरा ओरो होयानेना।

1 कुरिंती 15:48

भगवान मड़ंगीग मनुवा हासतेय तुलातिरिया अरू हनन इया चउंदीसरिकुःआ एटाः होड़कू हों हनासरिकुःआ हवे। अरू हनन इया सेरमो देसरिकुःआ होड़कू भगवान अगीतेय वेगनेना हनाँयग इया इदानकुःआ।

2 कुरिंती 4:18

दो ञिलुःता हना चउंदीसराः जिनिसकून तोनोंग बेला वरी दोहोनता, मनदो मेर ञिलुःतना हना सेरमो देसराः जिनिसकून सगर सइट लगा इदा। हनालगा अबू ञिलुःता हना जिनिसरे अबू जीव टक-टकित कोवानेःआ, मनदो मेर ञिलुःतना हनारे अबू जीव टक-टकित इदा।

2 कुरिंती 5:8

अले डीड़गार इदानलेःआ अरू नाःआ देह अटू एंडाकेडखन परबू सुदा बसाः लगाले तरसाःतना।

गलातिया 4:26

मनदो सेरमो देसराः एरुसलेमते अउल-तउलतो इदानिया हाँयग साराह अजइत इदानिया अरू हाँय अबूरीग एंगाबू हवे।

इपीसी 2:19

ननानाः अते नुँहू अपे दुरीन देसरिकुःआ होड़कू इया कोवापेःआ। मनदो अपे भगवानरिकुःआ सुद होड़कू सुदा मिनी देसरिकुःआ होड़कू हवे अरू अपे भगवानराः ओड़ाःरिकुःआ होड़कूपे बड़ाँवयना।

इपीसी 2:6

अबू ईसू मसी सुदाय जियाव रेमकेडबुःआ अरू सेरमो देसरे हाँय सुदाय एचे दुड़ुःकेडबुःआ,

पिलिपी 1:10

जेमहा अपे ननपायते नपाय कता जमालेःआपे सुदी अवेय, अरू ईसू मसी कुदा वेग वरी सुद अरू बेगर गारबारतेःआ नपाय लूर-नेवन अपे जीवरे होया जुवाः।

पिलिपी 1:27

तोनोंग इया होयाः, अपेराः लूर-नेवन ईसू मसीराः कतत नपाय सरवन इया होनोयाः लगा इदा। दो ईंग अपे एचेरेयिंग सेन सहे मेरिंग सेन, अपे बदीरेयिंग अयुमे, हँकू बिसवासरे बड़ियाड़ इदानकुःआ। ईंग नाःआ होयिंग अयुमे, हँकू मिनी जीवकियानखन मिनी ओंगोलते, ईसू मसीराः नपाय सरवन एटाः होड़कू बिसवासगे लगा, मुरुककू मिहनइतगेतना, माःआन।

कुलूसी 1:5

दो भगवान अपे लगा सेरमो रइजरेय दोहोकेरा, हना नपाय जीव जहन लगापे असरागोड ञवनतना। नाःआ असरा बदीरे भगवानराः सताय नपाय सरवनतेपे अयूमकेरा।

1 तिसलूनिका 1:10

अरू गोएगतो अते भगवान जियाव रेमकिडिया आँयगरीग बेटात भगवानराः दरवाःआ हना डंडियाव अतेय सडावबूता हनाँयग ईसू सेरमो देस अतेय कुदा वेगता, हाँयकू टकागोड ञवनतना, माःआन।

1 तिसलूनिका 4:16

हनमेला नाःआ इया होयाःता। परबू ईसू अनँयग आँयग सेरमो देस अतेय उतराव वेगता अरू हुमइसकेय हुकुमगेता। दो भगवानरीग मरंगीग बराहीलराः अरो अयमुःता अरू मी होड़ भगवानरीग बराहील सोहनाईए ओंगता। हनते गोएगयनाकू हँकुःआ बिसवासी होड़कू मड़ंगकू जियाव रिमुःता।

2 तिमुतियूस 4:8

दो नुँहू वरीते बेगर गारबारराः इमान सनातायते होड़कूय फड़ियावकूता हाँयग परबू ईसू, हनानाः दिन ईंग लगाय एमेयता। अरू हान ईंग एकला लगा कोवान, मनदो हाँय कुदा वेगता हना बदीरे टक टक इदानकुःआ हँकुःआ जमा होड़कू लगा होंय एमेयता।

तितूस 2:13

अरू अबूरीग मरंग भगवान अरू सडावदार ईसू मसी मान मरजइत सुदा चउंदीसरेय कुदा वेगता हना दिन लगा बहालते असरा घड़ीनबू टकागोड ञवनतना।

इबरानी 12:22

मनदो अपे नुँहू सीयोन पहाड़रे अरू जीयत भगवानराः सहर, सेरमो देसराः एरुसलेमरेपे सोदोरकिया।

इबरानी 9:28

हनन इया मसी हों मुरुक बगरा होड़कूराः कसूर बराव एंडागे लगा मिनी तुरहाय बलिदाननेना। दो मसी अरू मी तुरहाय वेगता। हाँय होड़कूराः कसूर, अरू चलाः एएंडा लगा ओरोय वेजेडा। मनदो हाँयकू टका ञवनता हँकुःआ होड़कू सडावकू लगाय वेगता।

उदुःतो कताकून 1:7

ञेलेयपे, हाँय बदरीरेय कुदा वेगता, अरू जमा होड़कू हाँय अगीकू ञेलता, हाँयकू सोबोःतेरा हँकुःआ होड़कू हों हाँयकू ञेलता, अरू चउंदीसरिकुःआ जमा होड़कू हाँय बदीरेकू फिकिराःता। अरू हनन इया होनोया जुवाःता। आमीन!