1 पतरस 2:5 - Korwa Bible

⁵ दो जीयत दिरिकून इया सुद बिरुवा अपे भगवानराः सताय ओड़ाःरे एटाः होड़कू सुदा जोड़ावकेडपेखन सुद पुजउरीकू तुलापेतना, जेमहा भगवान ननायगुःता हना सुद बलिदानकून, अपे ईसू मसीतेपे देग अवेयता।

1 पतरस 2:5 Σταυροειδείς Αναφορές

रूमी 12:1

हनालगा ईंगरिकुःआ अजी बोपोहकूतिंग, भगवान अबूय मयावारा हना कता उहियारकेडपेखन अपे एचेरे गोड़न पइयन घड़ीनिंग असेयतना। अपे अँननपेराः देह भगवान ननायगुःता हना सुद अरू जीयत बलिदान इया जमालेःआपे जिमागोड। नाःआ भगवान सेवाराः सताय लूर हवे।

रूमी 15:16

बेगर एहूदाकू लगा ईसू मसीरीग मूक चेलाय बड़ाँवकिडिंगा अरू ईंग मी होड़ पुजउरी होड़ इया भगवानराः नपाय सरवनिंग परसार उदुःगेतना, जेमहा हँकू भगवान ननायगुः लगा सुद बिरुवाते सुदकेडकूखन बलिदान इयायिंग जिमा अवेकू।

1 कुरिंती 3:16

अपे मेरपे सुसुदीतना जा, अपे भगवानराः ओड़ाः हवे अरू हाँयराः बिरुवा अपे जीवरे दोहोनता?

1 कुरिंती 3:9

दो मनइद कता ननानाः हवे, अलिंग भगवानरिकिनाः सेवा देंगवा होड़किन हवे, अरू अपे भगवानराः दोहोड़ इया इदानपेःआ। अरू अपे भगवानराः ओड़ाः इया हों इदानपेःआ।

1 कुरिंती 6:19

अपे मेरपे सुसुदीतना जा, अपेराः देह सुद बिरुवाराः डेरा हवे। अरू हाँयग बिरुवा भगवान अगीतेःआ दहिन हवे अरू हाँय अपे जीवरेय दोहोनता। दो अपे अँननपेरिकुःआ ना लवे।

2 कुरिंती 6:16

भगवानराः ओड़ाः अरू मुरतीकून तोनोंग इया मेसानता जा? भगवान कताकेरा, “ईंग हँकूराः इंदरीरेयिंग बसाःता, अरू हँकू एचेरेयिंग सेन दूरता, ईंग हँकूरीग भगवानिंग होयाःता, अरू हँकू ईंगरिकुःआ होड़कूकू दोहोनता।” हनन इया अबू जीयत भगवानराः ओड़ाः हवे।

गलातिया 6:10

हनालगा अबू जमाकू सुदा होया अवेन हनामिन, बिसेक बिसवासी होड़कू संघरागोड ञवन लगा इदा।

पिलिपी 1:11

नाःआ इयाःआ नपाय लूर-नेवन ईसू मसीते अपेराः जीवरे होयाःता, अरू हनाते होड़कू भगवानकू जाग अरूकू मान मरजइतगेय।

पिलिपी 2:17

भगवान एचेरे अपेराः बिसवास अरू सेवा भगवान लगा दाः बलिदानकू दूलता हना इया इदा। अरू हना बलिदान पुरावगे लगा ईंगके गुजुः हों पराः, हनारे हों ईंग अपे सुदायिंग बनाहाल जुवाःता।

पिलिपी 4:18

अपे इपापुरूदितूसते ईंग लगापे वारतेरा हना संघरा, ईंग पवावकियानखनिंग संतोकयना। नुँहू ईंग एचेरे तोनोंग इयाःआ हुडिंग बगरा कोवानेःआ अरू जनामालेःआ इनिदा। अपेराः संघरा भगवान लगा नपाय महक एमेयता हना बलिदान इया इदा अरू हनाते हाँय ननाययना।

कुलूसी 3:17

अपे तोनोंगाः बुतापे बुता सहे तोनोंगाः कतापे बड़रा हना जमाकून ईसू मसी लगापे एचेय, अरू हाँयते अपांग भगवानपे जागगोड ञवन।

1 तिमुतियूस 3:15

जेमहा ईंग सेनरे कुबेर जुवाः दो आम सुदी अवेयता, बिसवासी होड़कू करा इया भगवानराः ओड़ाःरे नपाय लूर नेवनते जियाः लगा इदा, हना। भगवानराः ओड़ाः सताय सरवनराः खुंटा अरू पया इया दोहोनता हना जिनियत भगवानराः कलसिया हवे।

इबरानी 3:6

मनदो बेटात इया भगवानराः जमा ओड़ाःरे ईसू मसी बिसवासगेयीगे दोहोना। अरू अबू डीड़ घड़ीन टुटीग वरीबू असरागोड ञवन दो अबू हाँयराः ओड़ाःरिकुःआबू बड़ाँःता।

1 पतरस 2:9

मनदो अपे सुनावतो होड़कू, राजारिकुःआ पुजउरीकू, मीटोंग सुद जइत अरू भगवानरिकुःआ निकता होड़कू हवे, जेमहा अपे अंदरा अते राःकेडपेखन अनँयगराः मुरुक नपाय मरसलरेय अगुकेडपेःआ हाँयग भगवानराः, मुरुक नपाय बुताकून एटाः होड़कू एचेरेपे कता उदुः अवे।

1 पतरस 4:11

परसारताकुःआ होड़कू भनगवानराः सरवन पपरसार लगा इदा। एटाः होड़कूकू सेवाता हँकुःआ होड़कू, भगवानराः जंगरते सेवाकू लगा इदा, जेमहा नाःआ जमाकून अते ईसू मसीते भगवानराः मान मरजइत होयाः। हनाँय मान मरजइतगे इयायीग अरू सगर सइट वरी अगम जंगरदार इदानिया। आमीन!

1 पतरस 4:17

भगवानरिकुःआ होड़कू भगवान फड़ियावकूराः बेला सोदोरकिया। अरू फड़ियावगे लगा अँननबू अतेय बुँहड़ीगेता दो, भगवानराः नपाय सरवन मेरकू बिसवासगेता हँकुःआ होड़कूराः जीव करा इया होयाःता?

उदुःतो कताकून 1:6

अरू हाँयरीग अपांग भगवानबू सेवागेय लगा राजाकू अरू पुजउरीकू इयाय बड़ाँवकेडबुःआ। दो होड़कू हाँय सगर सइटकू मान मरजइतगेय अरूकू जागगेय। आमीन!

उदुःतो कताकून 20:6

मड़ंगरेकू जियाव रेमनेना हँकुःआ होड़कूराः जीव भगवान भल-भलायवातेडा अरू हँकू सुद इदानकुःआ। बार नमार गुजुःके हँकू जीवरे तोनोंगाः हातपात कोवानेःआ। हँकू भगवान अरू मसी लगा पुजउरीकू दोहोनता अरू मसी सुदा हजार बरिस वरीकू राइजगोड ञवनता।

उदुःतो कताकून 3:12

जितावबाः जुवाः हाँयग होड़ ईंग भगवानराः ओड़ाःराः मीटोंग खुंटायिंग बड़ाँवगेयता, अरू हाँय हना ओड़ाः अड़ाःकेडखन कहियो ओरोय सेनेडा। ईंग ईंगरीग भगवानराः ञाव हाँय इंदरीरेयिंग ओजाःगेता। अरू हाँय इंदरीरे भगवानराः सहरराः ञाव होयिंग ओजाःगेता। हना सहरराः ञाव, नँवा एरुसलेम हवे अरू हन ईंगरीग भगवान अगीते सेरमो देस अते उतराव वेगता। अरू ईंगराः नँवा ञाव हाँय चोटरेयिंग ओजाःगेता।

उदुःतो कताकून 5:10

आम हँकू राजाकू अरू पुजउरीकूम बड़ाँवकेडकुःआ, जेमहा हँकू अबूरीग भगवानकू सेवा, अरू जमा चउंदीसरेकू राइजगे।”