1 कुरिंती 5:11 - Korwa Bible

¹¹ मनदो ईंग अपे एचेरेयिंग कतायतना, बिसवासी होड़कू अते तोनोंगीग होड़ सनहा-सनही, सहे लुभिया होड़, सहे ककाड़ी होड़, सहे दारू बोः होड़, सहे अडिग होड़ इदानीग दो, हाँय सुदा अलोपे मेसान अरू अलोपे जोम-ञूया।

1 कुरिंती 5:11 Σταυροειδείς Αναφορές

मती ओजाःतेरा भगवानराः नपाय सरवन 18:17

हाँय हँकिनराः कता हों मेरेय मनाः दो, कलसियारिकुःआ बिसवासी होड़कूम कतावा। अरू हँकुःआ होड़कूराः कता हों मेरेय मनाः दो, भगवानराः कता मेरकू मनाःता हँकुःआ बेगर एहूदाकू अरू मलगुजारी गोः होड़कू इया हाँय ओंगोलकिडिग हाँय सुदा अलोपे मेसान।

मती ओजाःतेरा भगवानराः नपाय सरवन 23:25

ने पचघुचिया नियम चेडदार होड़कू अरू फरीसी होड़कू, अपे दोपे ठीकयना। अपे डुभा अरू छिपी सेरमो सेरमो एकलापे मंजवेता मनदो अपेराः इंदरीरे मुरुक ललची अरू बेलूर ओंगोल इदा।

लूका 18:11

दो फरीसी होड़ चड़ाँवाडखन नाःआ इयाय अरजीःआ, ने भगवान, ईंग एटाः होड़कू इया इनिग होड़, सहे कसूर होड़, सहे सनहा होड़ कोवायिंगा। ईंग नाँयग मलगुजारी गोः होड़ इया हों कोवायिंगा। हनालगा आम ईंग धनियाबादिंग ओवामता।

लूका 21:34

“जोम ञूयते अरू बुनूलते अरू चउंदीसराः एटाः एटाः ओंगोल कुहकाःते अपेराः जीव अलो बेरुजगुः लगा सवासितीपे दोहोन। निही दो हना टुटीगगुःराः दिन अपे जीवरे फंदा इया असाका वेगता।

मूक चेलाकू 1:15

दो मी दिनरे अंदांज मी सव बीस बिसवासी होड़कू मिनीरेकू जुमावनेना। अरू हँकू तलारे पतरस चड़ाँनेन

मूक चेलाकू 9:17

हनते हनानियाह हना ओड़ाः अगी सेनेडखन हंडाय बोलोनेन। हाँय साहूलराः बोःरे तिःई खेपातेडखने कताया, “ने बोहोयिंग साहूल, आम नंडा वेग मेला आम एचेरे दूररेय एचे ञिलुःआ, हाँयग परबू ईसू आम मेड नपायगुः लगा अरू सुद बिरुवातेम पेरेगगुः लगा आम एचेरेय वारकिरिंगा।”

रूमी 13:13

अपे कसूर लूर-नेवन इया कोसोड़ा-दारू झड़ीकेडखन हउड़ी होड़कू अलोपे होयाः, सनहा-सनही अरू बेलूर बुताकून अहापे एचेय, कड़ीग अरू इरा होड़कू इया अहापे जियाः। मनदो अपेराः जीव भगवान मरसलगोतेडकुःआ हँकुःआ होड़कू इया नपाय लूर-नेवनतेपे जियाव ञवन।

रूमी 16:17

दो ईंगरिकुःआ अजी बोपोहकूतिंग, अपे एचेरे गोड़न-पइयनकियानखन अरू मीटोंग कतायिंग असेयतना, होड़कू अपे चेडकिया हना चेडतो अते एटाः इया चेडकेडखन होड़कूकू हिगार हटिंगगोडकूता अरू होड़कू बिसवासतेकू एचे चलाःगोडकूता। दो हँकुःआ होड़कू सुदा सवासितीपे दोहोन अरू हँकू अते तोरेपे दोहोन।

1 कुरिंती 10:14

हनालगा ने ईंगरिकुःआ अजी बोपोहकूतिंग, अपे देबी देवताकूराः सेवा अते तोनोरेपे दोहोन।

1 कुरिंती 11:21

अपे परबू भोज जोम मेला, अदोम होड़कू मेरपे तंगीकूता अरू मनाड़ंग सेनेकियानखनपे जोम-ञू बी ञेड जुवाःता। हनालगा अदोम होड़कू रंगेगतोकू दोहो जुवाःता।

1 कुरिंती 5:13

भनगवान हमा बेगर बिसवासी होड़कूय फड़ियावता। हनालगा भगवानराः कागदरे ओजाःतो इदा हन इया, “हाँयग बेनेलूर बुता होड़ अपे तलातेपे उडुंग एंडागोडेय।”

1 कुरिंती 6:10

अरू इनिग होड़कू अरू लुभिया होड़कू, दारू बोः होड़कू, अरू ककाड़ी होड़कू, अरू अडिग जोम होड़कू, नाःआ नाःआ इयाकुःआ होड़कू भगवानराः राइजरे इताडदारकू कहियो ओरोकू बड़ाँवनेना।

1 कुरिंती 6:6

मनदो अपे बिसवासी होड़कू एटाः बिसवासी होड़कू सुदापे तररा-तररीता, अरू हान हों बेगर बिसवासी होड़कू मड़ंगरे।

1 कुरिंती 6:9

अपे मेरपे सुसुदीतना जा गारबार होड़कू भगवानराः राइजरे इताडदारकू ओरोकू बड़ाँवनेना? तोनोंगीग अपे अहाकू अडिग अवेपे। एटाःकू सुदा बेलूर बुताकून बुता होड़कू, अरू मुरती सेवा होड़कू, अरू बियाहगुः तयोमते सनहा-सनही एचे होड़कू, अरू बंदरा होड़कू, अरू मनारद मरदकू सुदा घोड़ा होड़ेंग होड़कू,

1 कुरिंती 7:12

ईंग कतायतना हनापे अयूम। नाःआ कता परबू मेरेय कतायतना मनदो ईंग इनिंग अगीते एटाः होड़कूयिंग कतावातना, तोनोंगीग बिसवासी होड़रीग अइमी ईसू एचेरे मेरेय बिसवासगेतान अरू हाँय अनँयगरीग हेरेलतो सुदा दोहोन लगा राजूरे इदानिया, दो हाँय हाँयग अइमी अलोय बइ एंडागेय।

1 कुरिंती 7:15

भगवान अबू हेल-मेलरे दोहोन लगाय राःकेडबुःआ। हनालगा तोनोंगीग अइमी सहे मरद परबू एचेरे मेरेय बिसवासगेतान अते बियाह हटकावकियाय हना अड़ाः एंडागे लगाय चाहाःतान दो, हनन इया होनोया ओवापे। हनते हाँयग अइमी सहे मरद बियाहनेनाकिन हना अटकाररे मेरकिन दोहोनता।

1 कुरिंती 8:11

अयुमेपे! ईसू मसी नँकुःआ अबड़ जीव होड़कू लगा होंय गोएगनेना। अरू आमराः कनहूनते हँकूम आडगोडता।

गलातिया 2:12

हाँयराः गारबार नाःआ दोहोना; एकूबरिकुःआ होड़कू हंडा अरीनकू वेग वरी बेगर एहूदा बिसवासी होड़कू सुदाय जोम-ञूया। मनदो हँकू वेजेड दो हाँय हँकू बोतोरते बेगर एहूदाकू सुदा जोम-ञूय लगाय अड़ाःगोतेड।

इपीसी 5:18

कोसोड़ा-दारूरे अहापे झड़ीगे। नाःआते हउड़ी होड़कूपे बड़ाँव जुवाःता। मनदो भगवानराः सुद बिरुवाते पेनेरेगगोड ञवनपे।

इपीसी 5:5

सनहा-सनही, बेलूर बुता सहे ललची ओंगोल, मुरती सेवा हवे। अरू नाःआ इयाकू एचेयता, हँकुःआ होड़कू लगा ईसू मसी अरू भगवानराः राइजरे तोनोंगाः इताड कोवानेःआ।

कुलूसी 3:5

चउंदीसराः बेनेलूराः नेवन इया अलोपे सलाः। बेलूर बुता, सनहा-सनही, अरू बेनेलूर ओंगोल, नाःआ जमाकून अपेराः जीव अते हिर-हिटीपे अनाड़ाः एंडागोड। लुभिया ओंगोल मुरती सेवा इया इदा। हनालगा अपे लुभिया होड़कू अहापे होयाः।

2 तिसलूनिका 3:14

तोनोंगीग होड़कू अलेराः नाःआ चिठीराः कता मेनेरेकू मनाःतान दो, हँकुःआ होड़कू ञेल हड़ाकूपे, अरू हँकू एचेरे सेन दूर लगापे अड़ाःगोड, जेमहाकू गियुः जुवाः।

2 तिसलूनिका 3:6

ने अजी बोपोहकूतिंग, परबू ईसू मसी अले एचेरेय एमेकेरा हना हातपातते नाःआ हुकुमले एमेवापेतना। अले चेडतेडपेःआ हना कता तोनोंगीग होड़ मेरेय मनाःता अरूय कुड़हीतान दो, हाँयग होड़ अते तोरेपे दोहोन।

1 तिमुतियूस 3:3

हाँय बुनूलतो होड़ सहे कड़ीग होड़ अलोय दोहोन। हाँय सलसतिया अरू सुधा होड़ दोहोन लगा इदा, अरू ढिबुवाराः ललचीरे अलोय दोहोन।

1 तिमुतियूस 6:5

नाःआ इया होड़कू अनभनिया कड़ीगकू रेमगोडता। अरू हँकूराः जीव आडतो इदा अरू हँकू मेरकू सुदीयता सताय चिला हवे। हँकू ओंगलेता, धरमराः दूररे मुरुक नफा इदा, माःआन।

2 एहुना 1:10

अरू तोनोंगीग होड़ एटाः इया लबरा सरवने चेड उदुःवाकूता दो, हाँय आम ओड़ाःरे अलोम नेत-नेवारगेय अरू अलोम सलामगेय।

उदुःतो कताकून 2:14

मनदो अपे बदीरे ईंगके तोनोंग तोनोंग बड़रा ककता लगा इदा; अपे अते अदोम होड़कू बिलामराः चेडतोकू मनाःता। हाँयग बिलाम, बालाक राजा एचेरेय कता उदुःवातेरा, इसराएल होड़कूम लहकावगोडकू, जेमहा हँकू मुरतीकून मड़ंगरे मंडावतो जिनिसकूनकू जोम अरू सनहा-सनहीकू एचेय, माःआन।

उदुःतो कताकून 2:20

हनते हों अपे बदीरे ईंगके मीटोंग बड़रा ककता लगा इदा; इजबील ञावीग अइमी मेरपे हिगार एंडायतना। हाँय ईंगरिकुःआ सेवकिया होड़कू अडिगकेडकूखने कतायता, ईंग भगवानराः बड़रा कतायीग अइमी हवे, माःआन। हाँयराः चेडतोते, मुरतीकून मड़ंगरे मंडावतो जिनिसकून जोम लगा अरू सनहा-सनहीपे एचेय लगा होड़कूय बहकावतना।

उदुःतो कताकून 21:8

मनदो पोंकाहा होड़कू, अरू बेगर बिसवासी होड़कू, अरू एरंग होड़कू, अरू ञेड एएंडा होड़कू, अरू सनहा-सनही होड़कू, अरू पपंगाड़ होड़कू अरू मुरती सेवा होड़कू अरू जमा लबरा होड़कू, हँकू जमाकू हना सेंगेल अरू हितकाःतो लेटे दिरिराः हुडिंग समुंदररेकू रेमगे बोलोगोडकूता। अरू ननानाः हवे बार नमार गुजुः।”

उदुःतो कताकून 22:15

कुतू इया होड़कू, अरू पपंगाड़ होड़कू, अरू सनहा-सनही होड़कू, अरू ञेड एएंडा होड़कू, अरू मुरती सेवा होड़कू, जमा बरानाः लबरा चहाः होड़कू अरू अडिग होड़कू, हँकू जमाकू हना सहरराः बहरीकू दोहोनता।