1 कुरिंती 4:10 - Korwa Bible

¹⁰ ईसू मसी लगा बोको इया इदानकुःआ माःआन होड़कू ओंगोललेता, मनदो अपे ईसू मसी लगा अँननपे कनहूनदारपे ओंगलुःतना। अलेराः जीव अबड़ अरू एरंगतो इदा, मनदो अपे जंगरदारकू अरू मान मरजइत पवावतो होड़कूपे ओंगलुःतना।

1 कुरिंती 4:10 Σταυροειδείς Αναφορές

मती ओजाःतेरा भगवानराः नपाय सरवन 24:9

हनते होड़कू अपे संतावपे लगा अरू ञेड एंडापे लगाकू जिमापेता। जमा जइतरिकुःआ होड़कू ईंगराः ञाव अते अपेकू हिनइस-बिनइसवापेता।

मती ओजाःतेरा भगवानराः नपाय सरवन 5:11

एटाः होड़कू, अपे ईंग बदीरे लंदा एरंगवापेताकू, संतावपेताकू अरू अपे बदीरे जमा बरानाः लबरा बड़राकू कतायता दो, अपेराः जीव-जहन भगवान भलावाडखने नपायगेयता।

लूका 10:16

हनते ईसू चेलाकू एचेरेय कताया, “अपेराः बड़राकू मनाःता हँकू ईंगराः बड़रा होंकू मनाःता अरू अपेराः बड़रा मेरकू मनाःता हँकू ईंगराः बड़रा मेरकू मनाःता। अरू ईंगकू आड-बेकारवाता हँकू ईंगे वारकेरा हाँयकू आड-बेकारवाता।”

लूका 18:9

तोनोंग तोनोंग होड़कू अँननकू एचेरे भरसाकेडखनकू ओंगलुःता, अले बेगर गारबार होड़कू हवे, माःआन अरू एटाः होड़कू हुडिंगकू ओंगोलकूता। हँकुःआ होड़कू एचेरे ईसू मीटोंग अउल-तउल कहड़ीय कतातेरा।

लूका 6:22

मनुवारीग बेटात बदीरे होड़कू अपेकू हिनइस-बिनइसवापेता, अरूकू उडुंग एंडागोडपेता, लंदा एरंगवापेताकू अरू बेलूरकू कतावापेता दो, अपेराः जीव-जहन भगवान भलावाडखने नपायगेता।

मूक चेलाकू 17:18

तोनोंग तोनोंग इपिकुरी अरू इसतोइकी गउदारिकुःआ कनहून चेडदार होड़कू पउलूस सुदाकू अड़ा-चउकीःआ। हँकू अते अदोम होड़कू होंबोरतेरा, “नाँयग बेलूर बउकाः होड़ चेले माःआन कताय लगाय चहाःतना?” एटाः होड़कू कतातेरा, “नाँय दो एटाः देसरिकुःआ होड़कूराः तोनोंग देवताराः बदीरेय कतायतना।” पउलूस, ईसूराः नपाय सरवन अरू गोएगतो होड़कूय जियाव रेमता हना कताय परसार उदुःतेरा, हनालगा हँकुःआ होड़कू नाःआ इयाकू कतातेरा।

मूक चेलाकू 17:32

हँकुःआ होड़कू गोएगतो होड़कू जियाव रिमुःता माःआनकू अयूमतेरा दो, अदोम होड़कू लंदावाःआ। मनदो अदोमकू कतातेरा, “नाःआ कता अले तोनोंग दिन आम अते अरूले अयुमेता।”

मूक चेलाकू 26:24

हनमेला पिसतूस पउलूसराः बड़रा सेरमो अलंगतेय तेलातेडखन मुरुक सटीतेय कतावाया, “ने पउलूस, आम बउड़ाहा इदानमेःआ। आम मुरुकमे चेडकियानते बउड़ाहायनाम।”

मूक चेलाकू 9:16

हाँय ईंग लगा तुमिन कटसिया सहावगे लगा इदा हना हाँय ईंग उदुःवायतिंग।”

1 कुरिंती 1:21

भगवान अगम कनहूनदार इदानिया। अरू हाँय ओंगोल दोहोकेरा, कनहूनदारकू अँनकूराः कनहूनते ईंग बदीरे ओरोकू सुदी अवेतेरा, माःआन। मनदो अले नपाय सरवनले परसारगे अते बिसवासगेताकू हँकुःआ होड़कू सडाव लगा भगवान ओंगोल दोहोकेरा। अरू नपाय सरवन मेरकू बिसवासगेता हँकुःआ होड़कू लगा अलेराः परसार बेगर लूर इया इदा।

1 कुरिंती 1:23

मनदो अले कुरूसरेकू ठोंकाव गोएगतिरिया हाँयग ईसू मसी बदीरेले परसारगेतना। नाःआ सरवन एहूदाकू लगा एरंगवा इया इदा अरू बेगर एहूदाकू लगा बेगर लूर इदा।

1 कुरिंती 1:25

भगवान बेगर कनहूनतेय दोहोन हों, होड़कूराः कनहूनते हाँयराः कनहून मुरुक बगरा इदा, अरू हाँय सतवासे दोहोन हों, होड़कूराः जंगरते हाँयराः जंगर अगम जबड़ इदा।

1 कुरिंती 10:12

हनालगा अपे, बिसवासरे बड़ियाड़ इदानलेःआ माःआनपे बड़वारता हँकू, बिसवासरे अनउरपे बड़ियाड़गुः। निही दो अपे हों हनानाः कसूररेपे पराव जुवाःता।

1 कुरिंती 2:14

सुद बिरुवा तोनोंगीग होड़ एचेरे मेरेय दोहोन दो, हाँय सुद बिरुवाराः कताकून मेरेय मनाःता अरूय एरांगवाता। सुद बिरुवा एकला भगवानराः कताकूने एचे सुदीकूता। हनालगा हँकुःआ होड़कू हना कताकून मेरकू बुझाव अवेनता।

1 कुरिंती 2:3

ईंग अपे सुदायिंग दोहोन मेला, सतवास अरू बोर घड़ीन मुरुकिंग कलपाःआ।

1 कुरिंती 3:18

अपे अँननपे अहापे अडिग जोम। अपे अते तोनोंगीग नाःआ चउंदीसराः ओंगोल इया कनहूनदारे ओंगलुःतान दो, हाँय मड़ंग अनँयग बेगर कनहूनदारे ओंगलुः, हनेःएना कनहूनदारे बड़ाँव अवेनता।

1 कुरिंती 3:2

अपे केटेग जिनिसकून इयाःआ चेडतो ओरोपे पसाव अवेकेःआ। हनालगा ईंग दूद इयाःआ रिता चेडतोयिंग चेडतेडपेःआ। अरू अपे नुँहू वरी केटेग जिनिसकून इयाःआ चेडतो पसाव जुकूर अरीनपेःआ।

1 कुरिंती 4:8

अरे हायरे दइया! अपे संतोकयनापे जा? अपे गिरहतयनापे जा? अले अड़ाःकेडखन राजाकूपे बड़ाँवयना जा? हाव, ईंग चाहाःतना, अपे जमाकू राजाकूपे बड़ाँव जुवाःकुःआ दो, अपे सुदा अले होंले राइजकेःआ।

2 कुरिंती 10:10

अपे अते अदोम होड़कू ईंग बदीरेकू कतायता, पउलूसराः चिठीराः कताकून कड़ाइ अरू निठास दोहनता। मनदो हाँय अबू एचेरेय वेगतान दो अबड़ावतो इदानिया अरू हाँयराः बड़राकून लुर-लूर दोहोनता, माःआन।

2 कुरिंती 11:19

अले मुरुक कनहूनदार इदानलेःआ, माःआनपे उंगलुःता। हनालगा अपे बुयांग होड़कूपे सहावगोडता।

2 कुरिंती 11:29

तोनोंगीग होड़ बिसवासरेय अबड़ाःतान दो, ईंगराः जीव मेर हुडिंगुःता जा? तोनोंगीग कसूररेय बझाःतान दो ईंगराः जीव मेर अदरुजीनता जा?

2 कुरिंती 13:9

अले अबड़ इदानले हों, अपे जबड़ जुवाः दो, अले बहाल जुवाःता। अरू अपे नाय नपायपे उडु-बुडू जुवाः लगाले अरजीता।

2 कुरिंती 4:12

दो अले ईसू मसी बदीरे परसारगेतान अते गुजुः सेंगसारेले पारता अरू हना सरवन बिसवासकेडखन अपे जिनीवपे पवाःता।

2 कुरिंती 6:8

तोनोंग बेला होड़कू अलेकू मान मरजइतलेःआ अरू तोनोंग बेलाकू बेग-हतावालेःआ, तोनोंग बेला अलेकू बदीलेःआ अरू तोनोंग बेला अलेकू भल भलवालेःआ। अले जमा बेला सतायले कताया हों अडिग होड़कू माःआनकू ओंगोललेःआ।

1 तिसलूनिका 4:8

हनालगा तोनोंगीग होड़ नाःआ कताय आड-बेकारवा दो, हाँय होड़कूराः कता मेरेय आड-बेकारवाता, मनदो अबू लगा आँयगराः सुद बिरुवाय एमेयता हनाँयग भगवाने आड-बेकारवाता।

1 पतरस 4:14

भगवानराः अगम मरंग बिरुवा अपे एचेरे इदा। हनालगा अपे ईसू मसी एचेरे बिसवासगेतान अते, होड़कू अपेकू एरंगवाता, दो अपेराः जीव भगवान नपायगोडता।