Matius 5:16 - Surat Ralan na'a Vaidida

¹⁶ Wean vali inyai naꞌa afa lolin ovi myotu ra musti lyawan verin tamata ra, boma rsiꞌik afa lolin avyai ma rfadawang Yamabira i naꞌa lanit ratan a.”

Matius 5:16 Σταυροειδείς Αναφορές

Matius 23:5

Ira rtulis vaivatul boku tali Surat Ralan a ma rkeak naꞌa ulurira te naꞌa limarira ra. Ira roru ravit blawat i ni wahan nsoli lanun a. Ira rotu munuk afa avyai naꞌa tamata rivun waharira ralan ra, boma tamata ra rsiꞌik ma rfadawang ira.

Matius 23:9

Mia deka fyadawang tamata ovi rnaꞌa lanit ivavan ini ma fyalak ne, ‘Bapa,’ tevek Yamadida ikisa watan naꞌa lanit ratan.

Matius 5:45

Tevek wean i mlyobang tamata ovi rira sian mia, na fyaturu roak ne, Ubu i nleal lanit ratan veka nala mia ma neluk yanan, tevek Ia notu ma lera vanan verin tamata ra munuk, velik ne sian te lolin ira. Ia nala daꞌut verin tamata ovi rira vavaꞌat ra rmalola, ovu verin tamata ovi rira vavaꞌat ra wol rmalola.

Matius 6:16

“Wean i mtyolat, na deka myotu ma felabira ra wean tamata ovi rfalak afa isa, naꞌuk rotu afa liak. Wean i tamata avyai rtolat, na rotu ma felarira sian ovu wol rmadua tenarira ra, boma tamata ra rsiꞌik, na rtolat. Afa i ufalak verin mia ini, kena urun! Ubu veka wol nala akataka verin ira.

Matius 6:9

Miflurut wean ini: Yamamami, Oa mdoku lanit ratan. Ami amalang Oa, tevek naram a nmerat urun.

Matius 9:8

Ti ma tamata rivun avyai rsiꞌik afa i Yesus notu yai, na rbobar ma raraning Ubu, tevek nala roak ngrebat i wean inyai verin tamata ra.

Lukas 11:2

Ba Yesus nfalak verin ira ne, “Wean i miflurut, na fyalak wean ini, Yamamami, amalang Oa, tevek naram a nmerat urun. Mwa ovu Mu Fareta a ma fwareta ami.

Yohanes 15:8

Wean i bira vavaꞌat ra wean aa sanan ovi vuarira rivun, na fyaturu ne, mia myeluk tamata ovi rorang Yaꞌa. Bira vavaꞌat i wean inyai notu ma tamata ra rfadawang Yamang a.”

Kisah 9:36

Naꞌa kota Yope, na vata isa naran Tabita norang vali Yesus. Naran naꞌa vai Yunani ne, Dorkas. Ia baꞌi notu aꞌuk afa lolin ovu nlobang tamata kasian ra.

1 Korintus 14:25

Afa fanfonak ovi rnaꞌa tamata avyai ralarira ra veka rvotuk munuk lahir, ba ira veka rsangatur ma raraning Ubu, ovu rtorung ne, “Kena urun, Ubu nanaꞌa lahir bira sidovung a.”

2 Korintus 9:13

Tali bira karya lolin i fyaturu yai, na tamata ovi rorang Yesus naꞌa Yudea veka rfadawang Ubu, tevek rsiꞌik ne, myot-orang Ubu Ni Ivar Lolin i nfamalik Kristus. Ira rfadawang Ia vali, tevek ralabira lolin ma msyiduk bira afaka watan verin ira, ovu verin tamata ra munuk.

Galatia 1:24

Ba raraning Ubu, tevek Ni afa ovi notu roak naꞌa ning vavaꞌat a.

Efesus 2:10

Fiang ini Ubu i notu roak ita, notu vali ma dida vavaꞌat ra ngorvaꞌan ewal roak, tevek dida vavaꞌat isa roak ovu Kristus Yesus. Ia notu wean inyai, boma totu afa lolin ovi nfadoku roak tali lalan a verin ita.

Efesus 5:8

Lan ana, mia byaꞌat naꞌa dedan ralan vali, naꞌuk fiang ini mnyaꞌa roak Ubu Ni lyawan ralan a, ba bira vavaꞌat ra musti nfaturu ne, byaꞌat naꞌa lyawan ralan.

1 Tesalonika 2:12

Amsurak mia ovu amfangrebat ralabira ra, ovu amera verin mia, boma bira vavaꞌat ra kena ovu Ubu ralan a. Tevek Ubu nera roak mia ma mnyaꞌa Ni fareta i nfitik nyadat.

1 Timotius 2:10

Naꞌuk ni lolin a, na vata ra rotu watan afa ovi lolin ra, boma tamata ra veka rfalak ne, vata avyai rira vavaꞌat ra rfaturu ne, rorang Ubu.

1 Timotius 5:10

Tamata liak musti rsiꞌik roak ne, ia baꞌi notu afa lolin, wean i notu lolin yanan ra, nsiꞌik ma lolin mangun ovi rlolak ia, nfakabava tenan a ma nlobang tamata ovi rorang Yesus, nlobang tamata ovi rtuan susa ra, ovu notu lalawatan afa ovi lolin ra.

1 Timotius 5:25

Wean inyai vali verin ita ma trea lahir afa lolin ovi tamata rotu ra. Naꞌuk wean i wol trea obin, na afa lolin avyai veka rvotuk watan.

1 Timotius 6:18

Msurak ira ma rotu aꞌuk lolin a, ralarira lolin urun verin tamata liak ra, ovu inar ma rlobang tamata ra.

Titus 2:14

Ia nala roak tenan a ma al ntevut ita tali dida salasilan ra. Ia nfamerat vali raladida ra, tevek Ni munuk ita, ovu notu ma inadida ma totu aꞌuk lolin a.

Titus 2:7

Titus, msiꞌik wam ma lolin naꞌa afakataka munuk, boma tamata ra rsiꞌik mu vavaꞌat a, na inar ma rorang oa. Wean i mair tamata ra, na ralam urun ovu mu vavaꞌat nmalola, boma ralang oa.

Titus 3:14

Tamata ovi rorang Yesus naꞌa nuhu Kreta yai musti rotu lalawatan afa ovi lolin ra, ma rlobang tamata ovi rtuan susa ra. Tamata ovi rorang Yesus rotu wean inyai, boma rira vavaꞌat ra fyawar.

Titus 3:4

Velik ne lan a, totu afa sian avyai, naꞌuk Ubu nfaturu Ni rala lolin a, ovu Ni silobang verin ita. Ia nsikat ita tali dida salasilan ra, ma dida vavaꞌat kakiwal.

Ibrani 10:24

Ita musti tsifangnanang ita, boma bisma tsifangrebat raladida ra ma isa nlobang isa, ovu vali totu afa ovi lolin ra.

1 Petrus 2:12

Bira vavaꞌat ra musti lolin naꞌa tamata ovi wol rkaꞌa Ubu, waharira ralan ra. Myotu wean inyai, boma wean i rfalak sian mia, na veka rsiꞌik bira afa lolin ovi myotu ra, ma veka rfadawang Ubu naꞌut amar i nma ewal lanit ivavan a.

1 Petrus 2:9

Naꞌuk Ubu nfili roak mia tamata ovi myorang Ia, ovu mia weabira vali mela falurut ovi rkarya verin Ubu i neluk Raja ma nfareta mia. Ubu notu ma weabira vali Ni sidovung dawan i nfamerat roak tali salasilan ra ma myerat urun. Ubu Ni roak mia, ovu nala roak mia tali dedan ralan ma mnyaꞌa lyawan i lolin urun a, boma fyamalik ovu fyadawang afa dawan ovi notu ra.

1 Petrus 3:1

Ba wean vali inyai verin tamata ovi msyifa roak. Vata ovi msyifa roak a fyakabava tenabira ra ma myot-orang watan afa ovi awabira rfalak ra. Myotu wean inyai, boma wean i boku tali mia, awabira ra wol rorang Ubu Ni vaivatul ra, na ira bisma rorang lahir vaivatul avyai, velik ne wol fyalak afakataka verin ira. Ira rorang wean inyai, tevek rsiꞌik roak bira sialang ovu bira vavaꞌat lolin ovi fyaturu lokat amar a.

1 Petrus 3:16

Ralabira ilaꞌa ra musti lolin lalawatan naꞌa afa ovi myotu ra. Myotu wean inyai, boma velik ne tamata boku rfalak sian mia tevek myorang Kristus, ovu myotu aꞌuk afa ovi lolin ra, na veka kaꞌi rfamaꞌit watan tenarira ra.

1 Petrus 4:11

Wean i tamata isa ni yabi ma nfamalik Ubu Ni vaivatul ra verin tamata liak, na afa ovi nfalak ra musti norang watan Ubu Ni vaivatul ra. Wean i tamata iki watan ni yabi ma nlobang tamata liak, na musti nlobang ovu ngrebat i Ubu nala verin ia. Myotu wean inyai, na tamata ra munuk veka rfadawang Ubu nahu Yesus Kristus. Ubu Ni ngrebat dawan ilaꞌa ovu inovan ma tfadawang Ia, nata ti wol ni wahan! Kena urun.

1 Petrus 4:14

Wean i tamata ra rfalak sian mia tevek myorang Kristus, na utubira urun, tevek Ubu Ni Roh a, Ni ngrebat a dawan urun i lahir nanaꞌa ralabira ra.