Proverbios 16:2 - Biblia Enxet

² Yának chá'a kataqmelak ekyókxoho aqsok apkelanakxa enxoho m'a énxet, Wesse' egegkok eyke apteme apyekpelchémo m'a ektémakxa nak chá'a apwáxok.

Proverbios 16:2 Σταυροειδείς Αναφορές

Salmos 36:2

Yának chá'a kapayhawok kataqmelek apxénamap, mey'asagkehek chá'a kataxchek ma'a aptémakxa ekmaso.

Proverbios 12:15

Yának chá'a kataqmelak ekyókxoho aqsok apkelanakxa m'a énxet ekyeyháxma nak, yeyxhok eyke chá'a ektáhakxa kélpaqhetchesso m'a énxet apya'áseykegkoho nak aqsok.

Proverbios 16:25

Yetneyk ámay apkene nak kataqmelak énxet, nétsapmakxa eyke maheykegkok xa ámay nak.

Proverbios 17:3

Kólwatnohok chá'a kóllanok ektémakxa m'a sawo ekyátekto ekmomnáwa, tén han sawo ekmope nak; Wesse' egegkok akke negko'o apkelányo chá'a ektémakxa élchetámeykha egwáxok.

Proverbios 21:2

Yának chá'a kataqmelak ekyókxoho aqsok apkelanakxa enxoho m'a énxet, Wesse' egegkok eyke apteme apyekpelchémo m'a ektémakxa nak chá'a apwáxok.

Proverbios 24:12

Exének sa' eykhe mey'ásegko exchep, sa' eyke ey'asagkohok ma'a apkelányo nak chá'a egwáxok; ey'asagkohok sa' ma'a ektáha nak chá'a apkeláneykha, apyaqmagkáseykekxa nak chá'a mók aqsok nenlane.

Proverbios 30:12

Yetneyk énxet apkenagko nak káxña'awok aptémakxa, megyaxñáseykekxa nak makham aptémakxa ekmanyása.

Proverbios 5:21

Apkeláneykha chá'a Wesse' egegkok ektémakxa aqsok apkelane m'a énxet; meyenyókasek apaqtek ma'a apmahágkaxa enxoho.

Isaías 26:7

Péwók ámay apagkok ma'a énxet'ák apkelpéwomo nak; Wesse', xép apteméssesso meyke élyapwátéyak ma'a ámay apagkok nak.

Jeremías 17:10

Ko'o sélányo chá'a apwáxok énxet, sektáha nak Wesse', tén han sekya'áseykegkoho chá'a m'a kañók agko' nak élchetámeykegkaxa apwáxok; tén han sekméssamól'a chá'a xama m'a ekpayhawo nak chá'a atnéssesek sellegassáseykegkoho, cham'a ektémakxa nak chá'a aqsok apkeláneyak.”

Daniel 5:27

keñe TEKEL ekxeyenma: kélyetsáteyák xép kelyetsáteyak wesse', apkexyókok han;

Números 22:32

Aptáhak axta apcháneya Wesse' egegkok apchásenneykha s'e: —¿Yaqsa ektáha aptáha nak ántánxo aptekpageykha yámelyeheykok apchánte? Ko'o exchek seyáhakkassáseykekxa apmonye' exchep, hakte megkalchak ko'o ewáxok apxega.

Jueces 17:6

Elának axta chá'a ekxénakxa enxoho apwáxok elának énxet ma'a nanók axta, hakte méko axta makham wesse' apwányam apagkok ma'a Israel.

Jueces 7:6

Trescientos axta apyókxoho m'a aptamhéyak nak apyenéyak yegmen ma'a ektémól'a semheg keynek yegmen. Keñe axta m'a nápakha nak apkeltekxeyágko chá'a aptapnák apyenágko yegmen.

1 Samuel 16:7

Keñe axta aptáha apcháneya Wesse' egegkok se'e: “Ná elano ektémakxa apyempehek, essenhan ektémakxa apwenaqte, hakte mómenyék ko'o xa. Megkatneyk ko'o sélányo ektémakxa nak apkelányo énxet; hakte apyókxa aqsa chá'a elanok pók énxet, keñe ko'o apwáxok aqsa chá'a alano'.”

1 Samuel 2:3

Méko sa' keyxkohok ekpeywa kapaqmeyesmakha, méko sa' kapaqmeyesmakha kaxénaxchekxohok agko', hakte Wesse' egegkok apteme Dios apya'áseykegkoho ekyókxoho aqsok, cha'a apkelyetsátéyak chá'a aqsok apkelane nak énxet tén han apkelyekpelchémo.