Miqueas 5:3 - Biblia Enxet

³ Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

Miqueas 5:3 Σταυροειδείς Αναφορές

1 Reyes 14:16

Ekxák sa' Wesse' egegkok ma'a énxet'ák Israel, eñama m'a aptémakxa axta apkelane mey'assáxma m'a Jeroboam, apkelánéseykegko axta melya'assáxma m'a israelitas.”

2 Crónicas 30:7

Nágkólteme aptamheykegkaxa axta kélyapmeyk nano', tén han ma'a kélnámakkok, apkeltémo axta kólmasséssók Wesse' egegkok, Dios apagkok axta kélyapmeyk nano', eñama apkelyenseyam apkelyetleykha ekhawo kélwet'a nak kéxegke.

Salmos 67:3

Oh Dios, elpeykeshok sa' xép énxet'ák; ¡elpeykeshok sa' apyókxoho énxet'ák!

Isaías 11:11

Exekmósek sa' makham apmopwána Wesse' egegkok apmako sa' enaqlanták makham énxet'ák apagkok apkeleymomap xa ekhem nak, apnaqlósawákxo sa' makham ma'a Asiria, Egipto, Patros, Etiopía, Elam, Sinar, Hamat tén han ma'a apkelókxa ekhéyak nak neyáwa wátsam ekwányam.

Isaías 49:6

“Mopwanchek xép etnehek séláneykha wánxa apkelánekxésso apheykha m'a Jacob énxet'ák apagkok tén han yaqwayam enaqlanták makham ma'a énxet'ák Israel apkeleymomap nak meletsapma; atnéssesek sa' nahan ko'o exchep élseyéxma apagkok ma'a apyókxoho pók aptémakxa énxet'ák, yaqwayam sa' eswok nélwagkásamáxche teyp ahagkok ma'a makhawók agko' nak keso náxop.”

Jeremías 23:5

Aptáhak Wesse' egegkok se'e: “Kammok sa' ekhem yaqwánxa exek xama aptáwen neptámen apagko' ma'a David, xama wesse' apwányam ekpéwomo aptémakxa, etnehek sa' wesse' apwányam yetlo apya'áseykegkoho, elánekxések sa' chá'a apheykha énxet'ák, yetlo ekpéwomo aptémakxa tén han ekpayhawo nak chá'a etnehek se'e apchókxa nak.

Jeremías 31:1

Aptáhak Wesse' egegkok se'e: “Hetnehek sa' ko'o Dios apagkok apyókxoho pók aptémakxa nak énxet'ák Israel xa ekhem nak, keñe sa' ko'o atnehek énxet'ák ahagkok.”

Ezequiel 34:16

Alchetmok sa' ma'a nepkések apkelxegányam nak, anaqlanták sa' ma'a apkelyetnakhágwayam nak chá'a apkelxega, alpextehetchesagkok sa' nahan ma'a ekhakxa nak chá'a énté xama apyók, apasmok sa' nahan ma'a apkelyelqamákpoho nak, keñe sa' amasséssók chá'a m'a apnaqmele nak tén han ma'a apkelyennaqte nak. Alanha sa' chá'a ko'o m'a, yetlo sekteméssesso m'a ekpayhawo nak chá'a anteméssesek nenláneykha.

Oseas 11:8

“¡Mowanchek ko'o eytnakhaksek xép Efraín! ¡Mowanchek ko'o ayenyók xép Israel! ¿Ewanchek enxeykel'a amasséssók ektéma axta sekmassésseykmo m'a tegma apwányam nak Admá? ¿Ewanchek enxeykel'a atnéssesek xép sekteméssessamakxa axta m'a Seboím? ¡Megkeynnák ko'o ewáxok, awanhek apmopyósa sélányo exchep!

Oseas 2:14

“Wának sa' kamekxak makham awáxok ko'o: ay'aksek sa' yókxexma meykexa nak énxet, kataqmalmakha sa' sekpeywa alána'.

Oseas 2:9

Awaták sa' ko'o makham, alwaták sa' ma'a hótáhap apaktek, tén han vino, ekwokmo enxoho eknakxamáxchexa', almekxak sa' nahan ma'a nepkések apwa' ahagkok, tén han apáwa apkeláxñeyo nak, sélmésso axta yaqwayam kalántaxnekxa'.

Amós 5:15

¡Kóltaqnow aqsok ekmaso! ¡Kólásekhoho m'a aqsok ektaqmela! Kólána kalanaxchek ekpéwomo kéllánekxésso amya'a énxet'ák ma'a sẽlyekpelchémókxa nak; lapmaxcheyk sa' kexa kalepyóshok elanok Wesse' egegkok, Dios ekha nak apyennaqte énxet'ák Israel apkeleymomap nak ektáha enxoho xa ektáha nak.

Miqueas 4:4

Apyókxoho énxet'ák sa' exmakha meyke apkelaye, exmakha sa' ellókasek apkelyampe kóneg anmen yámet pessesse agkok, tén han kóneg higo yámet. ¡Wesse' egegkok ekha apyennaqte appeywa xa!

Miqueas 5:7

Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, etnahagkok sa' ma'a ektémól'a yálye, apcháphassól'a Wesse' egegkok, tén han ektémól'a ekmámeye ekpálweyktál'a pa'at, melhaxanma nak chá'a apkeltémókxa etnehek ma'a énxet.

Miqueas 5:8

Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, máxa yámakméwa sa' etnahagkok neyseksa m'a aqsok nawha'ák éllo nak, máxa méwa sa' etnahagkok ekleykhal'a nepyeseksa m'a nepkések kélnaqtósso, ektahanmal'a neyseksa ekyeykhe keñe katnéssesek nápakha'a apketkók, eksawhomól'a kalnápok apyókxoho.

Miqueas 6:14

Etwok sa' eykhe apto, meyaqkanmek sa' eyke, meyk sa' aqsa chá'a kaqhek; yánchásekxak sa' eykhe chá'a apto, yahamók sa' eyke chá'a kasawhaxche', kéméxcheyk sa' agkok chá'a xama aqsok, wának sa' kólmasséssessók chá'a neyseksa kempakhakma.

Miqueas 7:13

Meyke xama aqsok sa' katnekxak ma'a xapop nak, eñama apkeltémakxa m'a énxet'ák apheykha nak ma'a, ekyaqmageykekxa apkeltémakxa ekmaso.

Zacarías 10:6

Aptáhak Wesse' egegkok se'e: “Agkések sa' ko'o apkelyennaqte m'a Judá aptawán'ák neptámen, alwagkasek sa' teyp ma'a José aptawán'ák neptámen. Anaqlakxak sa' makham ma'a apkelókxa apagko' nak, hakte apyósekak ko'o sélányo m'a. Etnahagkokxak sa' makham ma'a ektémakxa axta maltaqnaweykegko axta chá'a ko'o, hakte ko'o sekteme Dios Wesse' apagkok, sekháxenmo nak chá'a m'a apkelmaxneyéyak.