3 “¡Kóllánekxa' kéláhakkásamáxche'! ¡Kólchetamák!
Penchásexcheyk kélnegkenéyak aqsok ma'a néten mésa, kélpeykeságkek náxop ma'a apáwa kélpeykessamól'a chá'a náxop, cheynawók kaxwók ektámaxche ekyawe. ¡Sẽlpextétamo apkelwesse'e, kólchempekxa néten: kólyenmásekxa kéláhakkásamáxche'!
“Kóllegés Egipto s'e, tén han Migdol, tén han Menfis, tén han ma'a Tafnes: ‘¡Kólleyxmakha, kóllánekxa kéltáhakxa! ¡Yetnakmek ekyógkexma sókwenaqte kélnepyáwa!’
Kóllegés sa' apyókxoho pók aptémakxa énxet'ák se'e: ¡Kóllánekxés aptamhágkaxa yaqwayam yempakha'! ¡Kóláneyha m'a apkelyennaqte nak! ¡Elxegmak sa' ma'a kempakhakma yapmeyk, tén sa' elxog!
Énxet'ák Nínive, apya'awak kéxegke m'a apmáheyo emasséssók. ¡Kólána yaqnágwakxak néten tegma kélhaxtegkesso nepyáwa' apyennaqte m'a sẽlpextétamo! ¡Kólenmexho sa' ma'a ámay! ¡Kóllánekxa sa' kéltáhakxa yaqwayam kólempakha'! ¡Kólanchásekxa sa' sẽlpextétamo kélagkok!
Kólyetmák sa' yegmen, yaqwayam sa' kólewának kólenmaxaxkohok ma'a kélwakhamáxche'; kóllánekxa sa' kélhaxta. Kólántex sa' yelpa', kólteyam sa' kólyélaqtések, kóllána sa' yátaphémekcha'ák.
